Situaziun da partenza
1. En la documentaziun ch'è vegnida elavurada da l'uffizi d'energia e da traffic (UEnTr) davart las infrastructuras da viafier previsas è vegnì integrà il project prospectiv d'ina colliaziun dals TILO Castione – Roveredo (vesair documentaziun dal UEnTr GR).
2. La colliaziun menziunada che n'è deplorablamain betg vegnida approfundada en il studi davart ils projects innovativs, porscha diversas schanzas per il chantun e per la regiun:
• primo survegniss la zona d'industria da S. Vittore ina colliaziun da viafier;
• secundo vegniss la Mesolcina bassa integrada en la rait dals TILO (viafier urbana Tessin – Lumbardia) e pudess s'avischinar a las aglomeraziuns da Bellinzona e da Lugano sco er a la regiun Lumbardia, nua che sa chatta l'eroport internaziunal Malpensa;
• plinavant vegniss rinforzada la rolla da Roveredo sco center regiunal, che survegniss – sco previs en il plan directiv regiunal – ina staziun finala che cuntegness parcadis e binaris, quai che dess in ulteriur schlantsch al svilup economic da la regiun;
• a Roveredo èn gia previsas las lavurs per demolir l'actuala N13 e per concepir da nov il center dal vitg. Ina staziun finala pudess pia profitar da las sinergias dal plazzal e limitar ils custs da construcziun.
3. La pressa tessinaisa discurra l'ultim temp da la pussaivladad da spustar ils lavuratoris da las VFF che sa chattan en il center da Bellinzona ordaifer il center da la citad, e quai cun la finamira da pudair disponer dal terren prezius – da la futura fermada da Bellinzona sin la lingia da l'Alptransit – per intents d'abitar u da servetschs cun in grond augment da la valur. La zona d'industria da S. Vittore fiss il lieu ideal per quest intent (ils lavuratoris basegnan oz ca. 100 000 m2 terren), cunzunt sch'ella survegniss ina colliaziun da viafier. Ultra da quai èn las Viafiers federalas svizras – gist pervia da l'avertura dal transit tras las Alps – permanentamain en tschertga da novas plazzas per lur activitads.
Dumondas
4. Concretamain fatsch jau las suandantas dumondas a la regenza:
• Co ed en tge temps èsi previs d'approfundar il project da colliaziun da la rait da viafier dals TILO tranter Castione e Roveredo sid?
• Èn ins gia entrà en contact cun las Viafiers federalas svizras per discutar davart lur basegn da spazi e davart in'eventuala utilisaziun d'ina part da l'areal da la plazza aviatica da S. Vittore?
• Co pensan ins d'instradar la discussiun cun il chantun Tessin vischin, cun la finamira da cuntanscher ina collavuraziun per progredir cun quest project? (Il cumenzament era il chantun Tessin favuraivel a questa lingia, perquai ch'el veseva en quella la pussaivladad d'ina colliaziun fin a Clavenna!)
Cuira, ils 5 da december 2012
Righetti, Della Vedova, Augustin, Berther (Mustér), Berther (Camischolas), Bezzola (Samedan), Blumenthal, Bondolfi, Brandenburger, Caduff, Caluori, Casanova-Maron, Casutt, Casutt-Derungs, Cavegn, Darms-Landolt, Dermont, Dosch, Fallet, Fasani, Geisseler, Giacomelli, Hartmann (Champfèr), Hitz-Rusch, Holzinger-Loretz, Joos, Kleis-Kümin, Kunz (Cuira), Marti, Michael (Donat), Michael (Castasegna), Parpan, Sax, Stiffler (Cuira), Tenchio, Thöny, Tomaschett-Berther (Trun), Troncana-Sauer, Waidacher, Zanetti, Degonda, Deplazes, Michel (Igis), Monigatti, Müller (Susch), Patt
Resposta da la regenza
L'avertura da l'engrondiment previs da la zona da plazzas da lavur ch'è d'impurtanza chantunala a San Vittore tras ina colliaziun da viafier è in element dal project per il svilup dal lieu "Plazza aviatica San Vittore". Il concept general d'ina dimensiun da circa 250'000 m2 po vegnir elavurà uschespert che las acturas involvidas ed ils acturs involvids (vischnanca da San Vittore, regiun Mesolcina, chantun ed armasuisse immobiglias) han suttascrit in memorandum of understanding.
L'opziun da construir in binari da viafier per lung da la A 13 fin al cunfin da la zona regiunala d'industria a San Vittore è previsa en ils plans directivs vertents dals chantuns Tessin e Grischun. La confederaziun aveva permess gia l'onn 1989 da construir in binari d'industria fin a San Vittore sin l'anteriur trassé da la Viafier retica. In nov binari pudess vegnir duvrà – ultra da per il traffic da rauba – er per cuntinuar cun ils TILO fin a San Vittore – Roveredo. Oz sa ferman ils trens a Castione. Sch'ins considerescha ils lungs temps, da 23 – 46 minutas, ch'ils trens TILO dovran actualmain per volver a Castione, pudess quai schizunt vegnir fatg senza stuair metter a disposiziun ulteriur material rullant. Roveredo e San Vittore vegnissan colliads uschia en moda bler pli svelta e confortabla cun l'aglomeraziun da Bellinzona. L'avertura dal tunnel da basa dal Monte Ceneri l'onn 2019 vegn ultra da quai a reducir considerablamain er ils temps da viadi en l'aglomeraziun da Lugano, en moda che la cuntanschibladad da la Mesolcina bassa e sia attractivitad sco lieu d'abitar e da lavurar vegnan meglieradas anc ina giada cleramain.
Per Roveredo è vegnì suttascrit ils 6 da december 2012 – en il rom dal piano d'azione "ricucitura" (midada dal center dal vitg suenter il spustament da la A 13) – in memorandum of understanding che na prevesa dentant betg pli in trassé da viafier sur terra a Roveredo (al lieu da l'anteriura staziun da la Viafier retica). Sco alternativa stuess vegnir proponida ina nova staziun finala per ils trens TILO tranter San Vittore e Roveredo sin il territori da Sassello.
Las singulas dumondas pon vegnir respundidas sco suonda:
Dal puntg da vista dal chantun Tessin na vegni betg giavischà da spustar il lavuratori da las Viafiers federalas a San Vittore. Tenor ina communicaziun a la pressa cuminaivla dal chantun Tessin e da las Viafiers federalas dals 29 da november 2012 vegni refusà categoricamain d'excorporar activitads existentas u novas or dal lieu actual. La probabilitad ch'il lavuratori da las Viafiers federalas vegnia spustà en il futur dal Tessin al Grischun sto perquai vegnir considerada sco fitg pitschna.
La regenza è er da l'avis ch'ina prolungaziun da la rait da viafier TILO da Castione fin a San Vittore – Roveredo purtass novas schanzas per in ulteriur svilup da la Mesolcina bassa. Ultra da quai pudessan ins er profitar da sinergias, sch'ins construiss il binari da colliaziun fin a la zona regiunala d'industria a San Vittore. En connex cun il project per il svilup dal lieu San Vittore è la tematica dals TILO gia vegnida discutada preliminarmain cun represchentantas e represchentants dal chantun Tessin. Las colliaziuns dals TILO ch'èn gia vegnidas realisadas cun success ils ultims onns en il Tessin pon vegnir prolungadas fin en il Grischun, ed il Moesano po vegnir collià uschia directamain cun il spazi economic prosperant da Bellinzona – Lugano. Ultra da quai resultass ina colliaziun da viafier directa fin a Milaun e sur Varese fin a la plazza aviatica internaziunala da Milaun-Malpensa.
La colliaziun da viafier pudess augmentar l'attractivitad da la Mesolcina bassa per novas plazzas da lavur e d'abitar. Tuttina è il potenzial per ina nova colliaziun da viafier vegnì giuditgà fin ussa da la TILO SA cun gronda precauziun e sceptica, pervia dal dumber da la populaziun modest en la Mesolcina bassa. Ils custs d'investiziun e da gestiun sco er il niz per l'economia publica d'ina colliaziun dals TILO cun San Vittore – Roveredo stuessan perquai vegnir stimads actualmain ed exactamain en il rom d'in studi. Sche las vischnancas participadas, il chantun Tessin e la TILO SA manifesteschan lur interess per in tal project, è la regenza pronta da laschar far in rapport da basa tecnic davart in concept da purschida e da manaschi dal traffic da persunas e da rauba ed ina stimaziun correspundenta da la dumonda sco er dals custs d'infrastructura e da gestiun.
6 da mars 2013