Il tribunal federal svizzer ha fixà ils 30 d'october 2012 (DTF nr. 4_127/2012 e 4A_141/242) che bancas che administreschan facultads ston conceder uschenumnadas cumissiuns d'effectiv (ina spezia retrocessiun resp. restituziun) a la clientella sut l'aspect da ponderaziuns dal dretg d'incumbensa, sch'il client n'ha betg renunzià u na renunzia betg explicitamain a talas.
1. Vesa la regenza in ed eventualmain tgenin basegn d'agir en consequenza da la sentenzia menziunada?
2. Pondereschan il chantun resp. sias instituziuns (cassa da pensiun, GVG, IAS) da far valair envers las bancas la restituziun da las retrocessiuns numnadas e sche gea tge entradas supplementaras chaschunass quai?
3. Pondereschan il chantun resp. sias instituziuns (cassa da pensiun, GVG, IAS) d'adattar contracts da mandat cun las bancas e sche gea en tge senn?
4. Existan contracts davart l'administraziun da facultads cun administraturs da la facultad privats che n'èn betg bancas? Co è schliada là la dumonda da la retrocessiun?
Cuira, ils 5 da december 2012
Tenchio, Nick, Albertin, Blumenthal, Caduff, Caluori, Casanova-Maron, Casty, Casutt, Clavadetscher, Conrad, Della Vedova, Fallet, Fasani, Hartmann (Cuira), Hitz-Rusch, Jenny, Kollegger (Malix), Peyer, Pfäffli, Pfenninger, Pult, Righetti, Trepp, Zanetti, Buchli (Favugn), Degonda, Vincenz
Resposta da la regenza
Cun la sentenzia dals 30 d'october 2012 (4A_127/2012) ha il tribunal federal obligà ina banca ch’era incumbensada sco administratura da la facultad da restituir a l'incumbensader retrocessiuns u restituziuns ch'ella ha survegnì da terzas persunas. Il tribunal ha er inclus en l'obligaziun da restituziun las uschenumnadas cumissiuns per tgirar l'effectiv e las indemnisaziuns da distribuziun ch'ina banca sco administratura da la facultad survegn, sch'ella acquista fonds d'investiziun e products structurads. Las premissas per ina restituziun da talas indemnisaziuns èn l'existenza d'in contract davart l'administraziun da la facultad ed il pajament da las taxas respectivas. La sentenzia na perda nagin pled davart mandats da cussegliaziun e davart fatschentas libras da cussegliaziun. Las consequenzas da questa sentenzia èn actualmain anc contestadas.
1. Retrocessiuns curran en spezial tar fonds (fonds d'investiziun maschadads, fonds d'obligaziuns, fonds d'investiziuns en aczias, fonds d'index, fonds da materia prima, fonds da strategia e.u.v. ed exchance traded funds), tar hedge funds e tar fonds alternativs sco er tar products structurads (p.ex. products da protecziun dal chapital, products da participaziun, products per optimar la rendita). Il chantun posseda e possedeva er en il passà mo investiziuns directas, tar las qualas na curran naginas retrocessiuns. Per il chantun na datti nagin basegn d'agir.
La cassa da pensiun chantunala dal Grischun (CP) n'ha fatg nagins contracts cumplessivs cun bancas, ils quals concernan l'administraziun da la facultad. Però ella dispona da singulas relaziuns da mandat cun administraturs da la facultad. Questas relaziuns èn definidas e regladas cleramain en in contract individual cun ils singuls administraturs da la facultad. En ils singuls contracts èn vegnidas regladas explicitamain la moda e maniera da l'indemnisaziun e sia autezza. Plinavant èsi vegnì fixà che l'incumbensà sto ceder tut ils avantatgs da facultad a la CP, ils quals resultan da l'execuziun dal mandat. En il rapport da gestiun da la CP vegnan publitgadas las retrocessiuns dapi l'onn 2008 (per l'onn 2011 ca. 500 000 francs). In basegn d'agir direct per adattar ils contracts currents n'è betg avant maun per la CP. Resguardond il svilup da l'interpretaziun dal dretg e dals termins da surannaziun examinescha la CP, sch'ella pudess far valair retroactivamain anc ulteriurs dretgs da retrocessiuns, da cumissiuns u d'indemnisaziuns da distribuziun dals furniturs da servetschs finanzials respectivs.
L'assicuranza d'edifizis dal Grischun (GVG) e l'institut d'assicuranza sociala dal chantun Grischun (IAS) administreschan lur vaglias per gronda part sezs e reglan lur commerzi oravant tut sur las trais bancas localas banca chantunala grischuna (BCG), UBS e CS che ageschan principalmain sco bancas da deposit sin basa d'in mandat. Igl existan dentant er mandats per l'administraziun da la facultad. La GVG ed il IAS stattan en contact cun las bancas en quai che concerna la restituziun da retrocessiuns. Resultats n'èn anc betg avant maun.
2. Ord vista actuala na datti naginas dumondas da restituziun per il chantun. Concernent la CP, il IAS e la GVG vegnan ils scleriments gia fatgs tar las bancas pertutgadas. Cifras n'èn avant maun naginas.
3. Per il chantun e per la CP n'èsi betg necessari d'adattar contracts. Il IAS e la GVG vegnan probablamain a far novas cunvegnas.
4. Il chantun, il IAS e la GVG n'han nagins contracts da mandat cun administraturs privats da la facultad. La CP ha tals contracts. Il tema da las retrocessiuns è però gia reglà suffizientamain en quests contracts.
27 da favrer 2013