L'onn 2018 vegn il Sennhof previsiblamain ad esser vid. Er sche la nova praschun a Realta n'è betg anc construida, han la citad da Cuira (Südostschweiz dals 3 da december 2012, p. 1 e 3) sco er persunas da Cuira che lavuran sin il champ cultural (p.ex. l'atelier cuminaivel SommerHAUPTquartier en la Galaria da la citad da Cuira, avust 2012) mussà gia daditg lur interess per quest edifizi.
Il Sennhof pudess finalmain satisfar a pli lunga vista al basegn d'in center da cultura multifar. El engrondiss la purschida da localitads che pon vegnir utilisadas per intents culturals, pudess dar ina cuntrapaisa al fatg che la cultura vegn stgatschada en la periferia ed avess plinavant in effect vivifitgant. Sche pliras persunas utiliseschan cuminaivlamain localitads, pon resultar plattafurmas creativas e collavuraziuns fritgaivlas.
Nus spetgain gia daditg in center cultural modern, betg mo per Cuira, mabain er per in intschess bler pli grond. En il Sennhof pon vegnir realisads ateliers ed er locals d'emprova isolads cunter la canera sco er localitads d'occurrenza. A l'intern da l'edifizi hai plinavant ina gronda cuschina cun ina cantina sco er in lavuratori – pia la meglra infrastructura per giasts e per persunas che lavuran sin il champ cultural.
En il Sennhof pudessan avair lieu differents teaters e concerts sco er diversas prelecziuns, vernissaschas ed exposiziuns. Ma a l'intern da l'edifizi pudessan p.ex. er vegnir endrizzads in kino cultural u in albiert per la giuventetgna. La "sonda lunga", che ha mintgamai lieu il november, mussa quant grond ch'il potenzial cultural è en nossa chapitala e quantas Grischunas e quants Grischuns che profiteschan da questa purschida. Ma er la "sonda lunga" ha in problem da spazi. Il Sennhof po schliar quest problem da spazi, betg mo per la "sonda lunga", mabain durant l'entir onn.
Perquai duai il Sennhof appartegnair al pievel grischun e betg simplamain vegnir vendì a tgi che fa la meglra offerta. Sche nus vulain ch'il Grischun restia er vinavant attractiv, er per umans giuvens e per consumentas e consuments potenzials, stuain nus investir immediatamain en nossa economia culturala u almain sustegnair quella.
1. Po la regenza s'imaginar da metter a disposiziun u da dar en locaziun il Sennhof a las persunas grischunas che lavuran sin il champ cultural?
2. Fiss la regenza pronta da surlaschar questas localitads per il pretsch custant p.ex. ad in'associaziun che consista da persunas che lavuran sin il champ cultural?
3. È la regenza pronta da pussibilitar – ensemen cun la citad da Cuira – ina midada d'utilisaziun a favur da la cultura?
Cuira, ils 6 da december 2012
Michel (Igis), Marti, Bucher-Brini, Bezzola (Samedan), Blumenthal, Brandenburger, Casutt, Darms-Landolt, Dermont, Frigg-Walt, Gartmann-Albin, Jaag, Jenny, Kappeler, Kleis-Kümin, Kollegger (Cuira), Locher Benguerel, Meyer-Grass, Müller (Tavau Plaz), Noi-Togni, Pult, Stiffler (Cuira), Thöny, Wieland, Deplazes, Monigatti, Patt
Resposta da la regenza
La construcziun d'in stabiliment per l'execuziun da chastis e da mesiras serrà a Realta, vischnanca da Cazas, è ina mesira dal punct central da svilup "execuziun da chastis" tenor il program da la regenza 2013-2016. Cun il conclus dals 29 da schaner 2013 e sin basa d'in rapport strategic per l'execuziun da chastis ha la regenza perquai incumbensà l'uffizi chantunal da construcziun auta da realisar ina concurrenza da planisaziun per in stabiliment per l'execuziun giudiziala serrà cun 150 plazzas da praschuniers. Tras la concentraziun da l'execuziun da chastis a Realta duai vegnir schliada la situaziun d'execuziun actuala nuncuntentaivla al Sennhof, ed en il concordat da la Svizra orientala davart l'execuziun da chastis e da mesiras duai vegnir cuvrì il basegn cumprovà da plazzas da praschuniers supplementaras. Igl è previs da suttametter la fatschenta l'onn 2014 al cussegl grond per l'approvaziun definitiva.
Sch'il nov stabiliment a Realta vegniss realisà, stuessi vegnir renunzià als edifizis dal Sennhof sco instanza executiva. Tenor il giudicament actual na pon las localitads, ch'èn concepidas specificamain per il manaschi da praschun, betg vegnir duvradas per autras activitads administrativas e duain perquai vegnir messas sin il martgà per distgargiar las finanzas dal chantun.
Areguard il dretg da finanzas è la renunzia al Sennhof sco praschun ina sdedicaziun da facultad administrativa. L'intent d'utilisaziun, che la lescha davart l'execuziun giudiziala prevesa per questa immobiglia, na fiss lura betg pli dà. Consequentamain sto l'immobiglia vegnir transferida da la facultad administrativa en la facultad finanziala. Valurs da facultad da la facultad finanziala ston da princip pudair vegnir vendidas da tut temp, senza restrenscher l'adempliment d'incumbensas publicas. Sch'ellas restassan en il portafegl d'investiziuns dal chantun, stuessan ellas avair in tschains che cuvra ils custs e che correspunda al martgà. Sch'ins desistiss voluntarmain da las entradas, per exempel sch'il tschains da locaziun vegniss relaschà dal tuttafatg u per part, fiss quai percunter – areguard il dretg da finanzas – in'expensa, e quella premettess ina basa giuridica correspundenta.
Las dumondas concretas pon vegnir respundidas sco suonda:
1. Per evaluar l'utilisaziun futura dal Sennhof duai – a medem temp sco la concurrenza da planisaziun per la construcziun dal nov stabiliment a Realta – vegnir realisada ina concurrenza d'ideas resp. d'investiders. Ultra da criteris architectonics sco la realisabladad en l'effectiv protegì u l'intensitad da l'utilisaziun ston – en cas d'ina surdada – vegnir resguardads er en spezial aspects da rentabilitad confurm a las prescripziuns dal dretg da finanzas. Sche l'immobiglia vegn la finala vendida, dada en locaziun u consegnada a terzas persunas en il dretg da construcziun, duai resultar da la procedura da concurrenza. Er ina locaziun a persunas che lavuran sin il champ cultural n'è betg exclusa. En il senn d'ina exposiziun cumplessiva na sto la missiva, che vegn elavurada per mauns dal cussegl grond, betg mo preschentar il project per la construcziun dal nov stabiliment, medemamain er l'utilisaziun futura e las pussaivladads da retgav da l'areal dal Sennhof.
2. Immobiglias chantunalas ston vegnir consegnadas per valurs che correspundan al martgà. Per insumma pudair eruir la valur commerziala da questa immobiglia fitg speziala èsi bunamain indispensabel da realisar ina procedura da concurrenza. Sch'ins surlaschass ina immobiglia per il pretsch custant resp. per la valur da martgà ad ina instituziun culturala, desistiss ins d'entradas. Al chantun manca la basa legala per quai. Sin basa da la lescha per promover la cultura pon instituziuns culturalas percunter vegnir sustegnidas subsidiarmain a las prestaziuns da persunas privatas e da vischnancas, sch'ils criteris da promoziun correspundents èn ademplids.
3. Areguard l'ulteriura utilisaziun da l'immobiglia vegn il chantun – sco usità – ad integrar la vischnanca da staziunament en il process da chattar ina soluziun. Sche la citad da Cuira avess eventualmain interess da surpigliar il Sennhof sco center da cultura, ston vegnir resguardadas las prescripziuns da la legislaziun da finanzas sco er il princip da la subsidiaritad sin il champ da la promoziun da la cultura.
13 da mars 2013