Il mars 2013 han las votantas ed ils votants dal Grischun refusà la candidatura per ils gieus olimpics cun 53 %. Il resultat mussa che las regiuns che n'appartegnevan betg als lieus da realisaziun avevan ina tenuta critica envers la candidatura. Il resultat relativamain stretg permetta la conclusiun ch'il Grischun na di betg da princip na ad occurrenzas grondas, mabain ch'i vegnan appreziadas oravant tut quellas che sa repetan. Talas occurrenzas sco per exempel il final dal cup mundial alpin a Lai-Parpan, la Tour de Ski en la Val Müstair u il campiunadi mundial da skis a San Murezzan vivan da bleras persunas voluntaras e d'in comité d'organisaziun che realisescha talas occurrenzas cun blera atgna iniziativa e cun in grond idealissem. Ultra da l'effect da reclama considerabel genereschan talas occurrenzas ina valurisaziun per la regiun e per part lunsch sur la regiun ora che na dastga betg vegnir sutvalitada. Las persunas responsablas enconuschan dus quitads principals, oravant tut en la fasa iniziala: D'ina vart sa tracti da la garanzia finanziala (en emprima lingia ina garanzia da deficit substanziala) per l'occurrenza e da l'autra vart d'in sustegn nunbirocratic en il senn d'in one-stop-shop. Uschia vegnan promovidas ideas innovativas e sustegnids raschunaivlamain ils organisaturs che survegnan uschia er la stima necessaria.
Cun questa incumbensa vegn la regenza supplitgada da stgaffir ina basa legala, nua che quai è necessari, per pudair promover substanzialmain occurrenzas (p.ex. da sport, per il turissem u culturalas) en il chantun, che han almain ina impurtanza naziunala, e quai cun garanzias da deficit. Sch'ina basa legala per quai è gia avant maun, duai la posiziun correspundenta dal preventiv vegnir midada ed augmentada a favur da garanzias da deficit e da mesiras organisatoricas.
Cuira, ils 24 d'avrigl 2013
Kollegger (Malix), Engler, Aebli, Albertin, Barandun, Berther (Mustér), Berther (Camischolas), Bezzola (Samedan), Blumenthal, Buchli-Mannhart, Caduff, Caluori, Campell, Casty, Cavegn, Clalüna, Conrad, Darms-Landolt, Della Vedova, Dosch, Fallet, Geisseler, Grass, Hitz-Rusch, Holzinger-Loretz, Kleis-Kümin, Märchy-Caduff, Meyer-Grass, Niederer, Niggli-Mathis (Grüsch), Parolini, Parpan, Pedrini (Roveredo), Sax, Stiffler (Tavau Plaz), Tenchio, Tomaschett-Berther (Trun), Zanetti, Calonder, Decurtins-Jermann, Epp, Gassmann, Haltiner
Resposta da la regenza
Sa basond sin la lescha per promover il svilup economic en il chantun Grischun (lescha per il svilup economic, LSE; DG 932.100) promova il Grischun il svilup economic sin ses territori cun la finamira da segirar plazzas da lavur existentas e da stgaffir novas. Per quai po el pajar contribuziuns ad occurrenzas. Quai sut la premissa che quellas augmentian il grad d'enconuschientscha dal Grischun sco regiun turistica e sia valurisaziun, ch'ellas hajan ina impurtanza surregiunala, che la marca graubünden vegnia integrada en il concept da communicaziun da l'organisatur e che las atgnas prestaziuns da l'organisatur e contribuziuns da terzas persunas sajan exauridas (ordinaziun per promover il svilup economic en il chantun Grischun; DG 932.160).
Tant la LSE sco er l'ordinaziun respectiva laschan avert, sche occurrenzas vegnan sustegnidas en furma da contribuziuns à fonds perdu u en furma da garanzias da deficit. Per motivs dal tractament egual paja il Grischun per regla contribuziuns à fonds perdu. En cas d'occurrenzas grondas vegn la contribuziun per regla repartida en ina part à fonds perdu ed en ina part cun ina garanzia da deficit. La basa legala vertenta basta pia per dar il sustegn pretendì en l'incumbensa. Sin basa da la LSE ha il Grischun concedì ils ultims 5 onns en media var 350 000 francs per onn sco contribuziuns finanzialas ad occurrenzas. Per occurrenza è quai stada ina part da 3 fin 10 pertschient dals custs imputabels, en media 5 pertschient. Il preventiv per «contribuziuns generalas tenor la lescha per il svilup economic» è adina vegnì exaurì ils ultims 5 onns. Ina gronda part da questa posiziun da preventiv è liada pervia da las contribuziuns ad instituziuns da perscrutaziun ch'èn fixadas en las cunvegnas da prestaziun respectivas. Transferiments a favur d'occurrenzas n'èn pia betg pussaivels. In augment dal preventiv na para actualmain betg d'esser realistic sin fundament da las valurs directivas da la politica da finanzas dal cussegl grond e da las prescripziuns dal preventiv e dal plan da finanzas da la regenza che sa basan sin tal. Natiralmain resta resalvà in augment dal preventiv tras il cussegl grond en il rom da sia suveranitad concernent il preventiv. L'introducziun da mesiras organisatoricas en il senn d'in one-stop-shop è part da la revisiun totala currenta da la lescha per il svilup economic.
La regenza è pronta – en il rom da l'incumbensa Caduff (pausa tar la revisiun totala da la lescha per il svilup economic) ed en connex cun la revisiun totala currenta da la lescha per il svilup economic – d'examinar la dumonda davart ina promoziun pli ferma d'occurrenzas che han almain ina impurtanza naziunala.
En quest senn vegn l'incumbensa acceptada.
10 da zercladur 2013