Tras la refurma planisada da l'imposiziun da taglia sin interpresas III vul la confederaziun adattar il status fiscal chantunal da societads administrativas ch'èn domiciliadas en Svizra. Fin oz ston questas societads pajar taglia sin plaun chantunal sin ina basa reducida per gudogns fatgs a l'exteriur. Ils retgavs svizzers ed esters duain perquai vegnir tractads en l'avegnir da medema maniera. Persuenter duain dentant las taglias per interpresas svizras sa reducir en general, e quai dad actualmain 17 pertschient (suenter taglias) a 12–14 pertschient.
En in artitgel da la «Südostschweiz» dals 18 da matg 2013 vegn Barbara Janom Steiner, sco cussegliera guvernativa cumpetenta, a la conclusiun che las perditas da taglia fissan supportablas per il Grischun. Ella quintia cun perditas da taglia da 15 fin 28 milliuns francs per il chantun. Cunquai che las perditas da taglia vegnissan per part cumpensadas (participaziun pli gronda dals chantuns vi da las taglias federalas) e damai che la gulivaziun da finanzas federala na vegniss betg midada en quest reguard, vegn la refurma giuditgada sco realisabla. Dacurt – a chaschun da la radunanza da delegadas e delegads – ha l'uniun grischuna d'artisanadi e mastergn correspundentamain formulà la finamira da reducir ussa l'imposiziun da taglia sin interpresas.
Cunquai che las spezialitads fiscalas svizras vegnan a vegnir adattadas al sistem europeic e perquai che questa refurma è supportabla e realisabla per il chantun Grischun, na duai – ord vista da las sutsegnadras e dals sutsegnaders – betg vegnir spetgà en quest reguard. Las interpresas indigenas profiteschan d'ina reducziun da la taglia, e las societads administrativas ch'èn domiciliadas qua survegnan svelt segirezza giuridica sco er ina imposiziun da taglia che na las expona betg pli a la critica europeica. Las sutsegnadras ed ils sutsegnaders incumbenseschan perquai la regenza da reducir las taglias sin il gudogn per interpresas uschenavant, ch'i resulta ina grevezza totala da 12–13 pertschient (suenter taglias) sin plaun communal, chantunal e federal. La refurma fiscala sto vegnir concepida uschia, che la perdita d'entradas vegn purtada principalmain dal chantun. Quai cun fixar la tariffa da taglia per persunas giuridicas en la lescha chantunala da taglia separadamain per las vischnancas e per il chantun.
Cuira, ils 12 da zercladur 2013
Kunz (Cuira), Felix, Caduff, Bondolfi, Burkhardt, Campell, Casanova-Maron, Casty, Casutt Renatus, Claus, Clavadetscher, Davaz, Dudli, Engler, Fontana, Giacomelli, Gunzinger, Hardegger, Hartmann (Champfèr), Holzinger-Loretz, Jeker, Jenny, Kasper, Koch (Igis), Kollegger (Malix), Kunz (Fläsch), Marti, Meyer-Grass, Michael (Castasegna), Michel, Niederer, Niggli (Samedan), Parolini, Parpan, Pfäffli, Righetti, Rosa, Stiffler (Cuira), Tenchio, Tomaschett (Breil), Troncana-Sauer, Tscholl, Valär, Vetsch (Pragg-Jenaz), Wieland, Zweifel-Disch, Berther (Segnas), Grünenfelder Hunger, Hauser, Meuli, Müller (Haldenstein), Nicolay, Preisig
Resposta da la regenza
L'incumbensa parta da la faussa supposiziun che la scheffa dal departament da finanzas e vischnancas haja giuditgà las perditas da taglia, che resultan da la refurma da l'imposiziun da taglia sin interpresas III, sco finanzialmain supportablas. Quai na stat betg scrit en l'artitgel cità da la Südostschweiz e na correspunda er betg a la realitad. En il program da la regenza è previsa ina reducziun minimala da la taglia sin il gudogn; en la sessiun d'october 2012 ha il cussegl grond dentant gia refusà cleramain ina reducziun da la tariffa da la taglia sin il gudogn per il chantun d'actualmain 5,5 % a 4,5 %.
La cumparegliaziun da las taglias sin il gudogn sa basa sin la grevezza fiscala effectiva che tegna quint da la deducibladad da las taglias sin il gudogn sco expensas motivadas da la fatschenta. En il Grischun importa quella oz 16,7 % per tut las taglias sin il gudogn (confederaziun, chantun, vischnancas e baselgias chantunalas), ed ella duai vegnir reducida a 12 % u a 13 %. Las entradas pli pitschnas duain vegnir purtadas principalmain dal chantun, uschia ch'igl èn pussaivlas differentas constellaziuns cun diversas repartiziuns da las grevezzas:
Perditas da taglia da tala dimensiun na pon il chantun, las vischnancas e las baselgias chantunalas betg sa prestar. Schizunt sche las entradas pli pitschnas vegnissan spustadas pli fitg en direcziun dal chantun, na fissan las perditas per las vischnancas strusch da supportar. Quest spustament cuntradi dal rest er a las directivas da la politica da finanzas dal cussegl grond, numnadamain d'evitar da spustar grevezzas tranter il chantun e las vischnancas. Perquai ch'i resultassan entradas pli pitschnas, na pudess il chantun betg pli cuntanscher in quint equilibrà. L'artitgel 93 da la constituziun chantunala, che pretenda finanzas equilibradas a media vista, na pudess betg pli vegnir observà senza stuair sminuir prestaziuns, reducir investiziuns e/u realisar entradas supplementaras tras auters geners da taglia.
La concepziun concreta da la refurma da l'imposiziun da taglia sin interpresas III da la confederaziun n'è insumma betg anc fixada. Cunzunt n'èsi betg cler, quant enavant che la refurma chaschunass ina reducziun da la taglia sin il gudogn, sche ed en tge dimensiun che la confederaziun cumpensass las reducziuns da la taglia sin il gudogn dals chantuns tras pajaments da gulivaziun e tge consequenzas che las differentas propostas da soluziun avessan per la concepziun actuala da la gulivaziun da finanzas da la confederaziun. En vista a las entradas da circa 270 milliuns francs or da la nova concepziun da la gulivaziun da finanzas (NGF) da la confederaziun restrenscha questa malsegirezza massivamain la libertad d'agir dal chantun areguard la politica da finanzas. Plinavant na poi betg vegnir exclus oz ch'in chantun, che reducescha anticipadamain las tariffas da la taglia sin il gudogn, ristga da vegnir exclus dals pajaments da gulivaziun da la confederaziun. Sche mo las consequenzas directas da l'imposiziun da taglia sin interpresas III vegnissan gulivadas (per part) tras la confederaziun, na pudessan chantuns, che han reducì gia avant massivamain las taglias sin il gudogn, survegnir nagut. A questa ristga na po e na vul la regenza betg s'exponer.
Er differents auters motivs pledan cunter la reducziun da la taglia sin il gudogn proponida. Uschia il tractament fiscal inegual da persunas cun activitad da gudogn independenta e da persunas giuridicas, la relaziun tranter la taglia sin il gudogn e la taglia sin il chapital, las consequenzas intschertas da l'iniziativa cunter las abitaziuns secundaras per l'economia publica grischuna u il svilup da las cifras dal plan da finanzas. Ils chantuns che ston pajar sin basa da la NGF n'acceptassan quai strusch uschia, ed i na po esser betg l'interess dal Grischun da metter en discussiun la NGF da la confederaziun. Sin basa da tut questas ponderaziuns propona la regenza da refusar questa incumbensa.
3 da settember 2013