Medias e medis da chasa fan ina lavur impurtanta per il provediment medical da basa da la populaziun en noss chantun. En il Grischun han 50 % da las medias e dals medis da chasa passa 50 onns. Cunzunt en las regiuns periferas e pauc populadas resulta il proxim temp il privel che las praticas vegnan serradas en consequenza da pensiunaments e da la mancanza d'ina successiun. Quai ha tant ina influenza per il provediment medical da basa ch'è orientà als pazients da la populaziun indigena en las valladas sco er per la tgira da las turistas e dals turists. Quest svilup ha er consequenzas per ils custs da sanadad, cunquai che las medias ed ils medis da chasa pon savens giuditgar e tractar meglier ils disturbis da sanadad grazia a l'assistenza cuntinuanta. Uschia vegnan evitadas entradas en l'ospital.
Il chantun Grischun ha gia instradà intgins pass per far frunt a la mancanza smanatschanta da medias e da medis da chasa (project Capricorn, Curriculum da la furmaziun supplementara per medias e medis da chasa en l'ospital chantunal dal Grischun). Tenor la lescha davart ils fatgs da sanadad èn la tgira locala da la sanadad publica e pia la garanzia dal provediment medical ambulant da la populaziun chaussas da las vischnancas (art. 12 al. 1). La problematica preschentada è dentant d'impurtanza chantunala. Perquai tschentan las sutsegnadras ed ils sutsegnaders las suandantas dumondas a la regenza:
• Tge mesiras concretas prevesa la regenza per garantir il provediment medical da basa er en territoris perifers e pauc populads?
• L'uniun grischuna da medias e da medis ha fatg ina cunvegna cun la regenza per garantir il servetsch d'urgenza medical. Datti ulteriuras mesiras che l'uniun pudess surpigliar?
• Quant enavant è la regenza pronta da sustegnair (finanzialmain, accumpagnament professiunal) las stentas da las valladas da tschertgar sistematicamain soluziuns regiunalas?
• Datti dal puntg da vista da la regenza la pussaivladad da far frunt a la mancanza smanatschanta dal provediment medical da basa en las regiuns periferas cun persunal da tgira spezialmain scolà en collavuraziun cun ils ospitals?
• Tge rolla duain ils ospitals regiunals surpigliar en l'avegnir per garantir il provediment medical da basa en las regiuns?
Cuira, ils 30 d'avust 2013
Lorez-Meuli, Märchy-Caduff, Hardegger, Albertin, Barandun, Baselgia-Brunner, Bezzola (Zernez), Blumenthal, Brandenburger, Buchli-Mannhart, Caluori, Casty, Casutt Renatus, Casutt-Derungs Silvia, Clalüna, Darms-Landolt, Dosch, Felix, Furrer-Cabalzar, Grass, Hartmann (Champfèr), Heinz, Holzinger-Loretz, Jeker, Jenny (Arosa), Kleis-Kümin, Koch (Tumein), Kollegger (Cuira), Komminoth-Elmer, Mani-Heldstab, Meyer-Grass, Michael (Donat), Niggli-Mathis (Grüsch), Noi-Togni, Papa, Pedrini, Peyer, Pfenninger, Stiffler (Tavau Plaz), Tomaschett (Breil), Tomaschett-Berther (Trun), Trepp, Troncana-Sauer, Vetsch (Pragg-Jenaz), Waidacher, Wieland, Bürgi-Büchel, Decurtins-Jermann, Gugelmann, Jenny-Marugg (Claustra Vitg), Monigatti, Pfister
Resposta da la regenza
Ils resultats da l'enquista ch'il departament da giustia, segirezza e sanadad ha fatg tar las vischnancas l'october 2012 en enclegientscha cun l'uniun grischuna da medias e da medis mussan, ch'il provediment medical ambulant è actualmain garantì en il Grischun. Malgrà quai dastgassi esser difficil en il futur d'occupar las praticas da medias e da medis che vegnan libras en regiuns perifericas e pauc populadas e pia da garantir il provediment medical ambulant sco er il servetsch d'urgenza tras las medias ed ils medis da chasa. Gist en regiuns turisticas e durant la stagiun auta èsi da quintar che la garanzia dal servetsch d'urgenza tras las medias ed ils medis chaschunia novas sfidas per il sectur da la sanadad.
Tenor l'art. 12 al. 1 da la lescha davart ils fatgs da sanadad èn cumpetentas las vischnancas per la tgira da la sanadad publica locala e per la garanzia dal provediment medical ambulant da la populaziun. Perquai èsi chaussa da las vischnancas e da las regiuns da daventar activas concernent la garanzia dal provediment medical ambulant regiunal. En il rom da sias pussaivladads ha il chantun concludì in'entira retscha da mesiras che duain gidar a garantir il provediment medical ambulant en las vischnancas.
La regenza respunda las dumondas sco suonda:
1. Las mesiras che la regenza ha gia inizià vegnan cuntinuadas (cunvegna cun l'uniun grischuna da medias e da medis per garantir il servetsch medical d'urgenza, indemnisaziun dal servetsch d'urgenza per medias e medis per garantir il servetsch medical d'urgenza, indemnisaziun dal servetsch d'urgenza per medias e medis ch'èn pertutgads surproporziunalmain dal servetsch d'urgenza, sustegn finanzial a favur da scolaziuns per dapli medias e medis generalists). Questas mesiras servan er al provediment cun medias e medis da chasa en regiuns perifericas e pauc populadas dal chantun. Ultra da quai pari raschunaivel da far in pass en direcziun d'in provediment da la sanadad integrà. L'enquista ch'è vegnida fatga l'october 2012 ha numnadamain mussà che la garanzia dal provediment da basa cun medias e medis da chasa a vista mesauna vegn classifitgada sco main problematica en regiuns che han in provediment da la sanadad integrà (sco per exempel l'Engiadina bassa).
2. Sin dumonda ha l'uniun grischuna da medias e da medis numnà sco mesiras pussaivlas l'installaziun d'ambulatoris centrals che vegnan manads da pliras medias e da plirs medis sco er l'utilisaziun da praticas da medias e da medis mobilas. Ultra da quai ha ella proponì da promover uras da consultaziun communablas da medias e da medis d'ospital e da chasa en l'ospital. Questas mesiras èn in pass en direcziun d'in provediment da la sanadad integrà.
3. La regenza s'engascha per garantir il provediment medical ambulant a maun da las mesiras generalas ch'èn menziunadas sut la cifra 1. Igl è chaussa da las vischnancas e da las regiuns – en collavuraziun cun las instituziuns localas dals fatgs da sanadad – da far pass concrets en direcziun d'in provediment da la sanadad integrà. En il rom da sias resursas da persunal è il chantun pront da porscher in accumpagnament professiunal a las partidas ch'èn involvidas en il process.
4. Pertutgà d'ina mancanza da persunal medicinal spezialisà n'è betg mo il sectur medical, mabain er il sectur da tgira. En spezial tar il persunal da tgira diplomà sa mussa medemamain ina stgarsezza. Pervia da questa situaziun n'empermetta la finamira, che persunal da tgira scolà spezialmain duai surpigliar prestaziuns dal provediment medical da basa, pauc success.
5. En regiuns cun ina mancanza da medias e medis che pratitgeschan en moda libra pudessan ils ospitals regiunals surpigliar en l'avegnir – en il rom da centers da sanadad regiunals – ina funcziun directiva per garantir il provediment da basa medical ambulant.
23 d’october 2013