Dumonda Pfenninger concernent la polluziun tras glisch dal stabiliment Realta
Sessiun: 24.04.2014
La problematica da la polluziun dal tschiel nocturn tras glisch, che resulta d'occurrenzas, ma er da fermas illuminaziuns permanentas, è vegnida tematisada ils ultims onns pli e pli savens en ils circuls d'expertas e d'experts ed er en las medias. Er il cussegl grond ha gia debattà en chaussa. Per motivs da surveglianza e da segirezza è ina illuminaziun correspundenta segiramain inditgada e necessaria en il sectur d'ina praschun. L'illuminaziun existenta en il sectur dal stabiliment Realta sto dentant franc vegnir designada sco problematica ord vista da l'effizienza da l'energia e da la polluziun tras glisch. Er en vista a l'edifizi nov ch'è planisà per engrondir il stabiliment sa tschentan differentas dumondas.
1. Vegni tegnì quint da la problematica da la polluziun tras glisch en connex cun l'edifizi nov ch'è previs per engrondir il stabiliment Realta ed en connex cun l'illuminaziun correspundenta?
2. Èsi – en connex cun l'edifizi nov – er planisà da sanar l'illuminaziun exteriura dals edifizis dal stabiliment existent?
3. Èsi previs d'optimar l'illuminaziun en il senn da l'effizienza da l'energia e da duvrar glischs LED?
4. Èsi er vegnì examinà da reducir l'intensitad da l'illuminaziun exteriura durant la notg resp. d'applitgar ina regulaziun moderna cun sensurs da moviment?
Cuira, ils 24 d'avrigl 2014
Pfenninger, Deplazes, Baselgia-Brunner, Bucher-Brini, Frigg-Walt, Gartmann-Albin, Jaag, Locher Benguerel, Peyer, Pult, Thöny, Trepp, Michel (Cuira), Monigatti
Resposta da la regenza
La regenza sa fatschenta regularmain cun dumondas da la durabilitad e dal tractament da las resursas cun quità, en spezial en connex cun projects da construcziun. Tematisadas vegnan er las consequenzas per l'ambient, sco la polluziun tras glisch. La regenza sa stenta da reducir la part d'emissiuns da glisch nungiavischadas tar tut las infrastructuras chantunalas, per che l'uman e la natira na vegnian uschenavant sco pussaivel betg donnegiads tras eventualas consequenzas nuschaivlas da la glisch. Tut las planisaziuns novas e tut las sanaziuns d'infrastructuras chantunalas ston ademplir autas pretensiuns envers l'effizienza energetica. Tar la realisaziun èsi dentant adina er da resguardar il diever specific da l'infrastructura respectiva sco er las pretensiuns specificas che vegnan fatgas en quest connex envers la segirezza ed envers il diever.
La regenza respunda las dumondas sco suonda:
1. En il rom dal dispositiv da segirezza necessari e resguardond l'effizienza energetica pretendida sco er il svilup tecnic s'occupa il concept general dal nov stabiliment er da la problematica da la polluziun tras glisch. Igl è previs da planisar il nov stabiliment tenor il standard MINERGIE-P-ECO. Quai vul dir ch'er l'illuminaziun e ses consum d'electricitad ston ademplir auts standards energetics. Sche l'incumbensa da segirezza ch'è colliada cun l'execuziun da chastis permetta quai, vegn il nov stabiliment perquai realisà applitgond en spezial las recumandaziuns da l'uffizi federal d'ambient, guaud e cuntrada (UFAGC) per evitar emissiuns da glisch.
2. Na. In'eventuala sanaziun da l'illuminaziun exteriura existenta dal stabiliment Realta vegn examinada en il rom da las mesiras da mantegniment e da reparatura ordinarias. Opziuns d'optimaziun en consequenza da novas tecnologias e da prescripziuns legalas vegnan dal rest examinadas regularmain en ils secturs "grevezza per l'ambient" e "schanetg da las resursas".
3. Ina illuminaziun LED per las vias enturn il stabiliment existent è previsa ed è gia vegnida messa sin il preventiv 2015 da l'uffizi da construcziun auta. Las pussaivladads d'applitgar en moda raschunaivla glischs LED tar il nov stabiliment vegnan examinadas en il rom da la planisaziun detagliada e resguardond aspects da segirezza.
4. Vi da l'illuminaziun exteriura dal stabiliment Realta hai dà en il passà gia differentas mesiras d'optimaziun per reducir emissiuns negativas. Uschia vegn ella reglada dapi in tschert temp cun agid d'in apparat da programmar sco er d'in sensur che reagescha, sch'i vegn cler resp. stgir. Plinavant vegn l'illuminaziun exteriura stizzada da las 00.00 fin las 05.00. En situaziuns problematicas u en cas d'urgenza vegn ella envidada automaticamain. Gia il mars 2011 èn 15 glischs d'alogen da 1500 watts vegnidas remplazzadas tras lampas a vapur metallicas da 250 watts. Tut tenor las pretensiuns da segirezza e tut tenor il tip da l'illuminaziun pertutgada vegnan duvrads sensurs da moviment en differents lieus dal stabiliment Realta. Per motivs tecnics e da segirezza n'è ina regulaziun generala tras sensurs da moviment betg realisabla.
En il rom dal concept general dal nov stabiliment sto l'illuminaziun exteriura medemamain vegnir tematisada, ed ella sto vegnir examinada pervia dals aspects tecnics e da segirezza e resguardond in consum d'energia uschè bass ed ina polluziun tras glisch uschè pitschna sco pussaivel.
2 da fanadur 2014