Sco mesira per cumbatter la mancanza smanatschanta da medias e da medis dal provediment medicinal da basa ha il departament da giustia, segirezza e sanadad fatg l'onn 2010 – per incumbensa da la regenza – ina consultaziun tar in sboz per ina revisiun parziala da la lescha da sanadad. Tras questa revisiun parziala dueva vegnir abolì il sistem da l'autodispensaziun restrenschida, ch'era vegnì introducì en il chantun l'onn 1984.

L'evaluaziun da la consultaziun ha mussà il suandant maletg:

La PCD e la PPS èn stadas cunter in'aboliziun da la restricziun da l'autodispensaziun tras las medias ed ils medis. La PLD ha giavischà da sistir il project, fin ch'i saja cler, tge che capitia sin plaun federal cun la revisiun planisada da la lescha davart ils products terapeutics areguard l'autodispensaziun tras las medias ed ils medis. La PS ha gì intgins dubis areguard l'avertura totala per l'autodispensaziun tras las medias ed ils medis. Mo l'uniun democratica federala e la PBD han sustegnì la nova regulaziun proponida. Las vischnancas cun in'apoteca han per gronda part refusà da dar liber l'autodispensaziun, perquai ch'ellas temevan che l'apoteca dal lieu serria lura sias portas. Las vischnancas pli pitschnas, che n'eran da princip betg pertutgadas da la nova regulaziun planisada, èn plitgunsch stadas per in'aboliziun da la restricziun da l'autodispensaziun. Sin basa da l'evaluaziun da las respostas da la consultaziun – che ha mess en discussiun l'aboliziun da la restricziun da l'autodispensaziun tras las medias ed ils medis, ch'è reglada en la lescha da sanadad – ha la regenza stuì partir dal fatg ch'ina tala aboliziun na chattia betg ina maioritad. Cun il conclus dals 12 d'october 2010 (prot. nr. 888) ha la regenza – en appreziaziun dal resultat da la consultaziun – decidì da desister ad interim d'elavurar in project da revisiun correspundent per mauns dal cussegl grond.

La regenza respunda las dumondas tschentadas sco suonda:

1. Cifras davart la differenza d'entradas d'ina pratica medicala cun e senza autodispensaziun n'èn betg disponiblas. Grisomed stima che la differenza d'entradas tranter ina pratica medicala cun autodispensaziun ed ina pratica cun autodispensaziun restrenschida (emprima consegna) correspundia ad ina bassa summa da tschintg cifras per onn. Medias e medis senza restricziun da l'autodispensaziun stiman ch'els hajan 10 fin 20 pertschient dapli entradas tras la vendita da medicaments.

2. Tenor la regenza ha la restricziun dal dretg d'autodispensaziun consequenzas plitgunsch pitschnas per il dumber da medias e da medis da famiglia en il chantun. Praticas da medias e da medis da chasa che na chattan nagina successiun èn per ordinari situadas en territoris, nua che l'autodispensaziun n'è betg restrenschida.

3. Sin basa dal resultat da la consultaziun da l'onn 2010 parta la regenza dal fatg che l'aboliziun da la restricziun da l'autodispensaziun tras las medias ed ils medis, ch'è reglada en la lescha da sanadad, na chattia betg ina maioritad. Senza incarica dal cussegl grond na vesa la regenza perquai nagins motivs d'al suttametter in sboz per abolir en la lescha da sanadad la restricziun dal dretg d'autodispensaziun da las medias e dals medis.

4. Tge consequenzas finanzialas ch'ina aboliziun da la restricziun dal dretg d'autodispensaziun da las medias e dals medis ha per las apotecas, dependa da la dumonda quant gronda che la svieuta da medicaments prescrits da las medias e dals medis è en cumparegliaziun cun la svieuta totala. Il chantun na dispona betg da cifras concretas en chaussa. Tenor las indicaziuns da la federaziun grischuna d'apotecras ed apotechers importa la quota da svieuta dals medicaments che dovran in recept da la media u dal medi, circa 70 pertschient. Percunter crudass davent l'obligaziun da las apotecas da mantegnair di e notg in servetsch d'urgenza permanent per garantir il provediment farmaceutic da la populaziun.

3 da settember 2014