La revisiun da la lescha da taglia da l'onn 2009 ch'è entrada en vigur il schaner 2010, ha chaschunà, pervia da differentas deducziuns pussaivlas da la taglia, intginas reducziuns da las premias da las cassas da malsauns che na pon incontestadamain betg vegnir motivadas ord vista da la politica sociala. La missiva da la regenza per curreger questas consequenzas, che pertutgan cunzunt la classa mesauna, ha il cussegl grond approvà unanimamain l'avust 2013.
Sin la dumonda Trepp dals 22 d'october 2013 n'ha la regenza betg dà ulteriuras infurmaziuns davart las consequenzas supplementaras da la revisiun da la lescha da taglia da quella giada. Ella ha argumentà che la resposta da las dumondas tschentadas chaschunia memia blera lavur ed ha renvià a la pussaivladad d'inoltrar ina incumbensa.
Ina incumbensa da deputà Peyer cun la pretensiun da meglierar la situaziun da las datas statisticas dal chantun è vegnida acceptada dal cussegl grond cun gronda maioritad l'october 2012. I sto bain er esser en l'interess dal departament da finanzas da far controllas dal success da las revisiuns da la lescha da taglia e d'analisar ils effects, negativs e positivs, sco er da metter a disposiziun ils resultats correspundents a la populaziun.
Per survegnir ina survista cumplessiva e per avair la transparenza necessaria èn dentant indispensablas cifras davart l'effect fiscal da la revisiun da la lescha da taglia 2009 per entradas autas, mesaunas e bassas e per persunas giuridicas sco er davart las perditas da taglia per il chantun e per las vischnancas. Questas consequenzas che vegnan resentidas sco negativas d'ina gronda part da la populaziun èn bler pli voluminusas ed impurtantas che quellas che han chaschunà reducziuns da las premias da la cassa da malsauns e che na pon betg vegnir motivadas ord vista da la politica sociala.
Las sutsegnadras ed ils sutsegnaders supplitgeschan perquai la regenza da suttametter la revisiun da la lescha da taglia 2009 ad in'analisa dals effects e da respunder tranter auter las dumondas ch'èn gia vegnidas tschentadas ils 10 da december 2013:
1. Quant grondas èn las perditas da taglia annualas per ils onns 2010 fin 2013 da persunas natiralas e giuridicas dapi l'entrada en vigur da la refurma da la lescha da taglia da l'avust 2009 per las vischnancas e per il chantun? Las perditas per las 10 vischnancas las pli grondas duain vegnir inditgadas en moda separada.
2. Quant gronda è la reducziun da taglia annuala en media per ils onns 2010 fin 2013 per entradas da passa 300 000 francs, da passa 150 000 francs e da passa 80 000 francs sco er da sut 80 000 francs?
Cuira, ils 13 da zercladur 2014
Trepp, Baselgia-Brunner, Bucher-Brini, Frigg-Walt, Gartmann-Albin, Jaag, Locher Benguerel, Müller (Tavau Plaz), Peyer, Pfenninger, Pult, Thöny, Deplazes, Hensel, Monigatti
Resposta da la regenza
L'incumbensa pretenda cifras davart las consequenzas finanzialas da la revisiun parziala da la lescha da taglia dal zercladur 2009. Las perditas da taglia duain vegnir eruidas per ils onns fiscals 2010 fin 2013 per il chantun e per la totalitad da las vischnancas sco er per las 10 vischnancas las pli grondas, e quai en differentas categorias d'entradas.
Cun la revisiun parziala 2009 èn vegnidas midadas fitg bleras disposiziuns ed èn vegnidas fatgas differentas adattaziuns al dretg federal armonisà. Essenzialmain ha la revisiun cumpiglià las suandantas posiziuns:
- gulivar la progressiun fraida gia tar ina divergenza da 3 pertschient;
- augmentà las deducziuns per uffants e l'import maximal dals custs da la tgira d'uffants ch'èn deducibels;
- reducì la tariffa maximala da la taglia sin la facultad ed augmentà ils imports libers da taglia;
- reducì la tariffa da la taglia sin il gudogn che ha la tariffa maximala da 7 pertschient sin la tariffa proporziunala da la taglia sin il gudogn da 5,5 pertschient;
- introducì la denunzia da sasez nunchastiabla;
- transferì la refurma da l'imposiziun da taglia sin interpresas II en il dretg chantunal
. fatgs da suspensiun en cas d'ina prelevaziun privata, affittaziun e partiziun d'ierta,
. introducziun dal princip da l'apport da chapital,
. liquidaziun privilegiada, sch'i croda davent l'activitad da gudogn independenta.
Cun la gulivaziun da la progressiun fraida vegni impedì che las entradas ch'èn pli autas mo pervia da la chareschia chaschunian ina grevezza fiscala procentualmain pli auta e che las deducziuns vegnian relativadas da la chareschia. Questa indexaziun pertutga quasi tut ils imports fixads en francs en la lescha da taglia inclusiv las tariffas progressivas da taglia. La gulivaziun da la progressiun fraida n'ha betg per consequenza che las relaziuns da grevezza vegnan spustadas; ella serva però ad impedir spustaments da las grevezzas. Sch'ins calculass las perditas chaschunass quai enorm blera lavur, senza ch'i dess in resultat expressiv. La regenza resguarda questa lavur sco betg raschunaivla e vegn a desister da tala. Las consequenzas da las deducziuns per uffants pli grondas e dals custs da la tgira d'uffants pli gronds, da la taglia sin la facultad midada (tariffa ed imports libers da taglia) e da la tariffa da la taglia sin il gudogn pli bassa pon vegnir calculadas. Las consequenzas finanzialas da la denunzia da sasez nunchastiabla na pon betg vegnir calculadas, perquai ch'ins na sa betg tge cas che fissan vegnids chattads senza denunzia persunala e tge taglias penalas ch'avessan pudì vegnir incassadas. Las consequenzas da la refurma da l'imposiziun da taglia sin interpresas II na pon betg vegnir quantifitgadas. En connex cun ils fatgs da suspensiun da taglia na va il substrat da taglia betg a perder; el vegn simplamain registrà pli tard. Il princip d'apport da chapital chaschuna che apports da chapital anteriurs pon vegnir pajads enavos senza taglias e na vegnan betg distribuids sco dividenda. Questas restituziuns d'apports da chapital na cumparan betg en las actas fiscalas, uschia che las entradas pli pitschnas na pon betg vegnir eruidas. Las perditas da la liquidaziun privilegiada ch'è stringenta tenor il dretg federal, stuessan vegnir calculadas en il cas singul. La regenza è da l'avis che quai na saja betg realisabel.
Las consequenzas duain vegnir eruidas per ils onns fiscals 2010 fin 2013. L'onn fiscal 2013 na po dentant anc betg vegnir calculà; ina quantitad da datas suffizienta dastgass esser avant maun pir mez 2015. Las consequenzas duain vegnir eruidas per differentas gruppas d'entrada; la regenza parta dal fatg che las entradas inditgadas en la dumonda 2 manegian las entradas bruttas. Las calculaziuns duain vegnir fatgas per la totalitad da las vischnancas sco er separadamain per las 10 vischnancas las pli grondas. Per definir la grondezza da las vischnancas vegni sa basà sin il dumber da la populaziun.
La regenza è pronta d'acceptar questa incumbensa en la dimensiun descritta. Ils resultats vegnan publitgads fin la fin da november 2014 sin la pagina d'internet da l'administraziun da taglia.
15 agosto 2014