La midada da la lescha federala davart la protecziun da las auas (LPAuas, art. 36a) e da l'ordinaziun respectiva (OPAuas, art. 41a al. 2) areguard il spazi d'auas chaschuna difficultads per bleras vischnancas. Ultra da quai vegn il svilup architectonic disturbà talmain en tscherts cas, ch'i resultan er donns economics per las proprietarias ed ils proprietaris dals bains immobigliars pertutgads.
Tenor l'art. 41a al. 2 OPAuas sto la ladezza dal spazi d'auas importar almain:
a) per auas currentas cun in fund dal letg da main che 2 m ladezza natirala: 11 m;
b) per auas currentas cun in fund dal letg da 2 fin 15 m ladezza natirala: 2,5 giadas la ladezza dal fund dal letg plus 7 m;
Tenor ina disposiziun transitorica da la OPAuas 1) fixeschan ils chantuns ultra da quai il spazi d'auas tenor l'art. 41a OPAuas fin ils 31 da december 2018 e 2) fin ch'els n'han anc betg fixà il spazi d'auas, èsi scumandà da construir edifizis per lung da las auas (cun resalva d'excepziuns d'interess public) sin ina strivla d'omaduas varts d'ina ladezza da mintgamai:
a) 8 m plus la ladezza dal fund dal letg existent en cas d'auas currentas cun in fund dal letg fin a 12 m ladezza;
b) 20 m en cas d'auas currentas cun in fund dal letg existent da passa 12 m ladezza;
c) 20 m en cas d'auas stagnantas cun ina surfatscha da l'aua da passa 0,5 ha.
Fin che las autoritads cumpetentas han determinà il spazi d'auas (termin fin ils 31 da december 2018) è quel fixà tenor la disposiziun transitorica ch'è menziunada qua survart.
Dumondas:
1. Co giuditgescha la regenza la situaziun ch'è resultada pervia da la midada da las disposiziuns federalas menziunadas qua survart, en spezial da l'art. 41a al. 2 OPAuas e da las disposiziuns transitoricas?
2. È la regenza er da l'avis che la realisaziun da las disposiziuns menziunadas qua survart disturban considerablamain il svilup architectonic en bleras regiuns da noss chantun, en spezial en quellas valladas, nua che las auas currentas sa chattan en vischinanza da bains immobigliars surbajegiabels?
3. È la regenza er da l'avis che la noziun "auas currentas" è memia pauc precisa e che en tscherts cas (p.ex. chanals pitschens u sientads or – cun excepziun da periodas cun precipitaziuns fermas) èn giustifitgadas excepziuns?
Cuira, ils 9 da december 2014
Rosa, Pedrini, Fasani, Alig, Atanes, Blumenthal, Bondolfi, Burkhardt, Caduff, Casanova (Glion), Casanova-Maron (Domat), Casutt-Derungs, Caviezel (Tavau Clavadel), Clalüna, Claus, Crameri, Danuser, Darms-Landolt, Davaz, Della Vedova, Dosch, Engler, Felix (Scuol), Foffa, Giacomelli, Gunzinger, Hardegger, Hartmann, Heiz, Hitz-Rusch, Holzinger-Loretz, Hug, Jeker, Jenny, Joos, Kasper, Koch (Igis), Komminoth-Elmer, Kunz (Fläsch), Kunz (Cuira), Kuoni, Lamprecht, Lorez-Meuli, Michael (Donat), Michael (Castasegna), Monigatti, Müller, Nay, Niederer, Niggli (Samedan), Niggli-Mathis (Grüsch), Noi-Togni, Papa, Paterlini, Pfäffli, Salis, Sax, Schutz, Steck-Rauch, Steiger, Stiffler (Cuira), Tenchio, Thomann-Frank, Tomaschett-Berther (Trun), Toutsch, Troncana-Sauer, Valär, Vetsch (Pragg-Jenaz), Waidacher, Weber, Widmer-Spreiter, Wieland, Cahenzli (Trin Mulin), Heini, Tuor
Resposta da la regenza
1. Las disposiziuns transitoricas tar la midada dals 4 da matg 2011 da l'ordinaziun federala davart la protecziun da las auas dals 28 d'october 1998 (OPAuas; CS 814.201) èn applitgablas immediatamain dapi ch'ellas èn vegnidas relaschadas. Il cussegl federal ha formulà las disposiziuns cuntegnidas conscientamain uschia, ch'il basegn da spazi è en blers cas pli grond ch'ils spazis d'auas che ston vegnir fixads definitivamain en la planisaziun d'utilisaziun. Questa proposta duai servir a las vischnancas sco impuls per fixar ils spazis d'auas uschè svelt sco pussaivel, però il pli tard fin la fin da l'onn 2018. Per obtegnair ina segirezza da planisaziun, recumonda la regenza a las vischnancas da fixar immediatamain ils spazis d'auas en la planisaziun d'utilisaziun.
Dal rest ha il chantun Grischun – sin basa da l'art. 21 da l'ordinaziun davart la correcziun dals curs d'aua dals 2 da november 1994 (OCCA; CS 721.100.1) – gia determinà ina giada il basegn dal spazi d'auas per ils flums gronds. L'art. 78 al. 2 da la lescha davart la planisaziun dal territori per il chantun Grischun dals 6 da december 2004 (LPTGR; DG 801.100) prevesa ultra da quai ina distanza da las auas per edifizis e stabiliments, che sto vegnir observada. Il basegn da spazi calculà e las regulaziuns davart las distanzas eran per part bler pli gronds ch'en las novas disposiziuns.
2. Tenor la lescha davart la planisaziun dal territori per il chantun Grischun han las vischnancas stuì definir lingias da distanza da las auas gia avant las midadas da la legislaziun davart la protecziun da las auas. Là nua che quellas mancavan, ha stuì vegnir observada ina distanza da las auas definida per edifizis e stabiliments. Las novas disposiziuns obligheschan las vischnancas da fixar ils spazis d'auas en la planisaziun d'utilisaziun fin la fin da l'onn 2018. En connex cun fixar ils spazis d'auas datti ina tscherta flexibilitad (p.ex. reducziun dal spazi d'auas en territoris surbajegiads fermamain u spustaments laterals). Entaifer ils territoris d'abitadi na chaschunan las novas disposiziuns davart la protecziun da las auas nagins disturbis considerabels per il svilup architectonic da las vischnancas. Ultra da quai vala la garanzia dal possess actual. La fixaziun definitiva dals spazis d'auas en la planisaziun d'utilisaziun dat a las vischnancas la segirezza da planisaziun. I na dastga però betg vegnir exclus ch'en cas singuls vesessan projects da construcziun cunzunt ordaifer las zonas da construcziun e per lung d'auas or auter senza las novas disposiziuns davart la protecziun da las auas.
3. La noziun auas currentas u "aua sur terra" è definida en l'art. 4 lit. a da la lescha federala davart la protecziun da las auas dals 24 da schaner 1991 (LPAuas; CS 814.20). Il rapport explicativ dals 20 d'avrigl 2011 e l'art. 41a al. 5 da l'ordinaziun davart la protecziun da las auas cuntegnan prescripziuns davart las auas currentas che ston vegnir resguardadas e fixeschan sut tge cundiziuns ch'i po vegnir desistì da determinar il spazi d'auas. I po vegnir desistì da determinar il spazi d'auas en cas d'auas currentas pitschnas che na figureschan betg en la charta naziunala 1:25 000, sche nagins interess predominants na s'opponan a quai. I sto però vegnir garantì en mintga cas che las auas possian ademplir lur funcziuns natiralas tenor l'art.36a LPAuas. Il mussavia davart la determinaziun dal spazi d'auas en il Grischun ch'è vegnì elavurà da l'uffizi per la natira e l'ambient en collavuraziun cun auters uffizis resumescha questa basa e renda attent ils biros da planisaziun e las vischnancas a la metodica, co ch'ils spazis d'auas ston vegnir fixads en la planisaziun d'utilisaziun.
19 da favrer 2015