Durant la stagiun auta transporta la Viafier retica mintga di passa 1000 persunas da l'Engiadina vers sid sur il pass dal Bernina. Lunschor la gronda part dals viagiaturs sorta dal tren pir a la staziun finala a Tirano en Italia e mangia er là. Il motiv da quest cumportament dals giasts, ch'è s'augmentà marcantamain ils ultims 15 onns, è tranter auter il marketing da la Viafier retica. La gronda part dals prospects e placats, l'internet ed auters meds da communicaziun vendan cunzunt la destinaziun Tirano; Puschlav, Le Prese e Brusio vegnan per gronda part negligids. Sco exempel saja citada qua mo la pagina d'internet da la Viafier retica, nua che la charta da survista da la rubrica "Bernina express" mussa mo ina staziun tranter San Murezzan e Tirano, numnadamain l'Alp Grüm – ed en il text vegni fatg reclama mo per la Vuclina.
Represchentants da la branscha turistica dal Puschlav han gia gì plirs discurs cun las persunas responsablas da la Viafier retica, e quai sin differents plauns. Els beneventan bain la tenuta constructiva da la Viafier retica envers la val, en spezial las investiziuns previsas en l'infrastructura da viafier, èn dentant dischillusiunads pervia dal marketing dal Puschlav, ch'è anc adina insuffizient cumpareglià cun quel da Tirano. Er Puschlav e Le Prese pon porscher bler tant en reguard cultural, turistic sco er culinaric, pon dentant exaurir memia pauc il potenzial da las excursiuns d'in di da la Viafier retica.
Perquai dumondan las sutsegnadras ed ils sutsegnaders la regenza il suandant:
1. En tge dimensiun (CHF e %) sa participeschan la confederaziun ed il chantun a la finanziaziun da la Viafier retica?
2. En tge dimensiun sa participeschan la citad da Tirano, la regiun Lumbardia u il stadi talian?
3. Quants viagiaturs ha la Viafier retica transportà da l'Engiadina a) a Puschlav e b) a Tirano ils mais da matg fin october 2012, 2013, 2014 e 2015, e quants viagiaturs eran quai l'onn 2000? Quants per onn?
4. Sustegna la regenza la strategia da la Viafier retica da commerzialisar il traject dal Bernina principalmain cun la destinaziun Tirano?
Cuira, ils 20 d'october 2015
Heiz, Della Vedova, Monigatti, Aebli, Alig, Blumenthal, Bucher-Brini, Buchli-Mannhart, Burkhardt, Cahenzli-Philipp (Vaz sut), Caluori, Casutt-Derungs, Clalüna, Claus, Crameri, Darms-Landolt, Deplazes, Engler, Fasani, Felix (Scuol), Giacomelli, Gunzinger, Hardegger, Hartmann, Hitz-Rusch, Holzinger-Loretz, Jaag, Jenny, Joos, Kasper, Koch (Tumein), Kollegger, Kunfermann, Kunz (Cuira), Lamprecht, Lorez-Meuli, Märchy-Caduff, Marti, Michael (Donat), Michael (Castasegna), Müller, Nay, Niederer, Niggli (Samedan), Papa, Paterlini, Pedrini, Perl, Salis, Steck-Rauch, Steiger, Stiffler (Tavau Plaz), Thomann-Frank, Tomaschett-Berther (Trun), Troncana-Sauer, Valär, Vetsch (Claustra Vitg), Vetsch (Pragg-Jenaz), Weber, Weidmann, Wieland, Zanetti, Altmann, Antognini, Cajacob, Tanner, Wellig
Resposta da la regenza
Tar la dumonda 1: Tenor la cunvegna d'indemnisaziun 2015 cun la Viafier retica
sa participeschan la confederaziun ed il chantun cun totalmain 71,3 milliuns francs als custs da gestiun betg cuvrids en la sparta "traffic". Da quai derivan 55,2 milliuns francs da la confederaziun e 16,1 milliuns francs dal chantun. L'indemnisaziun
da la lingia dal Bernina importa 11,5 milliuns francs. Da quai surpiglia il chantun 2,9 milliuns francs. Vitiers vegnan las indemnisaziuns da circa 170 milliuns francs
en la sparta "infrastructura", a la quala la confederaziun ed il chantun pajan ina contribuziun dad 85% resp. 15%.
Tar la dumonda 2: Ni la citad da Tirano ni la Lumbardia ni il stadi talian na sa participeschan a la finanziaziun da la gestiun u da l'infrastructura da la lingia dal Bernina da la Viafier retica.
Tar la dumonda 3: Sin fundament da las datas disponiblas n'èsi betg pussaivel da far indicaziuns detagliadas en la furma giavischada. La Viafier retica registrescha las persunas ch'entran e che sortan dals trens ubain automaticamain a las staziuns ubain tras quai ch'ils accumpagnaders dals trens dumbran ils passagiers sin trajects definids. Plinavant fan las Viafiers federalas svizras in model naziunal dal traffic da viafier sin basa da las enquistas da passagiers en ils trens. Uschia pon vegnir fatgas indicaziuns davart ils currents dal traffic sco er davart las persunas ch'entran e che sortan dals trens. Qua sa tracti dentant da valurs medias annualas che n'èn betg dal tuttafatg precisas. Plinavant è il model vegnì repassà en il fratemp. Er na stattan betg a disposiziun datas per tut ils onns.
La Viafier retica parta dal fatg che la repartiziun da las persunas ch'entran e che sortan dals trens sin il traject Puschlav – Tirano saja stada constanta ils ultims 15 onns.
Tar la dumonda 4: La Viafier retica na persequitescha betg ina strategia che collia las mesiras da marketing da la lingia dal Bernina principalmain cun la destinaziun Tirano. Il cuntrari: Per la lingia da l'Alvra e dal Bernina, che fa part dal patrimoni mundial da l'UNESCO, vegni investì fitg bler en la furmaziun dal product ed en la commerzialisaziun. Igl è dentant la natira da la chaussa che las staziuns "sin il traject" survegnan ina percepziun pli profunda en la communicaziun. Plinavant mussan las experientschas ch'igl èn – per blers passagiers – elements essenzials dal viadi dad ir cun il tren sur il viaduct circular a Brusio e da passar sur il cunfin talian, ed els vulessan perquai viagiar sin l'entir traject. Las persunas responsablas per il marketing tar la Viafier retica han in grond interess da collavurar cun la regiun Valposchiavo. Uschia finanziescha la Viafier retica – ensemen cun Grischun vacanzas – per exempel il project EnAvant cun l'intent da promover spezialmain la dumonda en il Puschlav durant l'atun e durant l'enviern. Er cun la commerzialisaziun da l'UNESCO (app, guid, via "Alvra Bernina", lieu d'aventura "Bernina Glaciers") s'engascha la Viafier retica fermamain per il Puschlav. Sin la pagina d'internet vegnan descrittas en moda excellenta las staziuns "sin il traject". Medemamain vegni rendì attent a la gastronomia a Puschlav u a Le Prese. Ils passagiers na vegnan dentant betg manads en emprima lingia tras la Viafier retica a las destinaziuns da lur giavischs, mabain tras las purschidas da las destinaziuns. La regenza è en general da l'avis che la Viafier retica saja ina partenaria impurtanta per il turissem en il Grischun, tras quai ch'ella procura ch'ils giasts arrivan cun la viafier en lur destinaziuns resp. ch'i vegnan concepidas dapli purschidas turisticas che permettan d'arrivar cun la viafier u cun il bus en las destinaziuns. Ella sustegna las mesiras da la Viafier retica che resguardan questa concepziun.
11 da december 2015