La regenza ha ademplì l'incumbensa Casanova-Maron concernent ina nova calculaziun da las pauschalas per la scola regulara (inoltrada ils 5 da december 2013) en il rom da la missiva tar il quint annual 2015. Per consequenza ha il cussegl grond stritgà l'incumbensa cun 115 cunter 0 vuschs. En la missiva (p. 37) ha la regenza menziunà ch'igl èn vegnids eruids custs supplementars da totalmain 25,6 milliuns francs sin basa da la nova lescha da scola. Suenter la realisaziun da la refurma da la gulivaziun da finanzas en il chantun Grischun (refurma da la GF) è la part dal chantun 15,9 milliuns francs, quella da las vischnancas importa 9,7 milliuns francs. Ultra da quai è la participaziun dal chantun vi dals custs da las vischnancas per l'instrucziun d'uffants da lingua estra vegnida augmentada per 2,1 milliuns francs en il rom da la refurma da la GF. Per las vischnancas resultan pia custs supplementars da totalmain 7,6 milliuns francs (chantun: 18 milliuns francs). Quests custs supplementars ha la regenza confruntà cun las valurs prognostitgadas da quellas uras. In'ulteriura analisa orientada al passà dals custs supplementars ch'èn sa mussads e da las differenzas envers las valurs planisadas quella giada na faschess nagin senn resp. na purtass naginas novas enconuschientschas.

Areguard ils custs supplementars effectivs da la revisiun totala sa laschan menziunar oravant tut ils suandants facturs: adattaziun da la salarisaziun minimala per 1,3 % (pedagogia speziala sin il stgalim primar) fin 7,3 % (scolina) per tut ils salaris fin 154 % (cuntrari a la proposta da la regenza per in salari maximal da 142 %), reducziun dal pensum cumplain da tut las persunas d'instrucziun per ina lecziun per emna sco er supplementarmain per in'ulteriura lecziun per persunas d'instrucziun da classa, introducziun da las ulteriuras structuras dal di ed (en ina dimensiun pli pitschna) introducziun da las uras da bloc, reducziun da las grondezzas maximalas da las partiziuns sco er augment da la dotaziun minimala da lecziuns purschidas en scolina sin 20 uras per emna.

En quest connex stoi vegnir resguardà che las instituziuns ch'èn responsablas per la scola èn pertutgadas finanzialmain per differents motivs ed en moda differentamain ferma da las novaziuns da la revisiun totala, e quai pervia da las cundiziuns generalas che sa differenzieschan fermamain resp. pervia da la gronda eterogenitad. Las consequenzas che resultan da l'adattaziun da la salarisaziun minimala per exempel dependan dal nivel effectiv dals salaris che surpassa eventualmain la prescripziun minimala sco er da la structura da vegliadetgna da las persunas d'instrucziun, damai che la curva dals salaris n'è betg lineara. Ils custs supplementars che resultan da la reducziun dal pensum cumplain da las persunas d'instrucziun dependan fermamain da las cumposiziuns da las classas. E tar las ulteriuras structuras dal di devi il mument da l'entrada en vigur differenzas considerablas areguard las purschidas. Er pajan bleras instituziuns ch'èn responsablas per la scola en quest sectur voluntarmain contribuziuns pli autas che quellas che vegnan pretendidas da la lescha. Eventualas mesiras per reducir ils custs na chaschunassan per ils motivs menziunads betg l'effect giavischà tar tut las instituziuns ch'èn responsablas per la scola, reducissan però tut en tut levamain la part da las expensas per la furmaziun. Quella importa per il chantun e per las vischnancas totalmain bundant 16 % da las expensas totalas e n'è strusch sa midada ils ultims 10 onns. En cumparegliaziun cun ils auters chantuns è questa part fitg bassa. Il chantun Grischun è pia – tut tenor la calculaziun – sin ina da las ultimas plazzas centralas ubain schizunt a la fin. Cun mesiras per reducir ils custs en il sectur da la scola populara sa reduciss questa part anc ina giada senza l'integraziun d'in program da distgargia cumplessiv. Tenor l'avis da la regenza indebliss quai il sectur da furmaziun en moda unilaterala.

Mesiras concretas en il sectur da la scola populara duain – sche necessari – vegnir elavuradas e proponidas en il rom d'in program da distgargia cumplessiv. In'analisa correspundenta revelass – uschenavant sco pussaivel – ils chaschunaders da custs relevants. Quai independentamain da la basa legala e dals custs supplementars da l'ultima revisiun totala da la lescha da scola. En quest connex stuessan vegnir registrads er quels facturs che han chaschunà expensas supplementaras independentamain da la legislaziun vertenta. Il departament da finanzas e vischnancas vegn a far – consultond l'institut BAK Basel Economics SA – in'analisa cumplessiva da la structura dals custs dal chantun inclusiv da las vischnancas. Questa analisa duai cumpigliar tut ils champs d'incumbensas. In program da spargn mo per la scola populara na sa laschass betg giustifitgar tenor la regenza. Il proceder per quest program ha il cussegl grond discutà, fixà ed acceptà cun l'incumbensa Kunz (Cuira) concernent l'examinaziun da las incumbensas e da las prestaziuns ils 20 d'avrigl 2016 en il senn da la regenza.

Per ils motivs menziunads propona la regenza da refusar questa incumbensa.

24 d'avust 2016