Navigation

Inhaltsbereich

Dumonda Tomaschett (Breil) concernent plazzas da lavur da l'armada svizra en il Grischun

Sessiun: 18.10.2016

Tar l'armada svizra datti midadas. Pli baud era l'armada organisada en moda fitg decentrala ed aveva ina gronda impurtanza economica per noss chantun e per nossas regiuns. Ils ultims onns è l'armada vegnida centralisada pli e pli fitg. L'armada svizra prenda plaun a plaun cumià da las regiuns da muntogna. Noss chantun Grischun è pertutgà zunt fitg da quest proceder. Sin ina dumonda en l'ura da dumondas da la sessiun d'october 2011 ha la regenza laschà protocollar: «La regenza vegn a far tut il pussaivel per che las plazzas da lavur actualas restian en il chantun.»

 

Per las sutsegnadras ed ils sutsegnaders sa tschentan las suandantas dumondas:

 

1. Co sa preschenta il svilup da las plazzas da lavur da l'armada svizra (en equivalents a temp cumplain) durant ils ultims 5 onns en il Grischun?

 

2. È er la regenza da l'avis che l'armada svizra saja sa suttamessa ils ultims onns ad ina tendenza da centralisaziun e da concentraziun ch'è zunt dolurusa per noss chantun?

 

3. Ha la regenza grischuna enconuschientschas dal fatg che l'armada svizra ha transferì ils ultims onns plazzas da lavur da noss chantun directamain u indirectamain en il center logistic da l'armada a Hinwil e ch'ella planisescha ulteriurs transferiments?

 

4. Tge vegn la regenza grischuna a far seriusamain, per ch'i na dettia nagins ulteriurs transferiments e per che las plazzas da lavur anc existentas da l'armada svizra restian a lunga vista en il Grischun?

 

Cuira, ils 18 d'october 2016

 

Tomaschett (Breil), Engler (Tavau Vitg), Bleiker, Albertin, Alig, Blumenthal, Bondolfi, Brandenburger, Bucher-Brini, Buchli-Mannhart, Burkhardt, Caduff, Caluori, Casty, Casutt-Derungs, Cavegn, Danuser, Darms-Landolt, Dosch, Epp, Fasani, Felix (Scuol), Florin-Caluori, Foffa, Gartmann-Albin, Giacomelli, Grass, Hartmann, Hug, Jeker, Jenny, Kasper, Kunfermann, Kunz (Fläsch), Kuoni, Lorez-Meuli, Märchy-Caduff, Michael (Donat), Müller, Niederer, Papa, Paterlini, Rosa, Salis, Sax, Schneider, Stiffler (Tavau Plaz), Stiffler (Cuira), Thomann-Frank, Tomaschett-Berther (Trun), Vetsch (Claustra Vitg), Zanetti, Cantieni, Ellemunter, Engler (Surava), Furrer, Nicolay, Pfister

Resposta da la regenza

La regenza respunda las dumondas sco suonda:

1. Ils scleriments tar il schef da l'armada han mussà che l'armada ha stritgà ils ultims 5 onns 2,5 equivalents da plazzas a temp cumplain en il Grischun, malgrà che ses effectiv è vegnì smesà. L'ulteriur svilup da l'armada na prevesia dentant betg da reducir ulteriuras plazzas. Actualmain existan 149,6 equivalents da plazzas a temp cumplain en il chantun Grischun. Questa tendenza vegn er cumprovada dal concept da staziunament actual che na prevesa nagina ulteriura reducziun d'infrastructuras militaras e da las plazzas da lavur respectivas per il chantun Grischun. Quai cuntrari a numerus auters chantuns che han stuì tolerar ina reducziun d'infrastructuras e da plazzas da lavur da fin 30 pertschient.

2. En vista a la smesada da l'effectiv reglamentar a 100 000 umens, ch'è vegnida annunziada en connex cun l'ulteriur svilup da l'armada, ed en vista a la reducziun simultana da las plazzas d'instrucziun e da tir è la regenza stada conscienta dal fatg ch'i resultia qua tras ina tscherta reducziun da plazzas da lavur. Correspundentamain è la regenza s'engaschada gia l'onn 2013 tar il departament federal da defensiun, protecziun da la populaziun e sport, per ch'il chantun Grischun restia schanegià da mesiras da spargn infrastructuralas en il rom da l'ulteriur svilup da l'armada. La reducziun da plazzas è tut en tut restada en il rom en il chantun Grischun.

Sco menziunà en la resposta 1 na prevesa l'armada betg da reducir ulteriuras plazzas en il chantun Grischun en connex cun l'ulteriur svilup da l'armada. Il rapport da l'armada 2010 e l'ulteriur svilup da l'armada che resulta en quest connex, na vul betg centralisar, mabain regiunalisar l'armada. Las unitads duain daventar pli pitschnas, uschia ch'ils curs da repetiziun pon puspè vegnir organisads pli savens en las regiuns.

3. Tenor l'infurmaziun dal schef da l'armada hai dà ils ultims 5 onns in augment da 15,3 equivalents da plazzas a temp cumplain a Hinwil. Ma la retschertga mussia ch'i n'haja dà nagin spustament a quint da las plazzas da lavur en il chantun Grischun. Il schef da l'armada conceda dentant ch'in spustament da plazzas singulas saja da princip adina pussaivel, perquai che l'armada stoppia agir en moda flexibla er en il sectur dal management da persunal per pudair cuntanscher sias finamiras.

4. Sco gia ils ultims onns vegn la regenza grischuna a tschertgar ed a tgirar il contact cun il schef dal departament federal da defensiun, protecziun da la populaziun e sport, cun il schef da l'armada e cun il schef da l'armament. Quests contacts, ma er la surpigliada dal vicepresidi da la conferenza da las regenzas en fatgs da militar, da protecziun civila e da pumpiers tras il schef dal departament da giustia, segirezza e sanadad e las scuntradas annualas cun uffiziers grischuns d'aut grad, ch'èn vegnidas reintroducidas l'onn 2012, permettan da barattar infurmaziuns baud avunda. Quai garantescha che la regenza po intervegnir a temp. Natiralmain che mo quai na basta betg per segirar las plazzas da lavur en il chantun Grischun. Anzi, er il parlament federal è dumandà. Sche l'effectiv reglamentar maximal duess vegnir sminuì danovamain u sch'il preventiv da l'armada duess vegnir reducì vinavant, na sa lascha ina reducziun da plazzas en l'entira Svizra strusch evitar.

12 da schaner 2017