Sche las cundiziuns generalas giuridicas permettan quai, sa stenta la regenza da surdar incaricas entaifer il chantun. Quai mussan las statisticas da surdada da blers onns. Tenor quellas han numnadamain pudì vegnir resguardads purschiders indigens tar la pli gronda part da las acquisiziuns d'incumbensaders publics en il chantun Grischun. La dumonda qua avant maun focussescha dentant sin la surdada d'incaricas che na ston betg vegnir publitgadas uffizialmain, e sa restrenscha a l'uffizi per economia e turissem (UET).

Las acquisiziuns respectivamain la surdada d'incaricas na pon betg vegnir cumparegliadas directamain cun las pussaivladads da promoziun sin basa da la lescha davart il svilup economic, damai ch'ellas han differents intents. En connex cun las acquisiziuns entra il chantun da princip en acziun sin il martgà liber cun ina dumonda e cumpra cunter pajament d'in pretsch las prestaziuns necessarias ch'el dovra per realisar sias incumbensas publicas. La finamira prioritara è quella d'impunder meds finanzials publics e pia da cuntanscher la meglra relaziun tranter pretsch e prestaziun. Tar la promoziun da l'economia percunter vegnan concedids contribuziuns ed emprests da daners a terzs en spezial per effectuar ina valurisaziun en il chantun.

Tar la dumonda 1: Ils motivs per surdar incaricas ordaifer il chantun pon per exempel esser las enconuschientschas specificas ubain l'experientscha dal purschider e dal persunal engaschà, las referenzas ch'èn avant maun, l'organisaziun respectivamain la realisaziun dal project ubain concepts u analisas da l'incarica ch'èn gia vegnids fatgs pli baud. Las enconuschientschas u qualitads spezialas d'in purschider giustifitgeschan en il cas singul da resguardar purschiders extrachantunals er tar incaricas che na ston betg vegnir publitgadas uffizialmain. Natiralmain sto il princip da la rentabilitad vegnir observà er en cas da questas surdadas d'incaricas pli pitschnas.

Tar la dumonda 2: I n'exista betg ina survista generala davart il volumen d'incaricas dal UET che na ston betg vegnir publitgadas uffizialmain, sche ed en tge dimensiun che parts da questas incaricas ad interpresas grischunas èn vegnidas surdadas vinavant ordaifer il chantun. I sto però vegnir rendì attent che la subsurdada d'incaricas tenor la legislaziun chantunala da submissiun dastga vegnir fatga da princip mo cun il consentiment da l'incumbensader e mo per prestaziuns subordinadas u spezialas. Plinavant ha la surdada d'incaricas da prestaziuns da servetsch en general lieu sin fundament da las enconuschientschas specificas da l'incumbensà. Correspundentamain na vegnan las incaricas dal UET che vegnan surdadas senza publicaziun uffiziala per regla betg subsurdadas.

Tar la dumonda 3: Tant la regenza sco er l'administraziun èn fitg conscientas da l'impurtanza per l'economia publica dal chantun sco incumbensader e resguardan sche pussaivel interpresas indigenas. Ina prescripziun generala dal chantun ch'en cas da subsurdadas stoppian vegnir resguardads en mintga cas purschiders chantunals, fiss problematica tenor il dretg da concurrenza ed incunvegnenta dal puntg da vista material. Tut tenor incarica èsi necessari d'engaschar interpresas extrachantunalas, e quai pervia da las enconuschientschas. Sche questa pussaivladad vegniss scumandada da princip, na pudess eventualmain betg vegnir resguardà in purschider principal chantunal.

Dal rest vegn la regenza – independentamain da questa dumonda, suenter la terminaziun da la revisiun totala currenta dal dretg da surdada svizzer e resguardond ils resultats da las analisas da la cumissiun da concurrenza federala – a sondar anc ina giada la libertad d'agir areguard il dretg d'acquisiziuns en il sectur da construcziun (vesair latiers incumbensa Felix [Haldenstein] concernent l'impurtanza da las acquisiziuns publicas per l'economia publica).

Tar la dumonda 4: cf. las respostas a las dumondas 2 e 3.

Tar la dumonda 5: Tenor ses program da controlla intern (Wicon) ha il UET realisà durant ils 5 onns dals onns 2012 fin 2016 147 surdadas directas en la dimensiun da totalmain 6,188 milliuns francs. A quest volumen d'incaricas è la confederaziun sa participada cun radund 1 milliun francs.

78 da questas incaricas cun 48,5 % dal volumen d'incarica èn vegnidas surdadas ad interpresas grischunas. 41 incaricas e 34,5 % dal volumen èn vegnidas surdadas ordaifer il chantun. 21 ulteriuras incaricas cun 12,9 % dal volumen èn medemamain vegnidas surdadas ordaifer il chantun. Qua sa tracti da cas spezials, nua ch'igl è stà necessari d'integrar enconuschientschas professiunalas specificas d'instituziuns che lavuran sin plaun naziunal (incaricas a l'uffizi federal da statistica, a la federaziun svizra dal turissem, a l'institut gfs.bern, a l'institut BAK Basel Economics, a l'associaziun da garanzia per IPM AG OST-SID, a l'institut da perscrutaziun da la conjunctura KOF u en il rom d'ina cooperaziun en cas d'incaricas d'auters chantuns e.u.v.). 7 incaricas cun 4,1 % dal volumen èn vegnidas surdadas a purschiders da l'exteriur. Quai perquai ch'igl eran dumandadas enconuschientschas decisivas en connex cun dumondas specificas dal turissem en il territori germanofon ordaifer la Svizra.
La gronda part da las incaricas extrachantunalas pertutga projects u mesiras, nua ch'igl han stuì vegnir consultadas firmas da cussegliaziun spezialisadas en il context naziunal. Sche purschiders grischuns pon exequir incaricas sut cundiziuns cumparegliablas, vegnan quels da princip er resguardads dal UET.

Sco menziunà sut la dumonda 2, na datti naginas indicaziuns davart subsurdadas dal UET a purschiders extrachantunals.

8 da mars 2017