Cun la nova concepziun da la gulivaziun da finanzas e da las incumbensas tranter la confederaziun ed ils chantuns (NGF) n'ha il parlament federal betg mo transferì la proprietad da las vias naziunalas, mabain er la gestiun dal traffic dals chantuns a la confederaziun. En questa funcziun sto ella procurar – cun agid da gestiun, da direcziun, da regulaziun e d'infurmaziun – ch'il traffic sin las vias naziunalas saja fluid e segir. Per l'entira Svizra succeda la gestiun dal traffic tras la centrala svizra da gestiun dal traffic (VMZ-CH) e betg pli tras ils chantuns pertutgads. Per adattar e per coordinar las mesiras elavura la confederaziun – en collavuraziun cun ils chantuns – uschenumnads plans da gestiun dal traffic (PGT) per las vias naziunalas. Quels cumpiglian mesiras, cundiziuns e cumpetenzas per realisar las funcziuns da la gestiun dal traffic. Mesiras ch'èn necessarias perquai ch'igl ha memia bler traffic sin la via naziunala, tutgan al champ da cumpetenza da la confederaziun. A la responsabladad da la polizia chantunala tutgan pia mo las emprimas intervenziuns ch'èn relevantas per la segirezza suenter eveniments imprevisibels.

1. Pervia da la situaziun èsi pussaivel mo en paucs lieus da schlargiar il traject tranter Mesauc e San Bernardino a dus vials. Pervia da las construcziuns artifizialas necessarias chaschunass quai plinavant gronds custs e fiss realisabel mo a lunga vista. Tras saivs directivas centralas supplementaras pon collisiuns frontalas vegnir impedidas per gronda part. A medem temp han saivs directivas dentant er per consequenza che acziuns da salvament daventan pli difficilas, ch'il vial po vegnir svidà mo malamain en cas da colonnas suenter accidents e ch'il traffic stagna immediatamain a vista pli lunga en cas d'ina panna. Transports excepziunals n'èn praticamain betg pli pussaivels. Sin il traject en discussiun èn gia signalisads numerus scumonds da surpassar. Bain fissi pussaivel da signalisar ulteriurs scumonds da surpassar, ma lura na pudessan er vehichels plauns sco camiuns u campers, che circuleschan per part cun stgars 40 km/h, betg pli vegnir surpassads. En cas d'in basegn d'agir vegn la regenza ad intervegnir tar l'uffizi federal da vias (UVIAS), per che quel elavuria e realiseschia las mesiras necessarias.

2. La centrala svizra da gestiun dal traffic (VMZ-CH) sa stenta da reparter adequatamain il traffic sin las duas rutas da transit dal Gottard e dal San Bernardin. Actualmain è la VMZ-CH londervi da repassar ils plans da gestiun dal traffic en collavuraziun cun ils chantuns. La regenza vegn a s'engaschar per ch'i vegnian fixadas en ils plans da gestiun dal traffic mesiras liantas che duain gidar a dumagnar efficaziamain e svelt eventuals disturbis en la circulaziun dal traffic. Ultra da quai intervegn ella gia dapi onns tar la VMZ-CH ed ella vegn a s'engaschar er vinavant activamain per che la ruta dal San Bernardin na vegnia betg pli recumandada en moda uschè offensiva sco fin ussa sco ruta da sviament en cas d'annunzias da colonnas sin la ruta dal Gottard.

3. L'art. 5 da las directivas dal UVIAS davart ils plans da gestiun dal traffic sin vias naziunalas cuntegna las cumpetenzas da la polizia resp. las mesiras che ston vegnir prendidas tar l'emprima intervenziun (p.ex. avertiment al privel u limitaziun da la sveltezza avant il lieu da l'accident, emprima annunzia en il sistem d'infurmaziun dal traffic, serrada da vials, da tunnels e da trajects, sviaments dal traffic e serrada d'entradas e da sortidas). Tge mesira che vegn tschernida e ch'è raschunaivla dependa da l'eveniment, dal lieu e dal volumen da traffic. Quai sto pudair vegnir decidì al lieu e sto appartegnair a la libertad d'agir da la polizia.

4. Tranter il matg 2015 e la stad 2017 ha il servetsch tar la basa da la polizia da traffic (BPT) San Bernardino – pervia da partenzas e pervia d'absenzas causa malsogna – stuì vegnir prestà cun pli pauc persunal che normal, quai che ha per part gì consequenzas per l'abilitad d'agir en il sectur da la polizia da traffic. Dapi il 1. d'october 2017 vegni puspè lavurà cun il dumber cumplain da 16 collavuraturas e collavuraturs. Actualmain na dovri nagins ulteriurs meds persunals.

5. L'onn passà è vegnì examinà ed adattà il concept da gestiun da la centrala d'acziuns San Bernardino. Ils basegns fundamentals resultants, che ston vegnir elavurads da la centrala d'acziuns San Bernardino, vegnan cuvrids suffizientamain tenor il model actual. Las uras da lavur prestadas vegnan impundidas raschunaivlamain ord vista da l'economia da manaschi, e las uras supplementaras èn sut controlla. In'examinaziun, sch'i dovra anc servetschs dubels per tschertas fins d'emna da stad e d'atun cun grondas frequenzas durant l'onn 2018, vegn ad avair lieu. Da tegnair avert la centrala d'acziuns San Bernardino durant la notg na correspundess betg als basegns e fiss perquai pauc raschunaivel.

25 d'october 2017