Il cussegl federal ha concludì ils 29 da settember 2017 da metter en vigur las ordinaziuns revedidas davart la protecziun dals biotops per il 1. da november 2017. Las palids planivas sco er las pastgiras ed ils prads sitgs (PPS) en il chantun Grischun èn vegnids laschads en il stadi vertent.

La consultaziun da la confederaziun tar la revisiun dals inventaris da la protecziun dals biotops da l'onn 2015 cuntegneva per part faussas datas da cartaziun per las palids planivas sco er per las pastgiras ed ils prads sitgs. A chaschun da la visita da cussegliera federala Doris Leuthard ils 29 da zercladur 2016 èn ins sa cunvegnì da rectifitgar quests sbagls dals fatgs en collavuraziun tranter ils posts per la protecziun da la natira da la confederaziun e dal chantun. Ils 2 da matg 2017 ha la regenza decidì da furnir las surfatschas da las palids planivas rectifitgadas uschia a l'uffizi federal d'ambient (UFAM). En quest connex èn vegnidas repetidas las pretensiuns formuladas en la posiziun dal chantun tar la consultaziun. Oravant tut èn vegnidas pretendidas ina nova consultaziun, en la quala stoppia vegnir garantida la cooperaziun da las proprietarias e dals proprietaris da bains immobigliars, sco er la schliaziun dals conflicts d'utilisaziun cun las zonas da sport d'enviern e l'utilisaziun da la forza idraulica. Spezialmain confermada è vegnida la pretensiun ch'i na dastgia betg vegnir applitgada la regla d'agregaziun. Tenor questa regla attribuiss la confederaziun impurtanza naziunala ad ina surfatscha, e quai sulettamain pervia da sia vischinanza cun in auter object d'impurtanza naziunala.

La regenza è pronta da realisar ina vasta consultaziun entaifer il chantun tar ils cunfins rectifitgads da las palids planivas sco er da las pastgiras ed ils prads sitgs, avant che las datas vegnan communitgadas resp. vegnan communitgadas da nov al UFAM. Questa consultaziun serva a curreger eventuals sbagls en las constataziuns dals fatgs. Ultra da quai vegn garantida la transparenza. Da menziunar spezialmain è però che questa consultaziun serva mo a respunder la dumonda, sch'igl exista in tschert tip da biotop resp. da vegetaziun sin ina surfatscha. En connex cun ils inventaris federals è il chantun mo cumpetent per las constataziuns puramain objectivas dals fatgs. L'attribuziun "impurtanza naziunala" als singuls objects da biotop fa exclusivamain la confederaziun. Sch'i vegn fatg valair cun ina motivaziun correspundenta en il rom da la consultaziun entaifer il chantun, ch'in biotop na duaja betg esser d'impurtanza naziunala, vegn la regenza a trametter vinavant questa dumonda a la confederaziun. Il cussegl federal decida alura definitivamain davart l'inscripziun dals objects en las ordinaziuns davart la protecziun dals biotops resp. en lur agiuntas.

Suenter sto il chantun far las cunfinaziuns exactas dals biotops ch'èn vegnids approvads dal cussegl federal sco objects inventarisads. En quest connex ston vegnir tadlads las vischnancas, las proprietarias ed ils proprietaris da bains immobigliars, las cultivaturas ed ils cultivaturs sco er las titularas ed ils titulars da concessiuns. Las surfatschas da biotop, a las qualas la confederaziun n'attribuescha betg impurtanza naziunala, ston vegnir transferidas en l'inventari chantunal da la protecziun dals biotops. Uschia èsi pia necessari d'integrar en la consultaziun tant las surfatschas dals inventaris federals da la consultaziun da l'onn 2015 sco er tut las cunfinaziuns rectifitgadas professiunalmain dals biotops.

La consultaziun prendida en mira duai pia permetter a medem temp – sin basa da la consultaziun da l'onn 2015 – d'examinar las datas da cartaziun che duain vegnir tramessas a la confederaziun, da fixar las cunfinaziuns exactas dals biotops e d'actualisar l'inventari chantunal da la protecziun dals biotops. La finamira è quella da publitgar l'exposiziun publica da las datas da l'inventari e da contactar las cultivaturas ed ils cultivaturs da las parcellas sco er las proprietarias ed ils proprietaris da bains immobigliars, uschenavant che las indicaziuns da contact pon vegnir procuradas cun custs giustifitgabels cun agid da la banca da datas agriculas e dals uffizis dal register funsil. La regenza è pronta d'acceptar l'incumbensa en quest senn.

19 d'october 2017