Navigation

Inhaltsbereich

Incumbensa da la fracziun da la PPS concernent «Per in bun clima en il Grischun: Deducziun fiscala per vacanzas en Svizra»

Sessiun: 14.06.2019

Sco gia annunzià vegn la fracziun da la PPS ad inoltrar ils proxims mais differentas incumbensas sut il titel «Per in bun clima en il Grischun». Sut in bun clima na chapescha la fracziun da la PPS en quest connex betg mo l'ecologia, mabain er l'econo­mia ed uschia l'economia locala ed ils interess da la populaziun. Tge datti qua – en accordanza – meglier che vacanzas en l'agen, fitg bel pajais?

La deducziun fiscala per vacanzas en Svizra è ina soluziun svelta e realisabla che ha in grond effect: Tras deducziuns fiscalas pussaivlas per vacanzas frequentadas en Svizra pon talas vacanzas puspè vegnir rendidas pli attractivas, ed i pon vegnir spar­gnadas resursas fossilas per viadis lontans. Bler pli ecologic che vacanzas en in pajais lontan e bler pli economic che d'investir ils daners ordaifer la Svizra.

Las perditas fiscalas sezzas na vegnan – tenor noss avis – betg ad esser stravagantas, perquai che las interpresas vegnan ad esser en cas da pajar taglias pli autas grazia ad ina meglra situaziun economica. Nus l'avain udì a chaschun da la sessiun extra muros 2019 a Puntraschigna. Nus avain problems d'occupar noss hotels en il chantun. Er qua vegnin nus a cuntanscher in effect positiv.

La regenza vegn incumbensada da suttametter al cussegl grond in sboz per ina deducziun fiscala per dimoras turisticas en Svizra.

Puntraschigna, ils 14 da zercladur 2019

Koch, Favre Accola, Brandenburger, Della Cà, Dürler, Gort, Hug, Salis, Weber, Renkel

Resposta da la regenza

L'incumbensa da la fracziun vul promover vacanzas en Svizra e vul cuntanscher que­sta finamira cun agid d'ina deducziun fiscala. I sa tractass d'ina deducziun generala.

Il dretg fiscal federal armonisà regla definitivamain il sectur da las deducziuns gene­ralas. Uschia enumerescha l'art. 9 al. 2 da la lescha federala davart l'armonisaziun da la taglia directa dals chantuns e da las vischnancas (LATD; CS 642.14) las de­ducziuns generalas admissiblas, e l'art. 9 al. 4 fixescha explicitamain che autras deducziuns n'èn betg permessas. Ils chantuns na pon pia betg introducir ina deduc­ziun per promover vacanzas en Svizra; ina tala stess en cuntradicziun cun il dretg federal e na dastgass betg vegnir applitgada da l'administraziun da taglia, che ha l'incumbensa d'exequir la lescha da taglia.

Cunter la pretensiun d'ina deducziun fiscala per vacanzas en Svizra pledan dentant er auters motivs. I sa tracta d'ina mesira directiva che duai – per ponderaziuns dal clima – influenzar la tscherna da la destinaziun da vacanzas. La regenza ha adina refusà mesiras directivas en il dretg fiscal, e na vesa nagin motiv da divergiar da quest princip. Pervia da las tariffas progressivas e perquai ch'il minimum d'existenza è liber da taglia, n'è il dretg fiscal betg adattà per cuntanscher in effect directiv. Ils custs da mesiras directivas en il dretg fiscal na vegnissan betg budgetads, betg cum­provads en il quint statal e betg eruids autramain. La mesira na vegniss mai exami­nada areguard sia efficacitad e probablamain er mai messa en dumonda en in pa­chet da spargn dal cussegl grond. Plinavant dubitescha la regenza che la deducziun pretendida cuntanschess insumma in effect directiv.

Er la realisaziun pratica pleda cleramain cunter questa deducziun. D'ina vart na sa laschassi strusch chattar ina definiziun per las "dimoras turisticas en Svizra" che correspunda a la constituziun. Stuessan tut las vacanzas durant in onn chalendar vegnir frequentadas en Svizra u mo las vacanzas principalas? Ed èn vacanzas en ina part lontana da la Svizra propi pli ecologicas che vacanzas a l'exteriur vischin? Ina controlla da la deducziun na fiss praticamain betg pussaivla, uschia ch'i pudess resultar in minus d'entradas considerabel.

Sa basond sin questas explicaziuns propona la regenza al cussegl grond da refusar questa incumbensa.

21 d'avust 2019