Navigation

Inhaltsbereich

Incumbensa Schwärzel concernent plazzas parzialas sin tut ils stgalims dal cader

Sessiun: 14.06.2019

Tenor las explicaziuns dal cusseglier guvernativ Christian Rathgeb en l'ultima sessiun dal cussegl grond (favrer 2019) na lavura en l'administraziun chantunala nagina persuna a temp parzial sin il stgalim superiur dal cader. Il motiv è evident: i na vegnan purschidas naginas plazzas parzialas sin il stgalim superiur dal cader. Quai è antiquà. Plinavant na datti er nagina applicaziun uniztara da la pussaivladad da lavurar a chasa (homeoffice) u da far telelavur u d'autras pussaivladads da lavurar en moda flexibla. Quai vegn applitgà differentamain d'uffizi ad uffizi.

Ozendi tschertgan tant dunnas sco er umens responsabladad en la professiun sco er en la famiglia. Plazzas a temp parzial e jobsharing èn tschertgads sco anc mai. La tematica dal temp parzial è er arrivada tar il cader superiur. L'economia privata ha reagì e firmas pli grondas publitgeschan pli e pli plazzas a temp cumplain mo pli sco pensums "dad 80 fin 100%". Uschia na publitgescha p.ex. la Viafier retica, che porscha dunsainas da differents profils professiunals, da nov nagina plazza pli cun in pensum da puramain 100 %. Abstrahà da tschertas excepziuns vegn quai applitgà uschia per exempel er da l'Axa-Winterthur, da Lidl, da las VFF, da l'Allianz u da la Swisscom.

Plazzas a temp parzial n'han betg mo blers avantatgs per las lavurantas ed ils lavurants (p.ex. dapli temp per la famiglia, per furmaziuns supplementaras), mabain er per la patruna u il patrun. Tenor in studi èn quai en spezial temps da mancanza pli rars, ina diversitad pli gronda, collavuraturas e collavuraturs motivads, ina productivitad pli gronda ed avantatgs tar recrutaziuns en vista a la mancanza da persunas spezialisadas/demografia.

Sch'il chantun Grischun vul en il futur tegnair pass cun l'economia privata, avess el da tegnair quint dals basegns da la generaziun actuala e realisar differentas mesiras per meglierar la cumpatibilitad da la professiun cun la famiglia.

Las sutsegnadras ed ils sutsegnaders pretendan a curta vista che vacanzas da plazzas a temp cumplain vegnian publitgadas consequentamain cun 80-100 pertschient, e quai suror tut ils departaments e suror tut ils stgalims da funcziun (abstrahà d'excepziuns fitg specificas e motivadas). Supplementarmain duai dapertut, nua che quai è realisabel nà dal manaschi e nà dal cuntegn, vegnir stgaffida e promovida la pussaivladad da la telelavur/dal lavurar a chasa. Questas mesiras pon vegnir realisadas nunbirocraticamain e senza custs supplementars en moda relativamain simpla e svelta.

Puntraschigna, ils 14 da zercladur 2019

Schwärzel, Stiffler, Bettinaglio, Atanes, Baselgia-Brunner, Bigliel, Bondolfi, Buchli-Mannhart, Cahenzli-Philipp, Caluori, Casutt-Derungs, Cavegn, Caviezel (Cuira), Censi, Danuser, Della Cà, Deplazes (Cuira), Deplazes (Rabius), Dürler, Ellemunter, Felix, Florin-Caluori, Föhn, Gasser, Geisseler, Gugelmann, Hardegger, Hartmann-Conrad, Hitz-Rusch, Hofmann, Hohl, Holzinger-Loretz, Horrer, Kasper, Kienz, Kunfermann, Locher Benguerel, Loepfe, Loi, Märchy-Caduff, Michael (Castasegna), Mittner, Müller (Susch), Müller (Favugn), Natter, Noi-Togni, Papa, Perl, Pfäffli, Preisig, Rettich, Ruckstuhl, Rüegg, Rutishauser, Schneider, Schutz, Thomann-Frank, Thöny, Thür-Suter, Tomaschett (Breil), Tomaschett-Berther (Trun), Ulber, Weber, Weidmann, Widmer (Favugn), Widmer-Spreiter (Cuira), Wieland, Wilhelm, Zanetti (Sent), Zanetti (Landquart), Pajic

Resposta da la regenza

La regenza è conscienta dal fatg ch'il chantun sto restar in patrun attractiv – cumpa­re­glià cun l'industria privata e cun autras administraziuns – sch'el vul tegnair u re­crutar er en l'avegnir las persunas dal fatg ch'el dovra. En quest senn intenziunescha la regenza d'integrar in punct central da svilup "patrun attractiv" en il program da la regenza 2021-2024. La regenza è er da l'avis da las sutsegnadras e dals sutsegna­ders ch'il Grischun stoppia tegnair quint dals basegns da las generaziuns actualas e futuras. Latiers tutga er la realisaziun da mesiras per meglierar la cumpatibilitad da la professiun cun la famiglia. La direcziun generala, en la quala l'administraziun chan­tunala ha da sa sviluppar, dastgass correspundentamain esser incontestada. Tar la realisaziun da las singulas mesiras stoi però esser garantì ord vista da la regenza che quellas vegnian concepidas uschia, ch'ellas tegnan quint da las differentas pre­tensiuns manaschialas, organisatoricas e giuridicas. Ultra da quai vali adina da re­sguardar che l'administraziun ha en emprima lingia d'ademplir ina incumbensa e da furnir ils servetschs ils megliers pussaivels envers las burgaisas ed ils burgais.

Sco mesira a curta vista pretendan las sutsegnadras ed ils sutsegnaders che tut las plazzas vacantas a temp cumplain da tut ils departaments e da tut ils stgalims da funcziun vegnian publitgadas consequentamain cun in grad d'occupaziun dad 80 fin 100 pertschient. La regenza è pronta da tegnair quint da quest giavisch giustifitgà e da publitgar las plazzas a temp cumplain da l'administraziun chantunala en il futur en il senn da l'incumbensa sco pensums dad 80 fin 100 pertschient, uschenavant che quai è pussaivel resguardond las relaziuns ed ils basegns manaschials ed organisa­torics. Excepziuns motivadas duain restar pussaivlas. La regenza parta er dal fatg che quai rendia l'administraziun pli attractiva per dunnas, en spezial en funcziuns da cader. En quest connex stoi vegnir menziunà che var 37 pertschient da las collavura­turas e dals collavuraturs lavuran gia oz en moda parziala.

Las sutsegnadras ed ils sutsegnaders pretendan ultra da quai che la pussaivladad da la telelavur resp. dal lavurar a chasa vegnia promovida e pussibilitada. Els partan dal fatg che quai possia vegnir realisà nunbirocraticamain e senza custs supplemen­tars en moda relativamain simpla e svelta.

Areguard il lavurar en moda flexibla vali da menziunar che var 60 pertschient da las collavuraturas e dals collavuraturs han oz in temp da lavur per onn e na ston pia re­sguardar naginas uras da bloc. En cas singuls ed adina pli savens vegn er pussibilità il lavurar a chasa. Il lavurar a chasa pretenda per regla ina infrastructura supplemen­tara al lieu da lavur e quai po chaschunar custs supplementars. Er ston la registra­ziun dal temp da lavur e la segirezza da las datas vegnir resguardadas spezialmain en cas dal lavurar a chasa. Per regla èsi in avantatg da pudair disponer da las colla­vuraturs e dals collavuraturs en il biro dal post da servetsch. Pervia da quai è la re­genza da l'avis che – avant ch'il lavurar a chasa vegnia introducì dapertut – mesiras per flexibilisar la lavur sco novs models dal temp da lavur ed il lavurar a chasa duain vegnir evaluadas e discutadas en moda generala en il rom da la proxima revisiun da la lescha dal persunal.

Sa basond sin questas explicaziuns propona la regenza al cussegl grond d'acceptar l'incumbensa qua avant maun en quai che concerna la publicaziun da plazzas e da la midar sco suonda en quai che concerna il lavurar a chasa: En il rom da la proxima revisiun da la lescha dal persunal examinescha la regenza las pussaivladads dal lavurar a chasa.

21 d'avust 2019