Areguard il provediment da medis da chasa ha il chantun concludì ed implementà differentas mesiras en il rom da sias pussaivladads legalas. Las mesiras per garantir il provediment medicinal ambulant en las regiuns cumpiglian particularmain:

-     il sustegn finanzial dal project d'assistenza pratic "Capricorn" da l'uniun grischuna da medis

-     il sustegn finanzial dal curriculum da furmaziun supplementara per medias e medis da chasa organisà da l'ospital chantunal dal Grischun

-     l'engaschament sin plaun naziunal per la scolaziun da dapli medias e medis e cunter las pretensiuns creschentas da las societads professiunalas medicalas envers la scolaziun ed envers las activitads en il sectur medicinal, che na tegnan betg pli quint da la situaziun dals ospitals pli pitschens

Plinavant s'engascha il chantun er gia dapi ditg per garantir il provediment ambulant en cas d'urgenza. Il chantun paja cunzunt contribuziuns per garantir il servetsch medical d'urgenza e procura ch'i vegnian indemnisads ils servetschs surproporziunals d'urgenza da las medias e dals medis da chasa en il rom dal servetsch medical d'urgenza.

Per garantir il provediment da la sanadad en las regiuns perifericas èsi da considerar la situaziun en sia totalitad. Er las vischnancas ston sa participar a la garanzia dal provediment da la sanadad. Sa basond sin l'art. 6 al. 1 da la lescha davart la protecziun da la sanadad en il chantun Grischun (lescha da sanadad; DG 500.000) èn ellas cumpetentas per proteger la sanadad da lur populaziun. Per il provediment ambulant ston vegnir examinadas differentas soluziuns. Questas soluziuns ston vegnir cumbinadas ed applitgadas tenor il basegn da las regiuns. Exempels per talas soluziuns èn la colliaziun en raits da medis e/u la collavuraziun respectivamain la reuniun cun l'ospital regiunal. Quai gida a profitar pli fitg da sinergias ed ad evitar in servetsch d'urgenza ch'engrevgescha sur mesira. En il futur vegnan er a stuair vegnir examinadas novas soluziuns, sco l'integraziun d'ina advanced practice nurse (APN).

Ina premissa indispensabla per sviluppar soluziuns da provediment innovativas è quella da regular la finanziaziun da las prestaziuns furnidas. Quai vala er per las prestaziuns da la APN. In rendaquint independent da las prestaziuns, che vegn fatg directamain sur l'assicuranza da malsauns, pretenda in'adattaziun correspundenta da la lescha federala davart l'assicuranza da malsauns (LAMal; CS 832.10). 

Tar la dumonda 1: Il chantun vegn a cuntinuar cun las mesiras ch'el ha prendì per garantir il provediment ambulant, ed a sustegnair – en il rom da sias pussaivladads – er novas mesiras ch'el giuditgescha sco raschunaivlas per garantir il provediment da la sanadad en las regiuns.

Tar la dumonda 2: La regenza valitescha il potenzial da teams interprofessiunals sco grond. In studi da la Scola auta turitgaisa per scienzas applitgadas (ZHAW) ha mussà che las visitas a chasa da tgirunzas e tgirunzs han in effect preventiv: I dat damain cupitgas e damain assegnaziuns en l'ospital. Las medias ed ils medis vesan las visitas a chasa da tgirunzas e tgirunzs sco champ d'incumbensa il pli impurtant da tals. Util fiss er l'engaschament da tgirunzas e tgirunzs en cas dad entradas e da sortidas da l'ospital.

Tar la dumonda 3: Da princip èsi gia oz pussaivel d'etablir tals teams. La legislaziun vertenta na distingua dentant betg tranter APN ed autras tgirunzas u auters tgirunzs. Las prestaziuns che las APN dastgan furnir a quint da l'assicuranza obligatorica per la tgira da persunas malsaunas èn descrittas en l'art. 7 da l'ordinaziun dal DFI davart las prestaziuns da l'assicuranza obligatorica per la tgira da malsauns (ordinaziun davart las prestaziuns per la tgira da malsauns; OPM; CS 832.112.31). Ma las prestaziuns dastgan vegnir furnidas mo sin ordinaziun d'in medi.

La regenza s'engascha che las APN vegnian recepidas en la LAMal sco furnituras da prestaziuns renconuschidas e ch'ellas vegnian autorisadas da far giu quint per lur prestaziuns directamain cun las assicuranzas da malsauns.

24 d'october 2019