Navigation

Inhaltsbereich

Incumbensa da la fracziun da la PPS concernent ina clausula davart il nivel dals pretschs / avantatg per indigens

Sessiun: 12.02.2020

Il zercladur ha il parlament a Berna concludì novas reglas per las acquisiziuns. Quai en consequenza dal fatg ch'igl è vegnì public avant in pèr onns che la Confederaziun vul laschar montar fanestras novas en la Chasa federala ost per 1,5 milliuns francs. Quellas derivavan bainchapì da la Tschechia, perquai che purschiders svizzers n'han betg pudì concurrer cun ils pretschs bunmartgads. Sch'ina firma da l'exteriur concurra per incumbensas tar la Confederaziun, vegn resguardà il nivel dals pretschs da là. Sch'il nivel dals pretschs è 20% pli bass ch'en Svizra, sto er l'offerta esser 20% pli favuraivla. Quai correspunda facticamain ad in avantatg per indigens, u ditg cun auters pleds, las premissas betg egualas vegnan gulivadas uschia in zic. Tar la Confederaziun sa tracti tuttina d'in volumen dad 8 milliardas francs. Bler pli grond è però il volumen d'acquisiziuns dals chantuns e da las vischnancas, numnadamain ca. 32 milliardas francs.

Displaschaivlamain na parta la Regenza betg l'opiniun da la Confederaziun ed ha resalvas giuridicas. Nus da la fracziun da la PPS na chapin betg la tenuta da la Regenza. Il cuntrari, qua ha la Regenza pers cumplettamain il sentiment per la mastergnanza. Nus da la fracziun da la PPS essan da l'avis che quai fiss ina buna occasiun per proteger nossa mastergnanza. Perquai che gist las regiuns perifericas u meglier ditg las regiuns da cunfin pateschan gea il pli fitg dal squitsch da firmas da l'exteriur. Er lavurantas e lavurants profitassan, pertge che quai faschess frunt al squitsch sin las pajas. Eventuals custs supplementars per las vischnancas e per il chantun returnassan en furma da taglias, perquai che la chadaina da valurisaziun resta en Svizra e na vegn betg exportada a l'exteriur. Quai gidass er il clima, essend che las vias da transport vegnissan essenzialmain pli curtas. Supplementarmain vegniss rinforzada tras quai la finamira d'armonisaziun tranter la Confederaziun ed il chantun.

Pervia da quai inoltrescha la fracziun da la PPS dal Grischun l'incumbensa d'elavurar ils suandants puncts:

  • Ina preschentaziun generala che tegna quint dal problem descrit qua survart.
  • In sboz da lescha che protegia la mastergnanza indigena cunter firmas invasivas da l'exteriur.

Cuira, ils 12 da favrer 2020

Gort, Brandenburger, Della Cà, Dürler, Favre Accola, Hug, Koch, Salis, Jegen

Resposta da la regenza

A chaschun d'ina radunanza plenara speziala ils 15 da november 2019 han ils chan­tuns deliberà unanimamain la revisiun da la Cunvegna interchantunala davart las ac­quisiziuns publicas (CIAPrev) per mauns da la procedura da participaziun chantuna­la. Cun quai vulan els realisar sin plaun chantunal la Cunvegna da la OMC davart las acquisiziuns publicas (GPA) che conceda a las interpresas svizras in access al mar­tgà extendì da var 80 – 100 milliardas dollars per onn. Grazia a la CIAPrev vegnan stgaffids andaments d'acquisiziun pli moderns e pli flexibels ed in'unificaziun clera­main pli gronda cumpareglià cun oz da las prescripziuns en il dretg d'acquisiziun chantunal che vegn applitgà en ils chantuns, en las citads ed en las vischnancas. Il medem mument effectuescha la CIAPrev in'armonisaziun uschè gronda sco pussai­vel cun la Lescha federala davart las acquisiziuns publicas (LAP; CS 172.056.1) ch'è vegnida revedida sin plaun federal.

A chaschun da la debatta parlamentara davart la nova LAP durant la sessiun da zer­cladur 2019 è vegnì integrà en l'enumeraziun da l'art. 29 al. 1 LAP – en divergenza dals sbozs da lescha elavurads cuminaivlamain da la Confederaziun e dals chantuns – il criteri d'agiudicaziun "ils differents nivels dals pretschs en ils pajais, en ils quals la prestaziun vegn furnida". Quest criteri duai però vegnir resguardà mo observond las "obligaziuns internaziunalas da la Svizra". En il sectur da contracts internaziunals na datti da bel principi nagin spazi per resguardar ils differents nivels dals pretschs al lieu da prestaziun ester. En il sectur simpel (uschenumnà sectur da contracts betg internaziunals) exista ultra da quai ina limitaziun pervia da la Cunvegna d'acquisiziun bilaterala tranter la Svizra e l'Uniun europeica (UE). Sin il martgà intern da la UE, al qual la Svizra ha in access liber grazia a questa cunvegna d'acquisiziun, valan pia ils princips dal tractament naziunal e da la nundiscriminaziun er en cas d'acquisiziuns simplas. Questa obligaziun internaziunala (lianta) vegniss violada tras in criteri d'agiudicaziun che taxescha prestaziuns da pajais da la UE sin basa da differents nivels dals pretschs u da la differenta capacitad da cumpra. Ils experts da dretg con­sultads dals chantuns n'enconuschan nagins stadis commembers da la GPA u da la UE che avessan integrà en lur urdens d'acquisiziun criteris cumparegliabels per dischavantagiar offerents externs.

A chaschun da lur radunanza plenara speziala han ils chantuns refusà cun 19 cunter 7 vuschs e 0 abstenziuns d'integrar in tal criteri en la CIAPrev perquai ch'il champ d'applicaziun è fitg limità, perquai ch'igl è fitg difficil da realisar quest criteri en la pratica e perquai ch'el chaschuna gronda lavur birocratica. En il rom da la consul­taziun èsi vegnì rendì attent al fatg, ch'il nov dretg da concordat sa focusseschia pli fitg sin qualitad, duraivladad ed innovaziun e ch'ils posts d'acquisiziun han pia in­struments pli adattads per tegnair quint dals giavischs dals offerents svizzers orien­tads al martgà naziunal. Ils chantuns vulan exequir lur acquisiziuns sut cundiziuns da concurrenza e duvrar cun quità ils daners da taglia mess a disposiziun sco er profitar en quest connex – cun pauca lavur administrativa en proceduras chapaivlas – da las novas libertads d'agir cun las novas finamiras. Da las fermezzas dal mastergn indi­gen vegni uschia tegnì quint il meglier cun surdar incaricas dal maun public. Ils chan­tuns èn actualmain londervi ad elavurar ils agids d'execuziun (mussavia cuminaivel davart las acquisiziuns, fegliets infurmativs). En questas instrucziuns d'agir vegnan sensibilisads ils posts d'acquisiziun per las novas finamiras e per ils novs instruments da la CIAPrev a favur da l'economia indigena.

Tar il punct 1: En sia missiva tar la participaziun a la CIAPrev vegn la Regenza ad explitgar al Cussegl grond tge avantatgs ch'il nov dretg d'acquisiziun porscha als participants dal martgà svizzers e tge libertads d'agir a favur dal mastergn indigen ch'il maun public survegn tras il nov concordat.

Tar il punct 2: Tenor ils experts da dretg consultads dals chantuns n'èsi betg per­mess als chantuns da normar sin via dal dretg d'execuziun novs criteris d'agiudi­caziun (generals abstracts) sco ina clausula dal nivel dals pretschs u autras praticas discriminantas. Per sclerir questas dumondas da dretg e per giuditgar tge adatta­ziuns da la CIAPrev che ston eventualmain vegnir fatgas pervia dal svilup da l'eco­nomia dirigì da COVID-19 vegn la Regenza a tschentar danovamain ed explicitamain ina dumonda a l'Organ interchantunal per las acquisiziuns publicas (INAP).

Sin basa da questas explicaziuns propona la Regenza al Cussegl grond d'acceptar l'incumbensa qua avant maun concernent il punct 1 e da la midar sco suonda con­cernent il punct 2: La Regenza sclerescha tar il INAP l'admissibladad d'ina clausula dal nivel dals pretschs u da disposiziuns sumegliantas en il dretg d'execuziun dals chantuns ed in basegn d'adattar la CIAPrev pervia da las consequenzas da COVID-19.

29 d'avrigl 2020