Navigation

Inhaltsbereich

Dumonda Loi concernent las surdadas da las lavurs vi dal tunnel d'Arosa da la Viafier retica

Sessiun: 19.06.2020

Per sanar il tunnel d'Arosa da la Viafier retica è vegnida publitgada ina incumbensa tenor las directivas GATT/WTO. Pliras offertas èn entradas. Quellas èn vegnidas controlladas areguard la cumplettadad e valitadas tenor criteris d'agiudicaziun. La finala han ins pudì tscherner tranter duas offertas ch'eran praticamain equivalentas areguard il pretsch ed areguard il criteris d'agiudicaziun.

1. rang: Heitkamp Construction Swiss ScRL, 6036 Dierikon                  fr.     22 423 133.75      (100%)        26,58 puncts

2. rang: Cuminanza da lavur IARO, c/o Lazzarini SA, 7000 Cuira           fr.     22 543 609.10      (100,5%)     26,56 puncts

              Differenza                                                                                       fr.          120 475.35

En la publicaziun e tar la surdada èn ils facturs da valitaziun vegnids fixads sco suonda:

Pretsch                                                                                                          60%
Rapport tecnic                                                                                              25%
Andament da construcziun/program da construcziun                            10%
Persunas decisivas                                                                                       5%

La firma Heitkamp è ina societad da domicil ed appartegna cumplettamain ad in concern da construcziun russ (Renaissance Group) ch'è en possess d'in milliardari tirc. La firma è activa en Svizra dapi in tschert temp en la construcziun da tunnels ed ha avunda capacitads e know-how.

A la Cuminanza da lavur IARO èn participadas las firmas Brunold SA, Arosa, Mettler Prader SA, Cuira, Lazzarini SA, Cuira cun 70% e la firma Pizzaroti, Bellinzona (commembra da la Societad grischuna dals impressaris constructurs) cun 30%. Er ellas han las abilitads ed experientschas necessarias per realisar ina incumbensa da tala cumplexitad e grondezza.

La Viafier retica è dependenta fermamain dal chantun Grischun ed è colliada stretgamain cun tal. Per il manaschi e per il mantegniment vegnan impundids er meds finanzials publics. Perquai èsi ordvart dubitaivel e nunchapibel, pertge che lavurs da tala dimensiun vegnan surdadas ad ina interpresa estra en in lieu periferic. Quai cunzunt, perquai che la differenza dals pretschs importa mo in mez pertschient.

Sche interpresas da construcziun indigenas survegnan – per uschè dir davant la porta-chasa – ina incumbensa en l'autezza da 22 milliuns francs, che vegn per part finanziada cun daners publics, e sch'ellas pudessan uschia occupar 30 collavuraturas e collavuraturs durant 3 onns, fissi urgentamain giavischà che las persunas responsablas per la surdada da las lavurs mussassan dapli curaschi e considerassan questa decisiun en moda cumplessiva.

Gist en in temp, nua ch'i vegnan dadas ora en l'entir pajais milliardas per sustegnair l'economia, èn talas decisiuns – er sch'ellas èn probablamain correctas ord vista giuridica – difficilas d'acceptar e nunchapiblas cunzunt er per las lavurantas ed ils lavurants.

Il maun public surdat uschia cuntinuadamain incumbensas grondas a concerns internaziunals e prenda davent pussaivladads da gudogn e da svilup da las regiuns perifericas. Pervia da lur grondezza n'han interpresas da construcziun indigenas da l'entir chantun betg las pussaivladads da s'annunziar sco ils concerns gronds internaziunals per incumbensas sin l'entir mund. Perquai duain interpresas chantunalas vegnir resguardadas meglier cunzunt en cas d'incumbensas grondas dal maun public. Ina midada da l'Ordinaziun da submissiun s'impona areguard ils facturs da valitaziun. Degna da vegnir examinada fiss er la dumonda, sche incumbensas grondas – che han ina differenza dals pretschs da main che 2% suenter la rectificaziun da las offertas – na stuessan betg vegnir surdadas obligatoricamain ad interpresas dal Grischun a partir d'ina tscherta summa. Criteris sco la francaziun regiunala e l'impurtanza micro-economica ston vegnir valitads pli fitg.

En general vegn il pretsch valità memia fitg tar surdadas dal maun public. Il domicil, l'ecologia/l'enconuschientscha da las relaziuns localas (green deal) ed auters aspects vegnan valitads memia pauc. Il factur da valitaziun «pretsch» vegn valità relativa­main ferm cun 50–60%.

Las sutsegnadras ed ils sutsegnaders dumondan la Regenza:

  1. Vegn la Regenza mintgamai infurmada davart surdadas da lavurs da la Viafier retica en questa dimensiun?
  2. Va la Regenza da princip d'accord cun questas interpretaziuns?
  3. Vesa la Regenza in basegn d'agir?
  4. È la Regenza pronta d'examinar l'Ordinaziun da submissiun en il rom da las pussaivladads legalas e d'eventualmain adattar tala sco pretendì?

Cuira, ils 19 da zercladur 2020

Loi, Jenny, Grass, Hohl, Aebli, Berweger, Brandenburger, Buchli-Mannhart, Caluori, Cantieni, Clalüna, Danuser, Ellemunter, Felix, Flütsch, Gasser, Gugelmann, Hardegger, Hartmann-Conrad, Hefti, Hug, Kasper, Koch, Lamprecht, Michael (Donat), Müller (Susch), Natter, Niggli (Samedan), Niggli-Mathis (Grüsch), Papa, Tanner, Ulber, von Ballmoos, Waidacher, Widmer-Spreiter (Cuira), Zanetti (Sent)

Resposta da la regenza

Ils 28 da november 2019 ha la Viafier retica SA publitgà las lavurs d'impressari per la reparaziun dal tunnel d'Arosa tenor GATT/WTO confurm a la lescha. Cun la decisiun dals 3 d'avrigl 2020 ha la Viafier retica surdà las lavurs publitgadas a la Heitkamp Construction Swiss ScRL, che aveva inoltrà l'offerta economicamain la pli favuraivla. Cunter la disposiziun da surdada ha la cuminanza d'offerents ch'era sin il segund rang, fatg recurs tar la Dretgira administrativa dal chantun Grischun. La Dretgira ad­ministrativa ha refusà la dumonda da conceder in effect suspensiv ed ha constatà a prima vista che l'interpresa agiuditgada para d'observar ils criteris da qualificaziun resp. che l'autoritad da surdada ha valità correctamain quests criteris. Sin basa da quai ha la recurrenta retratg ses recurs, uschia che la procedura è vegnida stritgada pervia da mancanza d'object, e la surdada ha survegnì forza legala.

Tar la dumonda 1: La Regenza vegn infurmada posteriuramain davart las lavurs sur­dadas da la Viafier retica en il rom da la statistica legala da submissiun tenor l'art. 34 da la Lescha da submissiun (Lsub; DG 803.300). Independentamain da quai stat il chantun en in stretg contact cun la Viafier retica, perquai ch'ella consultescha regu­larmain il post da submissiun per scleriments correspundents. 

Tar la dumonda 2: Na, la Regenza na va da princip betg d'accord cun questa inter­pretaziun. Tenor la pratica da la Dretgira administrativa ha il criteri dal pretsch l'im­purtanza la pli gronda. Sco regla generala po valair en quest connex: pli simpel ch'il grad da difficultad d'ina incumbensa è, e dapli impurtanza ch'è d'attribuir al pretsch. En cas d'incumbensas d'ina cumplexitad mesauna na duess l'impurtanza dal pretsch per regla betg importar main che 50 pertschient, quai ch'è usitadamain il cas tar in­caricas da construcziun (sco incaricas da standard). En il rom da la submissiun da talas lavurs da construcziun applitgescha la Viafier retica mintgamai ina impurtanza da 60 pertschient per il criteri dal pretsch.

Criteris esters a l'agiudicaziun – sco la domiciliaziun al lieu, il domicil fiscal u l'utili­sa­ziun da products indigens – n'èn betg criteris admissibels per pudair divergiar da la purschida economicamain la pli favuraivla. En cas d'offertas qualitativamain equi­va­lentas sto – tenor la giurisdicziun permanenta – l'offerta pli favuraivla survegnir obli­gatoricamain l'agiudicaziun, er en cas d'ina pitschna differenza da pretsch. La con­cessiun d'ina libertad da decider entaifer tschertas limitas da toleranza, sco quai ch'ella vegn proponida en la dumonda, vegniva pratitgada fin en ils onns 1990, n'è dentant betg pli admissibla tenor il dretg vertent. Tenor las statisticas chantunalas d'acquisiziun èn dal rest vegnidas surdadas mintga onn tut en tut main che 2 per­tschient da tut las incaricas publicas en il chantun Grischun ad offerents da l'exteriur. En spezial en l'industria principala da construcziun èn ultra da quai vegnidas sur­da­das passa 90 pertschient da las incaricas ad offerents grischuns. Quai mussa pia che las interpresas indigenas pon far frunt a la concurrenza.

Tar la dumonda 3: Ils 15 da november 2019 han ils chantuns deliberà unanimamain la revisiun da la Cunvegna interchantunala davart las acquisiziuns publicas (CIAPrev) per mauns da la procedura da participaziun chantunala. Il nov dretg da concordat sa focusseschia pli fitg sin qualitad, duraivladad ed innovaziun. Als posts d'acquisiziun sa porschan perquai instruments pli adattads per tegnair quint dals interess dals of­ferents svizzers orientads al martgà naziunal. Ils chantuns vulan exequir lur ac­qui­si­ziuns sut cundiziuns da concurrenza e duvrar cun quità ils daners da taglia di­sponi­bels sco er profitar en quest connex – cun pauca lavur administrativa en proceduras chapaivlas – da las novas libertads d'agir cun las novas finamiras. Da las fermezzas dal mastergn indigen vegni uschia tegnì quint il meglier cun surdar incaricas dal maun public. Sin fundament da quai na vesa la Regenza nagin ulteriur basegn d'agir.

Tar la dumonda 4: Questa pretensiun vegn tractada correspundentamain en la re­vi­siun menziunada da la CIAP. La CIAPrev metta il focus sin ina pratica d'acquisiziun dal maun public ch'è duraivla ed innovativa e che s'orientescha a la qualitad. La Regenza è persvadida ch'i vegn – grazia al nov dretg d'acquisiziun dals chantuns – tegnì quint anc meglier da las fermezzas dals offerents indigens.

7 da settember 2020