Navigation

Inhaltsbereich

Dumonda Preisig concernent la realisaziun e cuntravenziuns pussaivlas cunter la Lescha davart las abitaziuns secundaras en il chantun Grischun

Sessiun: 19.06.2020

Il 1. da schaner 2016 è entrada en vigur la Lescha davart las abitaziuns secundaras (LAS). Diversas decisiuns dal Tribunal federal han precisà en il fratemp la legislaziun davart las abitaziuns secundaras. Ils 8 da matg 2020 ha il Tribunal federal danovamain pronunzià ina sentenzia decisiva (DTF 1C_478/2019, 1C_479/2019 e https://www.engadinerpost.ch/2020/6/09/Wegweisendes-Urteil-in-Sachen-Zweitwohnungen) concernent in cas en il territori Punt Muragl, vischnanca da Samedan. Il Tribunal federal ha decidì che edifizis da dretg vegl senza restricziuns d'utilisaziun na dastgian betg pli vegnir reconstruids ed a medem temp engrondids, ed ha abolì la decisiun da la Dretgira administrativa. Quest cas mussa en moda exemplarica che las autoritads exequintas interpreteschan da maniera memia generusa la Lescha davart las abitaziuns secundaras en la pratica e ch'i vegn consequentamain adina puspè cuntrafatg a questa lescha.

La Lescha davart las abitaziuns secundaras deleghescha diversas incumbensas al chantun:

  • Tenor l'art. 3 al. 1 LAS ston ils chantuns fixar en cas da basegn en il plan directiv mesiras per promover ina meglra occupa­ziun da las abitaziuns secundaras sco er per promover l'hotellaria ed emprimas abitaziuns favuraivlas.
  • L'art. 12 al. 1 LAS oblighescha ils chantuns (e las vischnancas) da prender en cas da basegn las mesiras necessarias per impedir abus e svilups nungiavischads che pudessan resultar tras quai che abitaziuns construidas tenor il dretg vegl vegnan utilisadas illimitadamain sco abitaziuns secundaras.
  • L'art. 15 LAS oblighescha mintga chantun da designar in'autoritad che surveglia l'execuziun da questa lescha. Il chantun Grischun ha designà il Departament d'economia publica e fatgs socials (DES) sco autoritad da surveglianza.

Quatter onns suenter l'entrada en vigur da questa lescha ch'è fitg decisiva per il chantun ed en spezial per tschertas regiuns, s'imponi da trair bilantscha davart ses effects (e davart sias consequenzas).

Nus supplitgain perquai la Regenza da respunder las suandantas dumondas:

  1. Tge mesiras èn vegnidas fixadas per promover ina meglra occupaziun da las abitaziuns secundaras sco er per promover l'hotellaria ed emprimas abitaziuns favuraivlas?
  2. Co ademplescha il DES sia funcziun da surveglianza? Tge incumbensas e cumpetenzas concretas ha el?
  3. Ha la Regenza constatà eventuals abus e svilups nungiavischads en il senn da l'art. 12 LAS ed èn vegnidas prendidas mesiras cunter quai? Sche gea, tgeninas?
  4. Co agescha la Regenza suenter decisiuns dal Tribunal federal che pertutgan il chantun Grischun, sco quella ch'è menziunada qua survart?

Cuira, ils 19 da zercladur 2020

Preisig, von Ballmoos, Schwärzel, Baselgia-Brunner, Cahenzli-Philipp, Caluori, Casutt-Derungs, Degiacomi, Deplazes (Cuira), Gartmann-Albin, Gasser, Hofmann, Horrer, Jenny, Maissen, Müller (Favugn), Perl, Rettich, Rutishauser, Wilhelm, Giudicetti, Pajic

Resposta da la regenza

Tenor la dumonda s'imponia da trair bilantscha davart ils effects e davart las con­sequenzas da la Lescha federala davart las abitaziuns secundaras (LAS; CS 702) 4 onns suenter sia entrada en vigur. En quest reguard stoi vegnir rendì attent che la Confederaziun è londervi da far in'analisa dals effects sin fundament da l'art. 19 LAS. En quest project cumplex vegnan examinads quatter secturs (execuziun, cuntrada / territori, focus sin il manaschi e focus sin l'economia publica), resguardond las diffe­rentas parts involvidas sco er mandataris externs. Dus lavuratoris han gia gì lieu. Cura ch'ils resultats vegnan preschentads resp. publitgads, n'è anc betg enconu­schent.

Tar la dumonda 1: En il Plan directiv chantunal (chapitel 5.2.5) èn fixadas maximas per "promover l'hotellaria", per "promover ina meglra occupaziun da las abitaziuns secundaras" sco er per "stgaffir e mantegnair spazi d'abitar per la populaziun indi­gena". Realisadas vegnan questas maximas da las vischnancas tenor l'instrucziun d'agir. Tenor las explicaziuns ston mesiras vegnir examinadas en spezial da las vischnancas en il territori turistic, turistic-urban sco er turistic-suburban. En il rom da la procedura d'examinaziun preliminara e da la procedura d'approvaziun da las pro­ximas revisiuns totalas da las planisaziuns localas examinescha l'Uffizi per il svilup dal territori (UST) resp. la Regenza la realisaziun da las maximas che concernan las vischnancas. Differentas vischnancas han concludì en il fratemp regulaziuns pli se­veras che quellas da la LAS – saja quai en il sectur da las abitaziuns secundaras sco talas, saja quai en il sectur dals edifizis caracteristics per il lieu. In'ulteriura instruc­ziun d'agir en il Plan directiv chantunal fixescha ch'il chantun po concluder mesiras, sch'i sa mussassan – en il sectur da las abitaziuns secundaras – fauss svilups che na pudessan betg vegnir franads tras las vischnancas sezzas. Fin ussa n'èn enco­nuschents al chantun nagins fauss svilups che avessan pretendì ina intervenziun chantunala.

Tar la dumonda 2: En sia funcziun sco post da surveglianza per l'execuziun da la LAS e sco post d'infurmaziun specific ha il Departament d'economia publica e fatgs socials (DES) relaschà in agid d'execuziun en il sectur da la LAS. En la procedura da la planisaziun locala prenda il DES mintgamai posiziun davart dumondas concernent la LAS. Plinavant dat il DES bleras infurmaziuns a vischnancas, a planisadras e pla­nisaders, ad architectas ed architects, ad advocatas ed advocats sco er a persunas privatas e fa recumandaziuns correspundentas. La finala examinescha e sclerescha il DES indizis d'ina execuziun dispitaivla da la LAS. Cun excepziun d'in cas, che ha pudì vegnir curregì senza procedura formala, n'ha il DES anc mai stuì intervegnir. En cas da novas enconuschientschas sin fundament da la giurisdicziun contactescha il DES en moda activa ed infurmativa las vischnancas ed ils uffizis da construcziun – fin ussa è quai stà necessari mo ina giada. Cumpetenzas n'ha il DES naginas, danor quella ch'el po intervegnir en il rom da proceduras da surveglianza. Tut en tut poi ve­gnir constatà che las vischnancas exequeschan conscienziusamain e correctamain la LAS e ch'ellas s'infurmeschan en cas singuls tar il DES, sch'ellas èn malsegiras. La sentenzia dal Tribunal federal che vegn menziunada en la dumonda na po betg vegnir prendida sco exempel per giuditgar la qualitad da l'execuziun, perquai ch'ella è – ord vista dal chantun – vegnida ad ina conclusiun fitg surprendenta e nunspe­tga­da cun in'argumentaziun fitg dubitaivla e n'è uschia strusch chapaivla.

Tar la dumonda 3: Sco gia menziunà per part tar las dumondas 1 e 2 n'ha il chantun constatà nagins fauss svilups u abus fin ussa.

Tar la dumonda 4: La nova giurisdicziun vegn realisada da vart dal chantun en ses champ da cumpetenza. En cas da basegn vegnan las vischnancas ed ils uffizis da construcziun infurmads activamain. La nova giurisdicziun vegn integrada en il rom da la revisiun periodica da l'agid d'execuziun. Ulteriuras pussaivladads da prender influenza sin fundament da la nova giurisdicziun na datti naginas en cas d'edifizis entaifer las zonas da construcziun, perquai che las vischnancas èn cumpetentas per conceder las permissiuns da construcziun correspundentas. Ordaifer las zonas da construcziun resguarda il UST novs svilups en sias decisiuns; en cas da midadas da la pratica vegnan las vischnancas infurmadas en scrit cun agid da brevs (news­letters).

31 d'avust 2020