Il Post spezialisà interchantunal da la polizia criminala svizra definescha stalking sco in persequitar e mulestar intenziunà e repetì d'ina persuna, uschia che sia segirezza vegn smanatschada e sia moda da viver vegn restrenschida. En quest connex sa tracti senza dubi d'ina greva restricziun che po avair consequenzas per la sanadad e per la situaziun economica. Per pudair proteger ina persuna pertutgada da stalking, dovri d'ina vart instruments che pussibiliteschan d'intervegnir immediatamain, da l'autra vart pussaivladads d'intervegnir a media ed a lunga vista, cun agid da las qualas la dinamica dal stalking po vegnir interrutta (Christian Schwarzenegger/ Aurelia Gurt, Rechtliche Möglichkeiten gegen Stalking in der Schweiz, Gutachten zuhanden des Eidgenössisches Büros für Gleichstellung von Mann und Frau, Berna 2019, p. 4).

Tals instruments existan gia en il dretg penal, en il dretg da procedura penala, en il dretg civil, en il Cudesch da procedura civila, en il dretg davart l'agid a victimas ed en il dretg da polizia chantunal (cf. Schwarzenegger/Gurt, al lieu inditgà, p. 5-15). La Regenza ha l'intenziun da cumplettar las mesiras correspundentas en il rom da la revisiun parziala da la Lescha davart l'execuziun giudiziala en quel senn ch'i duai vegnir stgaffida en la Lescha da polizia la basa per contactar en moda extendida persunas periclitantas. Uschia duai il Post da cussegliaziun per persunas violentas survegnir la pussaivladad da contactar la persuna periclitanta en connex cun tut ils cas da violenza a chasa e da la porscher ina cussegliaziun cunter violenza. Cun quest instrument duain vegnir cumplettadas las mesiras vertentas en il sectur da la violenza a chasa. Da quest instrument pon persunas pertutgadas da stalking però profitar mo, sch'ellas vivan ensemen cun il delinquent. Questas sco er las autras pussaivladads d'intervenziun n'èn betg vegnidas concepidas spezialmain per persu­nas pertutgadas da stalking. Ni sin plaun chantunal ni sin plaun federal n'existan actualmain mesiras da protecziun spezialas per persunas pertutgadas da stalking.

L'incumbensa qua avant maun pretenda che questa largia en la lescha vegnia serrada e ch'i vegnia stgaffida ina basa legala per il causal dal «stalking» analoga­main als chantuns Berna, Appenzell Dador, Appenzell Dadens, Zug, Uri sco er Neuchâtel. Uschenavant ch'i vegn pretendì da stgaffir ina norma penala speziala per stalking, vali da resguardar che la Cumissiun per dumondas giuridicas dal Cussegl naziunal ha decidì ils 3 da matg 2019 da suttametter a las chombras federalas in sboz elavurà per duas normas penalas che faciliteschan la persecuziun penala da persunas che fan stalking. L'iniziativa parlamentara correspundenta vegn motivada da la Cumissiun per dumondas giuridicas dal Cussegl naziunal cun quai ch'il stalking restrenschia las persunas pertutgadas en lur libertad ed en lur concepziun individua­la da la vita e possia chaschunar donns psichics, socials ed economics. L'instrumen­tari giuridic vertent na bastia betg per chastiar il stalking e sviluppia in effect preventiv general memia pitschen. Pervia da quai stoppian d'ina vart vegnir cumplettads ils causals penals da la smanatscha e da la constricziun en la Part speziala dal Cu­desch penal, da l'autra vart stoppian vegnir chattadas soluziuns en reguard al far valair il dretg en cas da cyberstalking (iniziativa parlamentara 19.433). La Cumissiun per dumondas giuridicas dal Cussegl dals chantuns ha approvà quest proceder ils 29 d'october 2019. Pia pon ins partir dal fatg ch'i vegnia bainbaud stgaffì sin plaun federal in causal penal spezial per il stalking.

Sche l'incumbensa qua avant maun avess però da pretender autras mesiras da pro­tec­ziun preventivas per persunas pertutgadas da stalking, ha la Regenza gia emper­mess en il program da la Regenza 2021-2024 d'examinar questa dumonda en il rom dal management da smanatschas. En quest connex ha ella explitgà ch'i duain – cun il management chantunal da smanatschas – vegnir percepids e valitads ad ura svi­lups privlus da persunas per evitar in act violent potenzial. Cun quai duai vegnir aug­mentada la segirezza da la populaziun envers extremissem violent, envers radicali­saziun, envers violenza a chasa ed envers stalking, ma er la segirezza d'instituziuns sco l'administraziun e las scolas. En il center stettia la collavuraziun sistematica ed interdisciplinara da tut las autoritads e da tut ils posts involvids sco er la regulaziun da las cumpetenzas e da las incumbensas respectivas. La collavuraziun duaja vegnir instituziunalisada e professiunalisada cun in concept cumplessiv e cun la creaziun d'in post spezialisà per il management da smanatschas. En quest connex stettia en il center da chattar mesiras interdisciplinaras sut l'aspect da las differentas incumben­sas legalas. Las basas legalas che sajan necessarias per quai duajan vegnir stgaf­fidas, ils instruments correspundents duajan vegnir applitgads e las collavuraturas ed ils collavuraturs involvids duajan vegnir scolads (program da la Regenza e plan da finanzas 2021-2024, p. 445).

Sa basond sin questas explicaziuns propona la Regenza al Cussegl grond da midar questa incumbensa sco suonda:

I stoppia vegnir stgaffì in artitgel da lescha che dat la pussaivladad a la polizia d'ordi­nar in scumond da raiun resp. in scumond local, in scumond da s'avischinar ed in scumond da contact sco mesira speziala da la polizia da segirezza.

13 da schaner 2021