Navigation

Inhaltsbereich

Incumbensa Maissen concernent l'acceleraziun dal restabiliment duraivel da l'economia suenter corona

Sessiun: 18.02.2021

Sin fundament da sia structura economica è il chantun Grischun pertutgà en moda surproporziunala da las mesiras dal Cussegl federal per cumbatter la pandemia da corona. Grazia al fatg che la vaccinaziun cumplessiva da la populaziun progredescha e sin fundament da las experientschas cun autras pandemias vegn er questa pandemia ad esser passada insacura. In donn economic vegn dentant a restar, cunquai che las interpresas n'han strusch la forza per far investiziuns u perquai che la dumonda sa redu­cescha pervia d'ina recessiun. Er la vita culturala, che ha ina gronda impurtanza per il Grischun, vegn ad esser indeblida ferma­main fin lura. Pervia da las midadas da cumportament (homeoffice, viagiar, niz e cunfins da la digitalisaziun) ed en consequenza da las enconuschientschas areguard la gestiun da crisas ed areguard la forza da resistenza pudess la pandemia effectuar a medem temp ina midada structurala en differents secturs. Questa chaschun vali da nizzegiar. Igl è impurtant da guardar gia ussa sur la fasa acuta ora vers l'avegnir.

Il chantun Grischun dispona gia d'ina paletta d'instruments da promoziun prospectivs en ils secturs innovaziun, svilup economic, svilup regiunal e cultura (NPR, occurrenzas, alloschament, promoziun da la cultura, telefericas, infrastructuras relevantas per il sistem e.u.v.). Quests instruments èn per il solit colliads cun tariffas u cun summas da contribuziun maximalas, cun grondezzas minimalas dals projects u cun pretensiuns areguard ils agens meds finanzials. En temps economicamain normals pon quests criteris esser raschunaivels per applitgar la promoziun cun cleras finamiras.

Sche quests criteris vegnissan schluccads durant in tschert temp, pudess quai gidar durant la fasa da la recessiun che interpresas investissan – malgrà reservas deblas – en l'avegnir e sviluppassan novs models da fatschenta sco er products ed offertas inno­vativas, che organisaziuns mettessan puspè en pe occurrenzas grondas u ch'i naschissan novs formats culturals. I fiss in program d'impuls che sa basass sin instruments da promoziun e sin andaments enconuschents e che na stuess betg pir anc vegnir elavurà cun gronds sforzs, per ils quals nagin n'ha actualmain temp. Ina gronda part da quests criteris è reglada en ordinaziuns u en directivas sin il stgalim dals departaments. Tals relaschs pon vegnir midads relativamain svelt. Ultra da las finamiras gia eta­blidas en la promoziun da l'economia duai la promoziun supplementara vegnir suttamessa al criteri ch'ils projects servian a la renovaziun ecologica persistenta, persequitond las finamiras da l'Accord da Paris davart il clima.

Las sutsegnadras ed ils sutsegnaders incumbenseschan perquai la Regenza

  1. da concepir tant pli svelt – per ina durada limitada da dus fin trais onns – en moda pli generusa ils criteris dals instruments da promoziun raschunaivels che servan al restabiliment da l'economia e da la cultura e che sa chattan en la libertad d'agir da la Regenza u dals departaments, e quai cun la finamira da gidar che iniziativas e projects vegnian realisads pli svelt.
  2. da procurar – ensemen cun la Confederaziun – per in'extensiun dals criteris da promoziun per projects d'investiziun (à fonds perdu, emprests, garanzias) durant in temp limità, per che las interpresas che vulan far investiziuns na vegnian betg franadas tras corona, per ch'ellas hajan, senza retard, in effect stabilisant grazia ad investiziuns en las regiuns e per ch'ellas garanteschian/mantegnian resp. stgaffeschian uschia perspectivas, plazzas da lavur, valurisaziun e valurs.

Tavau, ils 18 da favrer 2021

Maissen, Engler, Casty, Berther, Bettinaglio, Brunold, Buchli-Mannhart, Caluori, Cantieni, Casutt-Derungs, Caviezel (Cuira), Clalüna, Crameri, Deplazes (Rabius), Derungs, Ellemunter, Epp, Felix, Florin-Caluori, Föhn, Geisseler, Hardegger, Horrer, Kohler, Kunfermann, Lamprecht, Loepfe, Müller (Favugn), Papa, Perl, Preisig, Rettich, Ruckstuhl, Sax, Schmid, Schneider, Tanner, Ulber, Widmer (Favugn), Wilhelm, Zanetti (Landquart), Altmann, Bürgi-Büchel, Collenberg, Decurtins-Jermann, Pajic

Resposta da la regenza

La pandemia dal coronavirus tutga fermamain er l'economia grischuna, particular­main las interpresas en la chadaina da creaziun da valurs turisticas. Las conse­quen­zas concretas n'èn dentant betg anc visiblas en tut las fassettas, cunquai ch'ins sto er analisar l'effect dals agids voluminus da la Confederaziun e dal chantun per cas da direzza. Igl è incontestà che bleras interprendidras e blers interprendiders sco er acturas turisticas ed acturs turistics da tut gener èn dumandads ordvart fitg durant la pandemia dal coronavirus. La Confederaziun ed il chantun mettan gia a disposiziun vastas mesiras da sustegn en quest connex. I dovra dentant adina er ina iniziativa da vart da las interpresas.

Tar il punct 1: Per sviluppar e per realisar novs projects pon la Confederaziun ed il chantun dar impuls cun agid dals instruments da promoziun existents e facilitar u accelerar la realisaziun da projects. Ils criteris da promoziun sco er las resursas finanzialas previsas per quest intent èn concepids a lunga vista. La Regenza vesa avunda pussaivladads per sustegnair projects da svilup e da cooperaziun cun meds da promoziun chantunals, inclusiv meds finanzials en il rom da la Nova politica re­giu­nala da la Confederaziun (NPR). En il giudicament dal cas singul è la Regenza pron­ta da trair a niz la libertad d'agir, applitgond ils criteris da promoziun a favur da l'eco­nomia grischuna e da singuls purtaders da projects.

L'incumbensa qua avant maun pretenda plinavant ch'ils projects servian a la «reno­vaziun ecologica persistenta» (tenor l'Accord da Paris davart il clima). En il rom d'in giudicament confurm al stgalim resguarda il svilup turistic e regiunal tut las dimen­siuns da la persistenza. Sco princip da la promoziun è quai fixà er en l'art. 2 da la Lescha per promover il svilup economic en il chantun Grischun.

In'adattaziun generala dals criteris da promoziun, er mo durant in temp limità, n'è betg necessaria e cunvegnenta tenor l'avis da la Regenza. Las libertads d'agir exi­stentas èn suffizientas en il cas singul.

Tar il punct 2: Cunzunt en il sectur turistic pon las consequenzas da la pandemia dal coronavirus chaschunar ch'ils manaschis dovran lur reservas per surmuntar las sfi­das a curta vista e che quellas mancan lura per finanziar investiziuns futuras. Actual­main examinescha la Confederaziun, sch'i duai vegnir lantschà in program d'investi­ziun sin basa dals instruments da promoziun existents (Nova politica regiunala, So­cietad svizra da credit d'hotel [SCH] e.u.v.). En quest connex duai vegnir guardà spe­zial­main che projects d'investiziun impurtants possian vegnir realisads er vinavant.

Ina da las sfidas futuras è en spezial quella che interpresas turisticas relevantas per las destinaziuns mantegnian l'abilitad da far investiziuns. Perquai è la Regenza pron­ta d'examinar in program chantunal d'impuls tranter auter per projects d'investiziun en il turissem. Eventualas mesiras chantunalas ston vegnir coordinadas stretgamain cun mesiras da la Confederaziun.

Sin basa da questas explicaziuns propona la Regenza al Cussegl grond da refusar il punct 1 e d'acceptar il punct 2 da l'incumbensa qua avant maun. 

30 d'avrigl 2021