Ils 27 da settember 2020 han las votantas ed ils votants svizzers refusà la revisiun da la Lescha da chatscha a l'urna. Suenter la votaziun han tuttas duas varts accentuà lur prontezza da reprender il tema e d'elavurar in cumpromiss.
Dapi la remigraziun dals emprims lufs en il Grischun è lur dumber creschì pli e pli fitg – en il fratemp s'augmenta il dumber fermamain. En differentas valladas èn s'etablids plirs trieps. L'augment dal dumber da lufs chaschuna adina dapli conflicts tranter ils interess da la protecziun da las spezias e da l'agricultura da muntogna. Ultra da quai dovri temp per che las mesiras optimadas per la protecziun da muntaneras possian vegnir installadas cun success.
Sut quest aspect poi vegnir constatà ch'il basegn d'agir areguard il luf è, circa 1 onn suenter la votaziun dal pievel dals 27 da settember 2020, anc adina avant maun. Quai vul dir: Per meglierar la coexistenza tranter il luf e tut las parts participadas, dovri ina revisiun parziala da la Lescha federala da chatscha.
Las sutsegnadras ed ils sutsegnaders supplitgeschan perquai il Cussegl grond da prender in conclus direct e da deliberar – sin fundament da l'artitgel 59 da la Constituziun chantunala – la suandanta iniziativa dal chantun per mauns da l'Assamblea federala:
Sa basond sin l'artitgel 160 alinea 1 da la Constituziun federala inoltrescha il chantun Grischun tras il Cussegl grond la suandanta iniziativa dal chantun:
La Lescha federala davart la chatscha e la protecziun dals mamifers e dals utschels selvadis (LChP) sto vegnir adattada – resguardond la Convenziun da Berna – en quel senn, ch'ella permetta in nov management da lufs.
Ils chantuns pon prevair ina regulaziun da las populaziuns da lufs, sche mesiras da protecziun raschunaivlas na bastan betg e sche la regulaziun vegn fatga per impedir gronds donns u la periclitaziun concreta da l'uman. Talas regulaziuns na dastgan betg periclitar las populaziuns da lufs e ston esser proporziunalas. Per garantir ina pratica respectiva unitara en Svizra, sto vegnir previs il consentiment da la Confederaziun en chaussa.
Il project legislativ che vegn prendì en mira cun questa iniziativa dal chantun, duai vegnir elavurà en stretga collavuraziun cun l'agricultura da muntogna ch'è pertutgada directamain, cun las represchentanzas d'interess dal guaud, cun las federaziuns da l'ambient e da la protecziun dals animals sco er cun ils chantuns da muntogna.
Cuira, ils 20 d'october 2021
Horrer, Schwärzel, Cantieni, Alig, Atanes, Baselgia-Brunner, Cahenzli-Philipp, Caviezel (Cuira), Degiacomi, Gartmann-Albin, Hofmann, Müller (Favugn), Noi-Togni, Perl, Preisig, Rettich, Rutishauser, Wilhelm, Pajic, Stieger, Tomaschett (Cuira)