La segirezza dal provediment d'electricitad è essenziala per che nossa societad e nossa economia possian funcziunar. En il sectur da l'electricitad vegn la segirezza dal provediment considerada sco garantida, sch'igl è pussaivel da retrair mintga mument la quantitad da forza electrica che vegn duvrada en la qualitad necessaria e per tariffas resp. pretschs commensurads. La segirezza dal provediment cuntegna ils aspects da la fidadadad, da la segirezza e da la commensurabladad. Per la fidadadad e per la segirezza èn essenzials ils aspects tecnics e manaschials. Quests dus aspects sa distinguan tendenzialmain tras in orizont da temp a curta vista. La commensurabladad (adequacy) ha en mira l'orientaziun strategica a lunga vista en ils secturs da la generaziun e da l'utilisaziun cun ina infrastructura da rait correspundena. L'electricitad sto adina vegnir producida en quella quantitad ch'ils consuments la dovran. Actualmain sustegnan passa 40 lingias d'electricitad transcunfinalas questa ballantscha. Tras questas lingias è la rait da transmissiun svizra colliada stretgamain cun la rait europeica. Quests puncts da referiment augmentan la segirezza dal provediment d'electricitad e contribueschan a la rentabilitad da noss provediment d'electricitad: En cas da basegn po la Svizra importar electricitad, en cas d'in surpli po ella exportar. Ina stgarsezza d'electricitad da pli lunga durada avess consequenzas pli grevas.

Tar il punct 1: Critic per il provediment d'electricitad è il semester d'enviern, durant
il qual la Svizra è gia oz dependenta d'imports. Il chantun Grischun ha bain in bun punct da partenza cun ina producziun d'electricitad da var 8 TWh ed in consum da var 2 TWh. Sch'il barat cun ils stadis vischins n'è betg garantì (cumplainamain), sto il provediment d'electricitad en situaziuns da crisa tuttina vegnir prendì per mauns per l'entira Svizra. Las cumpetenzas tranter las autoritads e las interpresas da la branscha d'electricitad resultan da l'art. 6 al. 2 da la Lescha d'energia (LEG; CS 730.0). Tenor quest artitgel è il provediment chaussa da l'economia d'energia. Sche las interpresas n'adempleschan betg lur incumbensas, po il Cussegl federal sin proposta da la Cumissiun federala per l'electricitad (ElCom) ed en enclegientscha cun l'Uffizi federal per il provediment economic dal pajais (UFPE) prender mesiras – tenor l'art. 9 da la Lescha federala davart il provediment d'electricitad (LPrEl; CS 734.7) – per garantir subsidiarmain il provediment a media fin a lunga vista. Il Cussegl federal po ultra da quai en il rom dal provediment economic dal pajais sin proposta da la ElCom e dal UFPE prender mesiras a curta vista per eliminar immediatamain stgarsezzas d'electricitad temporaras (art. 31 ss. da la Lescha federala davart il provediment economic dal pajais [LPEP; CS 531]).

Tar il punct 2: Cun il relasch da la LPrEl l'onn 2007 è sa midada fundamentalmain l'economia d'electricitad. Per il cas d'ina ferma stgarsezza d'electricitad sto l'Associaziun da las interpresas electricas svizras (AES) prender las mesiras preparatoricas necessarias en ils secturs da la producziun, da l'acquisiziun, dal transport, da la repartiziun e dal consum d'electricitad. Il sectur spezial energia sco er la AES collavuran en cas d'ina ferma stgarsezza cun l'Uffizi federal d'energia (UFE), cun la ElCom, cun la societad da rait naziunala Swissgrid, cun l'armada, cun la protecziun da la populaziun e cun ils chantuns. Tenor l'art. 6 da la Lescha davart la protecziun da la populaziun en il chantun Grischun (LPPC; DG 630.000) nominescha la Regenza per dumagnar situaziuns extraordinarias in stab directiv chantunal (SDC) ch'elavura las basas da decisiun per la Regenza. Il november 2014 ha il SDC manà tras in exercizi da la rait da segirezza infurmativ cun il scenari «interrupziun dal provediment d'electricitad». En vista al di da furmaziun supplementara dals 10 da matg 2022 è vegnì tschernì il tema «interrupziun dal provediment d'electricitad» sco punct central per la preparaziun optimala dal SDC.

Sa basond sin questas explicaziuns propona la Regenza al Cussegl grond da refusar questa incumbensa.

24 da favrer 2022