Navigation

Inhaltsbereich

Dumonda Valär concernent la revisiun parziala da la LItCCS Cussegl grond

Sessiun: 21.04.2022

Ils 19 da december 2008 ha l'Assamblea federala deliberà la revisiun totala dal dretg tutelar ch'è entrà en vigur il 1. da schaner 2013 sut il nov num dretg da la protecziun d'uffants e da creschids (DPUC). Quest dretg ha pretendì en moda rigurusa da midar da las autoritads da milissa e da laics d'emprima instanza ad autoritads per la protecziun d'uffants e da creschids (APUC) professiunalas e da cumposiziun interdisciplinara. Sin plaun chantunal è il nov dretg vegnì realisà tras ina revisiun parziala da la Lescha introductiva tar il Cudesch civil svizzer (LItCCS; DG 210.100) sco er tras il relasch d'ina Ordinaziun davart la protecziun d'uffants e da creschids (OPUC; DG 215.010). La protecziun d'uffants ha dentant subì dapi lura midadas d'impurtanza considerabla, pervia da las revisiuns dal dretg dals uffants. Cun ina revisiun parziala da la LItCCS il favrer 2021 ha il Cussegl grond tegnì quint da las experientschas ch'èn vegnidas fatgas tras il transferiment da la fasa da pionier ad ina la fasa da consolidaziun ed en il nov dretg da la protecziun d'uffants e da creschids. L'art. 63a al. 3 fin al. 7 LItCCS revedida regla la finanziaziun dals custs da las mesiras staziunaras per la protecziun d'uffants. Da nov sto la vischnanca al domicil civil da l'uffant pertutgà surpigliar resp. pajar anticipadamain quests custs (art. 63a al. 3).

Il process da rendaquint per las mesiras staziunaras da la protecziun d'uffants mussa dentant problems considerabels gia suenter las emprimas experientschas cun al realisar en la pratica. Per pudair examinar, calcular ed eventualmain er pretender las contribuziuns pussaivlas dals geniturs ston las vischnancas esser orientadas davart las mesiras e dumandar ils documents necessaris dals titulars da la tgira genituriala. Pervia da la cumpetenza linguistica resp. cognitiva mancanta, pervia d'ina refusa e.u.v. na vegnan quests documents dentant per part betg inoltrads. En cas da dispita sto ultra da quai vegnir purtà plant sin mantegniment envers ils geniturs – quai che n'è betg pussaivel tras ina disposiziun suverana d'ina vischnanca. Las incumbensas che ston vegnir ademplidas en connex cun quests process e che cumpiglian la regulaziun, l'accumpagnament dal process, la contabilitad, la coordinaziun cun auters uffizis sco er il controlling, pretendan obligatoricamain dapli resursas da persunal e ston pervia da las differentas cumpetenzas vegnir repartidas sin pliras persunas.

Quellas contribuziuns dals geniturs che vegnan pajadas sur l'agid social economic pervia da meds finanzials mancants, ston – en cas da persunas estras – vegnir annunziadas a l'Uffizi da migraziun, sch'ellas chaschunan il pajament da prestaziuns da provediment. En la pratica po pia il fatg da retrair prestaziuns da provediment avair in dischavantatg per la procedura da permissiun da dimora. En cas da titulars da la tgira genituriala cun domicil ordaifer il chantun na po plinavant betg vegnir applitgada la lescha chantunala (LItCCS).

Perquai tschentan las sutsegnadras ed ils sutsegnaders las suandantas dumondas a la Regenza:

  1. Cun la revisiun totala da la Lescha tutelara è la professiunalisaziun vegnida francada en la lescha. Pertge prevesa la lescha chantunala ussa – en il sectur da la surpigliada dals custs en la protecziun d'uffants – d'attribuir l'incarica «process da rendaquint e contribuziun dals geniturs» ad in'autoritad da milissa e da laics ed uschia da laschar elavurar tut las datas persunalas e spezialmain degnas da protecziun da las persunas pertutgadas tras questa autoritad? Co pon ins ultra da quai proteger las persunas pertutgadas, sch'i dat il conflict che l'autoritad da milissa è a medem temp er patruna?
  2. Per las APUC èn vegnidas creadas 7,2 novas plazzas a temp cumplain, però betg per las vischnancas che han survegnì lavur supplementara tras da la revisiun. Il proceder en il process da rendaquint chaschuna in transferiment da las chargias sin las vischnancas che na po betg vegnir cuvrì cun la contribuziun dals geniturs da 20 pertschient e che na vegn betg resguardà en la gulivaziun da las grevezzas socialas (GGS). Co pensa la Regenza da far ina gulivaziun?
  3. La noziun «sava d'entrada» inditgescha l'import minimal calculatoric per valitar il basegn da sustegn. Vegn la contribuziun dals geniturs resguardada en la calculaziun e po quai chaschunar l'obligaziun d'annunzia tar geniturs cun permissiun da dimora?
  4. Tar geniturs ch'etableschan in domicil ordaifer il chantun na po betg vegnir applitgada la calculaziun da la contribuziun dals geniturs tenor l'art. 63a al. 4 da la LItCCS, cuntrari a geniturs ch'etableschan in domicil en il chantun. Tge capita en la pratica en tals cas? Correspunda quai als princips da l'egualitad giuridica?
  5. Da nov calculeschan e disponan las vischnancas la contribuziun dals geniturs. En vischnancas pitschnas ha quai per consequenza che las persunas pertutgadas vegnan stigmatisadas. Co pensa la Regenza d'eliminar questa problematica?

Cuira, ils 21 d'avrigl 2022

Valär, Preisig, Sax, Alig, Berther, Berweger, Brandenburger, Caluori, Cantieni, Censi, Claus, Degiacomi, Dürler, Ellemunter, Engler, Favre Accola, Felix, Flütsch, Föhn, Gugelmann, Hartmann-Conrad, Hitz-Rusch, Hohl, Holzinger-Loretz, Jochum, Kienz, Kunz (Cuira), Lamprecht, Marti, Mittner, Natter, Niggli-Mathis (Grüsch), Noi-Togni, Papa, Ruckstuhl, Rüegg, Stiffler, Tanner, Thomann-Frank, Thür-Suter, Tomaschett-Berther (Trun), von Ballmoos, Weidmann, Wellig, Wieland, Wilhelm, Bürgi-Büchel, Patzen, van Kleef

Resposta da la regenza

Tar la dumonda 1: La midada da l'art. 63a da la Lescha introductiva tar il Cudesch civil svizzer (LItCCS; DG 210.100) per il 1. da schaner 2022 n'ha gì nagina influenza sin il barat da datas tranter la APUC e la vischnanca. Da nov prendan las vischnancas dentant enconuschientscha da tut ils custs che resultan en la protecziun d'uffants. Cun consegnar extracts dal dispositiv da la decisiun vegn la circulaziun da las datas restrenschida sin il minimum necessari per proteger las persunas pertutgadas. Sch'ina vischnanca, sco patruna, prenda enconuschientscha d'ina mesira da la protecziun d'uffants, vegn la collavuratura pertutgada u il collavuratur pertutgà protegì tras il secret d'uffizi tenor l'art. 320 dal Cudesch penal svizzer (CP; CS 311.0). Las datas persunalas dastgan vegnir elavuradas mo per l'intent ch'è vegnì inditgà a chaschun da la procuraziun da las datas, che resorta da las circumstanzas u ch'è previs tenor lescha. Plinavant ston las datas persunalas vegnir protegidas cunter mintga elavuraziun nunautorisada, tras mesiras tecnicas ed organisatoricas adequatas (art. 4 al. 3 ed art. 7 da la Lescha federala davart la protecziun da datas [LPD; CS 235.1]). Dal rest ston ins partir d'ina gestiun dal persunal irreproschabla tras la vischnanca, che respecta ils secturs da la vita privata da las collavuraturas e dals collavuraturs.

Tar la dumonda 2: Gia avant il 1. da schaner 2022 ha la vischnanca examinà ina participaziun als custs da vart dals geniturs. Quai ha ella fatg en il rom da l'agid social economic. En connex cun questa examinaziun stueva vegnir resguardada regularmain la pretensiun envers l'auter genitur da pajar il mantegniment dals uffants, quai ch'equivala a la calculaziun dad oz da las contribuziuns dals geniturs. Cumbain che la calculaziun da las contribuziuns dals geniturs vegn definida da la Conferenza svizra da l'agid social (COSAS), n'èn quai betg custs da l'agid social. En il cas singul n'augmentan las novas incumbensas ni ils custs da scleriment ni la cumplexitad da las dumondas giuridicas che sa tschentan. Ellas chaschunan però custs supplementars pervia dal dumber dals cas che vegnan reglads tar la vischnanca. L'obligaziun da cooperar dals geniturs, che pretenda da communitgar las relaziuns finanzialas, è anc adina d'ina impurtanza centrala. En il barat cooperativ cun ils geniturs po la vischnanca far ina cunvegna consensuala, uschia che la calculaziun da la contribuziun dals geniturs croda davent dal tuttafatg. Cun las 7,2 plazzas a temp cumplain ch'èn vegnidas stgaffidas da nov, han ins per l'ina pudì rectifitgar la calculaziun iniziala fallida areguard il basegn da persunal e per l'autra occupar il stab da la APUC ch'è vegnì creà da nov.

Tar la dumonda 3: Las titularas ed ils titulars da la tgira genituriala sa participeschan als custs da mesiras per la protecziun d'uffants en la dimensiun da la contribuziun dals geniturs ch'è vegnida definida da la COSAS. Sch'els n'han betg las capacitads economicas da pajar la contribuziun dals geniturs minimala da 10 francs per di, surpiglia la communitad ch'è cumpetenta per il sustegn public da las titularas e dals titulars da la tgira genituriala (art. 63a al. 4 LItCCS). Questa contribuziun dals geniturs en la dimensiun da 10 francs per di represchenta l'agid social e chaschuna correspundentamain in'obligaziun d'annunzia en il senn da l'art. 82b da l'Ordinaziun davart l'admissiun, la dimora e l'activitad da gudogn (OADA; CS 142.201). Ins po partir dal fatg, che questa regulaziun vegn applitgada per gronda part per persunas che retiran gia agid social, uschia che la cumpetenza na vegn betg midada.

Tar la dumonda 4: La cumpetenza per surpigliar ils custs da las mesiras da la protecziun d'uffants po sa midar durant ina mesira currenta da la protecziun d'uffants, perquai ch'ils geniturs translocheschan en in auter chantun. La vischnanca ch'è obligada da pajar, è responsabla per examinar e per sclerir cuntinuadamain la cumpetenza. Pervia da la structura federalistica èn las regulaziuns chantunalas concernent surpigliar ils custs da las mesiras da la protecziun d'uffants tras il maun public daventadas eterogenas e ston pia vegnir scleridas per mintga cas singul.

Tar la dumonda 5: En il barat cooperativ cun ils geniturs po la vischnanca far ina cunvegna consensuala ubain instradar la via giudiziala davant la dretgira civila. Uschia n'è la disposiziun precedenta da conceder agid social economic betg pli admessa en quest connex. Ch'ils custs da las mesiras staziunaras da la protecziun d'uffants vegnan scuntrads sur il pool e ch'ils custs che vegnan surpigliads da la vischnanca – cun excepziun dals cas tractads tar la dumonda 3 – n'èn betg custs da l'agid social, impedescha medemamain la stigmatisaziun temida. Dal rest saja renvià analogamain a las explicaziuns qua survart tar la dumonda 1.

22 da zercladur 2022