Navigation

Inhaltsbereich

Dumonda Tomaschett concernent il tunnel dal Tödi: Cura vegn quel realisà?

Sessiun: 03.09.2022

Ils 29 d'avust 2013 hai jau fatg a la Regenza la dumonda concernent las schanzas per ina realisaziun dal tunnel dal Tödi. Quel duai dar novs impuls a la Surselva e gidar a dumagnar cun success las sfidas d'ina regiun da muntogna. Il tunnel vegn menziunà sco varianta en il studi «Zu(g)kunft Graubünden». La colliaziun da tren tranter Linthal e Trun pudess colliar la Surselva en 75 minutas cun la metropola Turitg. Fin ussa fineschan ils binaris a Linthal.

La Regenza grischuna ha respundì quella giada, ch'il project Tödi na saja fin lura anc betg vegnì discutà cun la Regenza glarunaisa. Ella saja dentant pronta da tematisar proximamain quest project cun la Regenza glarunaisa per vegnir a savair, co ch'ella valiteschia eventuals scleriments, che stuessan vegnir fatgs cuminaivlamain, davart ils avantatgs ed ils dischavantatgs d'in tal project.

Ils 17 da mars 2022 ha il cusseglier dals chantuns Mathias Zopfi (Glaruna) inoltrà en il Cussegl dals chantuns l'interpellaziun 22.3245 cun il titel «Töditunnel. Wann ist dieser zusätzliche Zugang zum Schmalspurnetz realistisch?» Il Cussegl federal explitga en sia resposta, che la valitaziun d'ina cumplettaziun da la rait a binaris stretgs na saja fin ussa betg vegnida examinada, perquai ch'ils chantuns involvids n'hajan betg annunzià il basegn d'ina colliaziun

Las sutsegnadras ed ils sutsegnaders supplitgeschan la Regenza da respunder las suandantas dumondas:

  1. Tge ha la Regenza prendì concretamain per mauns concernent la lingia dal tunnel dal Tödi dapi mia dumonda da l'avust 2013?
  2. Mida la resposta dal Cussegl federal dals 18 da matg 2022 a l'interpellaziun 22.3245 insatge en la politica da traffic da la Regenza?
  3. Vegn la Regenza ad annunziar a la Confederaziun – tenor l'artitgel 48d da la Lescha federala davart las viafiers – il basegn per in studi concernent la realisaziun dal tunnel dal Tödi en vista ad in proxim pass da cumplettaziun?

Cuira, ils 3 da settember 2022

Tomaschett, Luzio, Sgier, Berther, Bettinaglio, Brandenburger, Brunold, Casutt, Collenberg, Crameri (Surava), Degiacomi, Della Cà, Dietrich, Epp, Hohl, Kohler, Loepfe, Maissen, Michael (Donat), Righetti, Sax, Schutz, Spagnolatti, Zanetti (Landquart)

Resposta da la regenza

La finanziaziun d'infrastructuras da viafier è chaussa da la Confederaziun. Per regla pon ils chantuns inoltrar mintga 10 onns novs concepts da purschidas sur la regiun da planisaziun, a la quala els èn attribuids (per il chantun Grischun è quai la regiun da planisaziun Ost). Quests concepts vegnan lura valitads da l'Uffizi federal da traffic (UFT).

Tar la dumonda 1: L'Uffizi federal da traffic (UFT) determinescha criteris per ina inol­traziun en il pass da cumplettaziun dal Program da svilup strategic da l'infrastructura da viafier (PC PROSSIV). En in conclus federal vegnan lura deliberads ils projects correspundents per il proxim PC PROSSIV. Suenter avair respundì a la dumonda Tomaschett concernent il tunnel lingia Tödi da l'onn 2013 en il Cussegl grond ha il chantun Grischun – en enclegientscha cun il chantun Glaruna – bain tegnì pendenta l'idea dal project, dentant betg persequità vinavant quella cun prioritad. Questa deci­siun han ins prendì sin basa dals criteris da valitaziun da la Confederaziun. Tenor las premissas da la Confederaziun era l'idea dal project «tunnel dal Tödi» pauc emper­mettenta, damai che auters projects da la regiun da planisaziun avevan ina priorisa­ziun pli auta. Perquai n'è l'idea dal project «tunnel dal Tödi» betg vegnida messa sin la glista d'inoltraziuns da la regiun da planisaziun.

Tar las dumondas 2 e 3: I na dat nagins indizis, ch'ils criteris dal UFT sajan sa mi­dads talmain u ch'els vegnian anc a sa midar, uschia che l'inoltraziun dal project qua avant maun avess meglras schanzas e ch'ella vegniss tras quai valitada autramain ch'en il rom da l'evaluaziun tar il PC PROSSIV 2035. Las premissas per l'elavuraziun d'in studi tenor l'artitgel 48d da la Lescha federala davart las viafiers (LViafier; CS 742.101) n'èn pia betg ademplidas. Ultra da quai stoi vegnir remartgà, ch'auters pro­jects d'infrastructura da viafier han in pli grond niz per l'economia publica dal chantun Grischun, e quai tant per la populaziun, per il turissem sco er per l'economia. Quests auters projects ston pia vegnir tractads cun pli auta prioritad ch'il project «tunnel dal Tödi».

26 d'october 2022