Il mantegniment da l'urden public e da la segirezza publica è tenor l'art. 79 da la Constituziun dal chantun Grischun (CC; DG 110.100) da princip ina incumbensa cuminaivla dal chantun e da las vischnancas. Las vischnancas adempleschan las incumbensas che las èn vegnidas surdadas sco er tut las fatschentas localas ch'il dretg chantunal na regla betg u betg definitivamain (art. 48 da la Lescha da visch­nancas dal chantun Grischun [LV; DG 175.050]). Perquai fixescha l'art. 3 da la Le­scha da polizia dal chantun Grischun (LPol; DG 613.000) che las vischnancas adempleschan sin lur territori quellas incumbensas da polizia, per las qualas il chantun n'è betg responsabel. Quai cumpiglia en spezial il mantegniment da quietezza, urden e segirezza. Plinavant èn las vischnancas responsablas per autorisar l'utilisaziun dal terren public (art. 3a LPol). Avant che conceder la per­missiun, ston ellas consultar la Polizia chantunala, sch'i vegn fatg quint ch'i dovria in'acziun da polizia. Per occurrenzas, per las qualas ina permissiun per l'utilisaziun dal terren public vegn dumandada, stoi da princip vegnir resguardà, che l'organisatur e la persuna da contact sajan enconuschents ed i sto vegnir inoltrà in concept da se­girezza e sanitad e/u da traffic che dependa da la grondezza da l'occurrenza. Ultra da quai ston vegnir consideradas – en dependenza dal lieu da l'occurrenza – even­tualas restricziuns tras ulteriuras leschas (p.ex. Lescha chantunala davart il guaud, Lescha davart las vias, Lescha da vischnancas). Er in'assicuranza da responsabla­dad per l'occurrenza sto esser avant maun.

Tar la dumonda 1: Qua avant maun sa tractavi d'ina occurrenza (betg permessa) ch'è vegnida realisada sin il territori da la vischnanca da Roveredo. En tals cas è da princip la vischnanca pertutgada responsabla per observar la quietezza, l'urden e la segirezza. En quest connex po ella clamar il sustegn da la Polizia chantunala (cf. art. 5 al. 2 LPol).

Tar la dumonda 2: Sch'ina occurrenza vegn manada tras senza permissiun, q.v.d. en moda illegala, e sche la Polizia chantunala survegn enconuschientscha da quella, surveglia ella l'occurrenza tenor ses catalog d'incumbensas ed infurmescha la visch­nanca pertutgada. In'ulteriura intervenziun vegn mo fatga sin dumonda da la visch­nanca u tar eveniments penals u en cas d'ina situaziun da periclitaziun. Ultra da quai pretenda in princip constituziunal ch'in agir dal stadi stoppia esser commensurà (art. 5 al. 2 CC). En il cas qua avant maun è l'occurrenza betg permessa vegnida surve­gliada pliras giadas da la Polizia chantunala ed i èn vegnidas fatgas pliras controllas da traffic. En quest connex èn vegnids constatads e chastiads delicts cunter la legi­slaziun davart il traffic sin via. Perquai che l'occurrenza è stada paschaivla e perquai che la vischnanca n'aveva er betg fatg ina dumonda per agid uffizial, n'ha la Polizia chantunala gì nagin motiv d'intervegnir ulteriuramain. Tant pli ch'i n'ha betg dà an­nun­­zias da la populaziun davart disturbis. La Polizia chantunala ha immediatamain prendì tut las mesiras da retschertga e d'inquisiziun necessarias, suenter ch'ella ha survegnì l'annunzia da l'ospital da Bellinzona, ch'ina dunna giuvna senza conscienza saja vegnida ospitalisada. Sin questa basa vegn ussa manada ina procedura penala.

Tar la dumonda 3: Igl è chaussa da las vischnancas da procurar en connex cun oc­cur­renzas ch'in concept per il servetsch da sanitad correspundent vegnia elavurà e realisà (art. 6 da la Lescha davart la protecziun da la sanadad en il chantun Grischun [DG 500.00]), uschenavant che questa incumbensa n'è betg vegnida surdada al chan­tun, èn numnadamain las vischnancas responsablas per la protecziun da la sanadad da la populaziun. Las basas giuridicas existentas bastan per prender las mesiras necessarias en connex cun occurrenzas betg permessas. Cuntravenziuns, sco en il cas qua avant maun, vegnan persequitadas penalmain. Tar occurrenzas che vegnan identifitgadas sco betg permessas èsi er pli cunvegnent, sche la visch­nanca – eventualmain cun agid da la Polizia chantunala – ordinescha consequenta­main da terminar l'occurrenza, premess che quai vegnia giuditgà sco commensurà. Ultra da quai èsi da partir dal fatg, ch'er sch'il legislatur chastiass las persunas che na dumondan betg ina permissiun, che quai n'avess betg in effect decuraschant supplementar. Pli raschunaivel che scumonds supplementars èn mesiras da scleri­ment e da sensibilisaziun sco er lieus, nua ch'ils giuvenils pon sa scuntrar legalmain e senza disturbis, e nua ch'i vegn purschida ina cussegliaziun nunbirocratica che rinforza ils giuvenils en lur atgna responsabladad.

1. da mars 2023