Tar la dumonda 1: Il Departament federal per ambient, traffic, energia e communica­ziun (DATEC) è vegnì incumbensà da preschentar opziuns fin la fin da l'onn 2023, quai per dar impuls d'augmentar l'access al bindel ultralad er en las regiuns ed en las vischnancas situadas lunsch davent dals centers d'aglomeraziun. Sche e cura che la Confederaziun vegn a metter a disposiziun effectivamain meds finanzials da promo­ziun per avair access ad infrastructuras a bindel lad e tge ch'èn las premissas per quai, è actualmain avert. Tar las dumondas anc betg scleridas tutgan per exempel la dumonda da la finanziaziun d'in eventual program federal, ils criteris, tenor ils quals ina finanziaziun duai vegnir fatga u tge dimensiun che la contribuziun federala vegn ad avair.

Il chantun Grischun beneventa las stentas da la Confederaziun da proveder tut ils ter­­ritoris en l'entira Svizra cun infrastructuras da bindel ultralad. En spezial regiuns e vischnancas perifericas, pauc populadas e cun cundiziuns topograficas pretensiusas, èn dependentas da mesiras da vart dal maun public per obtegnair in access adequat cun infrastructuras a bindel fitg lartg. Quellas èn en spezial essenzialas per mantegn­air la cumpetitivitad en regiuns ed en vischnancas perifericas. Gia l'onn 2018 ha il chan­­tun Grischun cumenzà in agen program da promoziun per bindel ultralad. Act­ual­­main lavuran differentas regiuns en il chantun vi da la realisaziun da quel. Cun la publicaziun dal rapport dal Cussegl federal dals 26 da zercladur 2023 ha la Regenza prendì enconuschientscha, che las orientaziuns van dal punct da vista material prin­ci­palmain en la medema direcziun, co ch'il program da promoziun dal chantun Gri­schun prevesa quai. Sch'i duess dar novas enconuschientschas suenter avair con­cre­­­ti­­sà ils plans federals, vegnan quellas integradas en las ponderaziuns chantuna­las.

Tar la dumonda 2: Gea. Differents represchentants dal chantun èn en in barat regu­lar cun ils represchentants da la Confederaziun – dentant er cun auters purtaders da decisiuns relevants – che pon porscher ina contribuziun per in access sistematic ed effizient da las regiuns dal chantun Grischun cun infrastructuras a bindel fitg lartg.

Tar la dumonda 3: Guardar resposta a la dumonda 1. Actualmain èsi anc memia baud per far ina valitaziun davart pussaivlas contribuziuns finanzialas da vart da la Confederaziun per pussibilitar l'access da corporaziuns territorialas al bindel ultralad. Gia oz po dentant vegnir constatà, ch'i dess mo là in sustegn statal, nua ch'il martgà na metta betg gia sez a disposiziun ina purschida.

Tar la dumonda 4: Ord vista da la Regenza exista cun il program chantunal da bindel ultralad gia oz in instrument da promoziun adequat per dar access a las infrastructu­ras da bindel ultralad a las vischnancas ed a las regiuns en il chantun. Uschia han las regiuns in instrument per mauns ch'ellas pon applitgar immediatamain. Cun inol­trar in concept regiunal d'access pon vegnir dumandads meds finanzials cumplemen­tars dal chantun. Tras quai na datti nagins retards pervia da las mesiras da promo­ziun anc betg cleras da vart da la Confederaziun.

Tar la dumonda 5: Il pli baud la fin da quest onn vegn il DATEC responsabel a pre­schentar opziuns incl. criteris da promoziun e pussaivladads da finanziaziun. Il pro­cess politic suandant pretendess probablamain anc in temp pli lung. Uschia sa basa la Regenza dal chantun Grischun vinavant sin il program da promoziun existent da bindel ultralad e persequitescha quel en moda consequenta. Uschespert che las op­ziuns e l'ulteriur urari da la Confederaziun èn preschentads, vegn il chantun a giudi­tgar da nov la situaziun, e sche inditgà, a far las adattaziuns necessarias.

26 d'october 2023