Navigation

Inhaltsbereich

Dumonda Metzger concernent la furniziun d'electricitad da las Ovras electricas d'Engiadina SA a la Grischelectra SA

Sessiun: 15.02.2023

Il chantun e las vischnancas concessiunaras han cedì a la Grischelectra SA (GESA) lur dretg da 18 pertschient d'energia ord la participaziun a las Ovras electricas d'Engiadina SA (OEE). Las OEE produceschan lur electricitad dapi 5 onns per sut 5 raps per ura kilowatt, l'onn 2020/21 schizunt per 3.83 raps. Tenor rapports en las medias ha il president dal cussegl d'administraziun da las OEE Martin Schmid confermà, che las OEE hajan acquistà per l'onn 2023 electricitad sin il martgà per in pretsch da 55 raps per ura kilowatt. Cumpareglià cun l'onn 2021 vegnan ils custs annuals da las OEE per il 2023 probablamain pli che dublegiads. Quai na tutga betg mo las consumentas ed ils consuments en las vischnancas concessiunaras da las OEE (Valsot, Scuol, Zernez e S-chanf), mabain er la GESA che sto surpigliar l'energia ord la participaziun per il pretsch dubel. Chantun e vischnancas apportan per onn passa 200 uras gigawatt electricitad da las OEE en la GESA. Quai correspunda a stgars 40 pertschient da l'entira energia da la GESA. In pretsch dubel vegn perquai ad avair influenza sin l'import supplementar che sto vegnir prestà tenor il contract da partenadi ed uschia sin las finanzas chantunalas, gea schizunt sin la Repower SA che surpiglia l'energia inclusiv l'import supplementar da la GESA. 

Sut quest aspect vulan las sutsegnadras ed ils sutsegnaders savair da la Regenza:

  1. È la Regenza pronta da sclerir, tge che ha motivà las OEE SA da cumprar electricitad per 55 raps/kWh, malgrà ch'ella producescha sezza electricitad sut 5 raps/kWh?
  2. È la Regenza pronta da sclerir, sch'il pretsch da 55 raps/kWh che las OEE SA han pajà è effectivamain vegnì scrit ora sin il martgà public e co che quest pretsch è vegnì fixà?
  3. È la Regenza er da l'avis ch'il pretsch da cumpra da 55 raps/kWh è ina consequenza unica da la guerra e ch'in augment respectiv dals pretschs per l'energia da la GESA – pervia da tals acquists d'electricitad supplementars – cuntrafa perquai al princip da la buna fai?
  4. La furmaziun dals pretschs sin il martgà d'energia public da l'Europa vegn fixada tras l'uschenumnà princip da «merit order». Quest princip procura che l'ovra electrica la pli chara fixescha er il pretsch per purschiders precedents. Dapi il cumenzament da la guerra è quai stà – per motivs enconuschents – per il solit il pretsch da gas europeic. Blers pajais da la UE han perquai limità il pretsch da gas. Vesa la Regenza ina pussaivladad d'intervegnir, per che quest princip da «merit order» na possia betg pli influenzar ils pretschs d'electricitad grischuns en il futur?
  5. È la Regenza pronta da communitgar a las OEE ed a lur societads partenarias ch'il chantun na tolereschia betg in tal proceder, ch'el pretendia ina correctura dal pretsch da producziun 2023 da las OEE sin in'autezza senza acquist d'electricitad memia chara e ch'el haja la finamira da far ina cunvegna a lunga vista che impussibilitescha talas influenzas sin il pretsch d'electricitad?

Cuira, ils 15 da favrer 2023

Metzger, Städler, Adank, Biert, Brandenburger, Candrian, Cortesi, Della Cà, Grass, Heim, Hug, Krättli, Morf, Rauch, Roffler, Salis, Sgier, Weber

Resposta da la regenza

Ils custs da producziun da las Ovras electricas d'Engiadina SA (OEE) han importà 4,8 raps per ura kilowatt (rp./kWh) en la media dals ultims 10 onns da gestiun. 5,83 rp./kWh l'onn da gestiun 2021/22 e 3,83 rp./kWh l'onn avant.
Ina influenza decisiva sin ils custs da producziun han tranter auter l'idrologia sco er la taxa d'energia netta. La cumpart d'energia da la participaziun da las OEE da las visch­­nancas concessiunaras e dal chantun vegn, ultra d'ulteriurs pachets d'energia da participaziun d'autras societads d'ovras electricas, furnida a la Grischelectra SA (GESA).

Tar la dumonda 1: Il chantun e las vischnancas concessiunaras èn represchentads tras la Repower SA en las cumissiuns spezialisadas da las OEE «conferenza da ge­stiun», «cumissiun tecnica» e «cumissiun da finanzas» sco er cun mintgamai ina com­membra u in commember en il cussegl d'administraziun da las OEE. Las visch­nancas concessiunarias han annualmain il dretg da decider fin ils 31 da mars, sch'ellas vulan retrair da las OEE per l'onn proxim energia supplementara per ils custs da producziun respectivs, augmentà per 1 rp. (= dretg da retratga tenor la con­cessiun, ma nagina obligaziun). Tranter il 1. d'october 2013 ed ils 31 da december 2019 han las vischnancas concessiunaras decidì da retrair nagina energia da las OEE, perquai che l'energia era pli favuraivla al martgà ed ellas han uschia pudì cumprar l'energia per custs da producziun pli bass che tar las OEE. Quai ha sa midà l'onn 2020, cura che las vischnancas concessiunaras han decidì da retrair a partir dal 1. d'october da l'onn menziunà l'energia supplementara puspè da las OEE. En cas che las vischnancas giavischassan energia supplementara, ha il cussegl d'admini­stra­ziun decidì gia l'onn 2011 da mintgamai cumprar quella externamain ensemen cun l'agen diever sco er cun l'energia gratuita e cun l'energia da preferenza. Quest proceder era vegnì approvà tant da la persuna che ha represchentà lungs onns las vischnancas concessiunaras en il cussegl d'administraziun sco er dal represchentant dal chantun. Er il fanadur 2022 è questa acquisiziun puspè vegnida approvada un­ani­mamain per in ulteriur onn. Perquai ch'ils pretschs d'electricitad eran s'augmen­tads fermamain quella giada, èn ils custs d'acquisiziun stads pli auts cumpareglià cun l'onn precedent. Quai ha chaschunà custs annuals pli auts per las OEE e correspun­denta­main custs da producziun pli auts per tut ils acziunaris partenaris da las OEE. Correspundentamain èn er s'augmentads ils pretschs per l'energia supplementara.

Tar la dumonda 2: Tenor il conclus dal cussegl d'administraziun da l'onn 2011 men­ziunà en la dumonda 1 è l'energia vegnida publitgada tar ils partenaris da las OEE e tar la Repower SA. Da las duas purschidas inoltradas han las OEE evaluà la pli avan­tagiusa. Ils documents correspundents han las OEE rendì enconuschent al chantun.

Tar la dumonda 3: Na. Ultra da la guerra han er giugà ina rolla la lunga perioda da sitgira, l'indisponibladad nunplanisada da grondas capacitads d'ovras electricas en l'Europa, la mancanza da la cunvegna davart l'energia electrica cun l'Uniun euro­peica (UE) sco er la tema d'in enviern fraid. Ils pretschs pli auts na tutgan betg ils acziunaris da la GESA, perquai che la GESA po dar vinavant sia energia per in pretsch supplementar (fix) a la Repower. Uschia n'è la GESA (sco incumbensada da las vischnancas concessiunaras e dal chantun) betg exponida a la ristga dal martgà.

Tar la dumonda 4: Il princip da «merit order» descriva il mecanissem, co ch'il pretsch d'electricitad resulta sin il martgà en dependenza da l'offerta e da la dumonda. L'ulti­ma ovra electrica (uschenumnada ovra electrica marginala) che vegn colliada per cu­vrir il basegn d'electricitad respectiv, fixescha il pretsch da bursa che las ovras elec­tri­cas survegnan per lur electricitad inducida. Perquai che l'ultima ovra electrica è per il solit in'ovra electrica da gas e fixescha pia il pretsch, sa mussan ils auts pretschs da gas er sin il martgà d'electricitad. Cunquai che la Svizra è integrada en il martgà d'electricitad europeic, ha la furmaziun dals pretschs dal martgà d'electricitad interna­ziunal ina influenza sin il pretsch dal martgà d'electricitad svizzer. Per quantitads d'el­ec­tricitad cumpradas sin il martgà en contant na vesa la Regenza nagina pussaivla­dad da separar ils pretschs d'electricitad grischuns da quai.

Tar la dumonda 5: Tenor las enconuschientschas dal chantun èn las OEE prontas da far in'acquisiziun da plirs onns en transchas ed en turnus per reducir uschia la volatil­itad da pretschs. Quai premetta dentant che las vischnancas concessiunaras renun­zie­schian a lur dretg periodic annual da decider davart la retratga d'energia supple­men­tara e ch'ellas sa cunvegnian ensemen cun las OEE sin in modus da retratga da plirs onns.

2 da matg 2023