Navigation

Inhaltsbereich

Incumbensa Schneider concernent l'analisa da l'istorgia dal faschissem e dal naziunalsocialissem en il chantun Grischun

Sessiun: 15.02.2023

La debatta davart il crap commemorativ per ils schuldads tudestgs crudads en l'Emprima Guerra mundiala, che sa chatta sin il santeri Daleu e ch'è vegnì construì sin basa da l'ideologia naziunalsocialistica, ha mussà che l'istorgia dal faschissem e dal naziunalsocialissem en il chantun Grischun – gist dal temp avant il cumenzament da la Segunda Guerra mundiala – n'è strusch respectivamain mai vegnida perscrutada ed analisada sistematicamain. Il crap commemorativ sin il santeri Daleu è mo in dals indizis che renvieschan al fatg, ch'igl existivan en il Grischun ideologias faschisticas e naziunalsocialisticas u almain simpatias per talas – gist tuttina sco l'opposiziun cunter talas. Ed er l'istorgia da las victimas e da las persunas pertutgadas sto vegnir examinada respectivamain raquintada pli detagliadamain.

Cun l'analisa scientifica da l'istorgia da las victimas da mesiras repressivas per motivs da provediment ha il chantun Grischun analisà exemplaricamain in chapitel stgir da ses passà. Il medem duai il chantun ussa far cun l'analisa da l'istorgia dal faschissem e dal naziunalsocialissem en il chantun Grischun.

Perquai incumbenseschan las sutsegnadras ed ils sutsegnaders la Regenza da laschar analisar scientificamain – en il rom d'in project da perscrutaziun cumplessiv – l'istorgia dal faschissem e dal naziunalsocialissem en il chantun Grischun cun l'accent sin il temp avant il cumenzament da la Segunda Guerra mundiala.

Cuira, ils 15 da favrer 2023

Schneider, Hofmann, Danuser (Cuira), Bachmann, Bardill, Baselgia, Bergamin, Berther, Bischof, Brunold, Cahenzli-Philipp (Vaz Sut), Claus, Collenberg, Degiacomi, Derungs, Dietrich, Epp, Furger, Gansner, Gartmann-Albin, Gredig, Hoch, Jochum, Kohler, Kreiliger, Loepfe, Maissen, Mani, Mazzetta, Müller, Nicolay, Pajic, Perl, Pfäffli, Preisig, Rettich, Righetti, Rusch Nigg, Rutishauser, Saratz Cazin, Spagnolatti, von Ballmoos, Zanetti (Sent), Zaugg-Ettlin

Resposta da la regenza

Il rapport dad SRF dal schaner 2023 davart il monument da fossa resp. il crap commemorativ sin il santeri Daleu a Cuira, che regorda als schuldads tudestgs internads e morts qua durant l'Emprima Guerra mundiala, ha sveglià ina vasta debatta. L'interess public per l'istorgia dal Grischun durant e tranter las duas Guerras mundialas dal 20avel tschientaner è vegnì intensivà tras questa emissiun. Sut quest aspect pretenda l'incumbensa qua avant maun da far in'analisa scientifica cumplessiva da l'istorgia dal faschissem e dal naziunalsocialissem en il chantun Grischun e da metter en quella l'accent sin ils onns avant il cumenzament da la Segunda Guerra mundiala.

La Regenza beneventa iniziativas da perscrutaziun che gidan ad approfundar la chapientscha istorica dal temp respectiv sco er da las relaziuns socialas e politicas en il Grischun. Legraivlamain èn vegnidas publitgadas dacurt pliras contribuziuns scientificas che han perscrutà il temp da la Segunda Guerra mundiala, las activitads da la «Nationalsozialistische Deutsche Arbeiterpartei» (NSDAP) en il Grischun en general e l'assassinat dal manader da la gruppa svizra da la NSDAP Wilhelm Gustloff en spezial sco er l'istorgia da la «Holzverzuckerungs AG» (HOVAG). Questas publicaziuns han gia purtà enconuschientschas impurtantas en secturs parzials da l'istorgia dal faschissem e dal naziunalsocialissem en il chantun Grischun. Per cuntanscher ina perscrutaziun sistematica, sco ch'ella vegn prendida en mira da l'incumbensa, pari pia indispensabel d'incaricar l'emprim persunas spezialisadas da registrar il stadi da perscrutaziun actual, da preparar ina bibliografia cumplessiva da la litteratura relevanta e d'identifitgar las largias da perscrutaziun existentas. Questa lavur da retschertga duai preschentar ils giavischs da la perscrutaziun. La deputada Silvia Hofmann ha dal rest drizzà actualmain ina dumonda a la Regenza concernent la cultura da regurdientscha e la contextualisaziun dal mausoleum sin il santeri Daleu a Cuira, che metta il focus sin la perscrutaziun dal temp tranter e suenter las guerras. Perquai fai senn d'extender correspundentamain la perioda da perscrutaziun per obtegnair in maletg pli cumplessiv. Cun agid d'in tal maletg vegn la Regenza ad incumbensar ed a finanziar projects da perscrutaziun concrets.

Sa basond sin questas explicaziuns propona la Regenza al Cussegl grond da midar questa incumbensa sco suonda:

Las sutsegnadras ed ils sutsegnaders incumbenseschan la Regenza da laschar registrar il stadi da perscrutaziun pertutgant l'istorgia dal chantun Grischun durant il temp dal faschissem e dal naziunalsocialissem fin ils emprims onns suenter la Segunda Guerra mundiala, e quai en il rom d'in project da retschertga scientifica. A medem temp duain vegnir eruidas e numnadas las largias da perscrutaziun. Sa basond sin questa incumbensa vegn la Regenza incumbensada da dar l'incarica per in u plirs projects da perscrutaziun.

19 d'avrigl 2023