Da princip èn las plattafurmas d'intermediaziun online u las plattafurmas da sharing economy ed uschia las purschidas sco Airbnb da valitar en moda positiva, perquai ch'ellas correspundan al spiert dal temp, perquai ch'ellas èn etablidas tar la clientella e perquai ch'ellas cuvran in basegn. Ensemen cun auters svilups che augmentan l'attractivitad da nossas regiuns turisticas pon ellas gidar ad attrair dapli giasts en il Grischun. Ultra da quai pon ellas er gidar ad augmentar l'occupaziun da las abita­ziuns che vegnan duvradas sco abitaziuns secundaras, vul dir a generar dapli letgs chauds. Dal rest coexistan gia da vegl ennà tant emprimas abitaziuns sco er abita­ziuns da vacanzas en las destinaziuns turisticas dal Grischun, entant che quai è ina tendenza plitgunsch pli nova en las citads da la Svizra Bassa. I dat dentant almain ina vart negativa en il sectur dal turissem, numnadamain concernent l'incassament da taxas da giasts. En il Grischun n'exista nagina soluziun chantunala per quest in­tent, entant ch'en auters chantuns incassescha Airbnb ina taxa da giasts e la tramet­ta vinavant (cf. latiers er dumonda Schneider, PCG 2/2016-2017 dals 19-10-2016, p. 423 ss.). Il motiv per quai è er, ch'i manca ina legislaziun chantunala davart las taxas turisticas en il Grischun (il november 2012 han las votantas ed ils votants refu­sà ina lescha correspundenta). En ils chantuns Basilea-Citad e Basilea-Champagna, Friburg, Schaffusa, Genevra, Zug, Turitg e da nov er en il chantun Vad existan cun­vegnas cun Airbnb, tenor las qualas las taxas unitaras vegnan transferidas directa­main a las autoritads chantunalas. En auters chantuns, sco a Berna u en il Vallais, vegni prescrit explicitamain – dentant mo en moda declarativa, perquai ch'igl è gia obligatoric – a las persunas che dattan en locaziun abitaziuns sur Airbnb, ch'ellas stoppian incassar en mintga cas taxas da pernottaziun da lur giasts. En il Grischun han Arosa, Tavau e Claustra pudì cuntanscher, che las directivas dad Airbnb ston cuntegnair infurmaziuns davart la taxa obligatorica; quai gida dentant mo pauc. Dal rest ha Tavau introducì il mars 2021 in'obligaziun da registrar mintga object che vegn dà a tschains.

I sto dentant vegnir constatà, che la dumonda da spazi d'abitar è creschida en gene­ral, tranter auter er pervia da las furmas da lavur pli novas ch'èn s'etablidas, pervia dal cumportament da lavurar sco er pervia da la tendenza d'abitar en plirs lieus. A medem temp daventi pli pretensius da metter a disposiziun terren, en spezial er cun la nova planisaziun dal territori. La dumonda, sche la locaziun da spazi d'abitar ha ina influenza sin la purschida da spazi d'abitar, vegn discutada en moda cuntraversa. En studis ed en artitgels n'exista apparentamain betg in'opiniun unitara en chaussa. Ed eventuals effects fissan differents tut tenor il tip da sharing e tut tenor il martgà. Tuttina datti en las citads da Genevra e da Berna sco er en il chantun Tessin gia re­gulaziuns restrictivas per dar en locaziun abitaziuns sur plattafurmas da sharing ed en la citad da Lucerna sto vegnir realisada ina iniziativa correspundenta ch'è vegnida acceptada dal pievel.

En il sectur dal svilup turistic e da l'alloschament turistic collavura il chantun er cun l'Institut per turissem e temp liber (ITT) da la Scola auta spezialisada dal Grischun. En il rom da l'elavuraziun da temas d'impuls per approfundar dumondas actualas ha il ITT inoltrà il zercladur 2023 a l'Uffizi per economia e turissem (UET) – independen­tamain da questa intervenziun – ina skizza da project per sviluppar la locaziun da curta durada sur plattafurmas da reservaziun en il chantun Grischun. La finamira è quella da s'occupar – en il senn d'in studi da basa – er da la tematica dad Airbnb en il chantun Grischun. Il resultat duai esser ina survista generala dals mecanissems da plattafurmas da reservaziun da curta durada sco er en spezial in'evaluaziun dal svi­lup da la purschida e da la dumonda durant la perioda dal 2018 fin il 2023. Il UET ed er il Departament d'economia publica e fatgs socials han ina tenuta positiva envers quest project ed han gia previs da dar liber l'elavuraziun dal project. Quest project è adattà per discutar las dumondas ch'èn vegnidas fatgas en l'incumbensa da fracziun.

Sa basond sin questas explicaziuns propona la Regenza al Cussegl grond d'acceptar questa incumbensa.

29 d'avust 2023