Dumonda en scrit concernent il sustegn a las interpresas pitschnas e mesaunas dal Moesano
Sessiun: 02.06.2000
La situaziun da las interpresas en il Mesauc, spezialmain quai che pertutga las interpresas pitschnas e mesaunas, è precara e fragila. In megliurament da la situaziun d'occupaziun sa lascha be cuntanscher cun crear e sustegnair talas interpresas pitschnas e mesaunas.
En il chantun Tessin vischinant ha gidà la secziun chantunala per promover l'economia en collavuraziun cun ils circuls d'interprendiders a crear ed a sustegnair facticamain il Asscoprofi, in'associaziun senza finamira da rendita che sa metta a disposiziun per dar assistenza als neo-interprendiders. L'associaziun po quintar surtut cun l'agid da manaders da fatschenta pensiunads. Ella designescha ina persuna responsabla che dat gratuitamain ina cussegliaziun finanziala, organisatoria, fiscala e.u.v. a las interpresas novas.
Ils resultats èn positivs, e pli che 70% da las fatschentas ch'èn vegnidas creadas en tala maniera han bunas vistas da reussir.
En vista a las experientschas fatgas da l'Asscoprofi dumandain nus la ludaivla regenza:
1. Vegn la situaziun da las interpresas pitschnas e medias dal Moesano analisada da vart da las instanzas chantunalas cumpetentas?
2. Tge mesiras da sustegn vegnan applitgadas en il Moesano per stgaffir ulteriuras interpresas pitschnas e mesaunas?
3. È pussaivla ina collvuraziun tranter las interpresas pitschnas e mesaunas dal Moesano e dal Asscoprofi grazia a la coordinaziun da las instanzas chantunalas cumpetentas?
4. En cas da gea: co po vegnir promovida questa collavuraziun e co vulan ins infurmar ils neo-interprendiders?
Cuira, ils 2 da zercladur 2000
Namen: Righetti, Keller, Zarro, Noi, Peretti
Session: 02.06.2000
Vorstoss: rg SchriftlicheAnfrage
Resposta da la regenza
1. In'analisa sistematica da la situaziun da las interpresas pitschnas e mesaunas n'ha betg lieu. I na dat naginas cumpetenzas per quai. L'uffizi per economia e turissem e l'uffizi per industria, mastergn e lavur disponan dentant da bunas infurmaziuns davart numerus manaschis en il Moesano. Infurmaziuns generalas resultan dals contacts frequents cun l'organisaziun regiunala ORMO surtut cun il CRIL a Grono e cun vischnancas. Infurmaziuns specificas resultan da proceduras da permissiun, da l'applicaziun da mesiras per promover l'economia e da projects da domiciliaziun.
2. En il Moesano, sco en autras regiuns, vegnan applitgadas da princip las mesiras da la lescha per promover l'economia (contribuziuns als custs da tschains, a l'avertura sco er contribuziuns da perscrutaziun e da svilup) sco er facilitaziuns fiscalas. Ils problems ch'i ha dà en il Moesano tras il fatg che manaschis pli gronds èn vegnids serrads han chaschunà ch'ins ha applitgà las mesiras da promoziun savens ed a moda generusa. En occasiun da la surpigliada da l'areal Von Roll ha la regenza sustegnì fermamain las vischnancas ELIN. Er la vischnanca da Mesocco obtegna actualmain in agid generus per la construcziun dal center da sport. Per l'avertura da la zona d'industria a San Vittore han la confederaziun ed il chantun empermess in sustegn finanzial generus sco cumpensaziun per l'aboliziun dal binari d'industria. Ultra da quai ha il cussegl federal sin dumonda da la regenza definì il Moesano sco territori da renovaziun economica. Tras quai daventan pussaivlas ulteriuras mesiras da promoziun da la confederaziun.
Plinavant èsi previs d'integrar il Moesano en las activitads dal marketing da posiziun che vegn actualmain stgaffì. Las emprimas tractativas correspundentas cun ils represchentants da las vischnancas sco er cun la ORMO èn planisadas per l'atun da quest onn.
3. L'Asscoprofi è in'organisaziun en il chantun Tessin che sustegna persunas dischoccupadas al cumenzament cur ch'ellas fundeschan lur atgnas interpresas. Ils cussegliaders da l'Asscoprofi èn manaders da fatschenta pensiunads che dattan assistenza als interprendiders giuvens per ina tariffa da f 86 francs per ura. Els vegnan indemnisads da l'uffizi da lavur dal chantun Tessin. Ensemen cun l'uffizi da lavur vegn definì in maximum da lavur da cussegliaziun correspundenta en uras per mintga consultaziun che stat a disposiziun als interpendiders giuvens en dumonda.
Per tegnair quint dals basegns dal Moesano è la regenza pronta d'examinar in'eventuala collavuraziun cun l'Asscoprofi. Latiers na vai probablamain betg per stgaffir in'atgna organisaziun, mabain per la dumonda co ch'ils cussegliaders da l'Asscoprofi pudessan vegnir engaschads er en il Moesano.
4. L'intenziun è quella ch'in chantun surpiglia ils custs da la cussegliaziun. Perquai che l'activitad da cussegliaziun da l'Asscoprofi sa restrenscha sin persunas dischoccupadas, duai l'infurmaziun dals interprendiders giuvens succeder tras il CRIL a Grono.
Cuira, 22 d'avust 2000