Dumonda en scrit concernent l'art vi da l'edifizi dal cussegl grond
Sessiun: 05.10.2000
En il rom da l'exposiziun „Kunst in alten Gemäuern“ dal Studio 10 a Cuira è vegnida installada in'ovra da l'artist Majo Bucher sur l'entrada da l'edifizi dal cussegl grond. L'ovra „amur e lavur“ è vegnida concepida explicitamain per l'edifizi dal cussegl grond. L'exposiziun è limitada e perquai sto l'ovra puspè vegnir allontanada.
L'ovra fa ina ferma impressiun e persvada areguard ses cuntegn e sia furma. I fiss da beneventar, sch'ella vegniss laschada per adina vi da la fatschada da l'edifizi dal cussegl grond ed exprimess uschia la colliaziun da la politica grischuna cun l'art e la cultura. Nus envidain la regenza d'examinar la cumpra e l'installaziun permanenta da l'ovra d'art.
Cuira, ils 5 d'october 2000
Namen: Claus
Session: 05.10.2000
Vorstoss: rg Schriftliche Anfrage
Resposta da la regenza
En il rom da l'exposiziun da giubileum da la galaria Studio 10 "Neue Kunst im alten Gemäuer" dals 9 da fanadur fin ils 7 d'october 2000 ch'è vegnida prolungada per duas emnas, ha l'artist Majo Bucher installà l'ovra "amur & lavur" sur l'entrada da
l'edifizi dal cussegl grond.
Per la regenza è la qualitad da l'ovra ch'è vegnida concepida expressamain per la fatschada da l'edifizi dal cussegl grond gist quella, che l'ovra è vegnida installada mo per in temp limità. Igl è da temair che la leva irritaziun e la pitschna equivocadad che
l'ovra ha provocà pudessan svanir cun il temp - cuntrariamain ad ina contribuziun
artistica vi d'in edifizi public ch'è vegnida concepida per adina.
Per ils motivs surmenziunads refusa la regenza la cumpra da l'installaziun "amur & lavur" da Majo Bucher.
Cuira, ils 5 d'october 2000