Postulat concernent las acquisiziuns ed ils custs da manaschi EED dals uffizis
Sessiun: 28.11.2000
Cun tractar differentas dumondas da credits posteriurs e cun examinar preliminarmain il preventiv 2001 ha la CdG constatà che l'uffizi d'informatica (UI) metta internamain a quint las acquisiziuns ed ils custs da manaschi per part als uffizis (uffizis GRiforma, scuntraziuns spezialas, finanziaziuns spezialas e cas spezials) e per part betg. Tar ils uffizis, cun excepziun dals uffizis GRiforma, chaschuna la scuntraziun che las acquisiziuns ed ils custs da manaschi n'èn betg suttamess a l'obligaziun da dumandar in credit, perquai ch'els n'han betg in effect sin il preventiv da l'UI pervia dal reschim da saldos GRiforma e perquai ch'igl n'è betg obligatori da dumandar in credit posteriur per las scuntraziuns internas dals uffizis, als quals ellas èn vegnidas messas a quint. Questa situaziun na cuntenta betg la CdG.
Da princip sa chatta la responsabladad da far acquisiziuns e da dumandar credits oz tar l'UI. Ina varianta fiss quella che, per questa responsabladad da conceder credits, existess er in'obligaziun da dumandar credits tar l'UI, a moda che p.ex. las entradas or da las scuntraziuns internas vegnissan exclusas dal saldo dal quint current da l'UI u a moda ch'i vegniss preschentà al cussegl grond in credit global separà per las acquisiziuns ed ils custs da manaschi EED dals uffizis. Ina varianta dal tuttafatg differenta fiss quella da surdar als uffizis la responsabladad per l'acquisiziun da EED e per la dumonda da credits. Tenor l'avis da la CdG stuess la finamira esser quella che las acquisiziuns ed ils custs da manaschi EED dals uffizis vegnissan suttamess en ina tscherta furma a l'approvaziun dal credit tras il cussegl grond e che las acquisiziuns succedessan a moda favuraivla ed efficazia.
- Nus supplitgain la regenza da preschentar al cussegl grond in rapport cun differentas variantas per las acquisiziuns ed ils custs da manaschi EED dals uffizis;
- la finamira duai esser quella ch'il cussegl grond possia fixar las acquisiziuns ed ils custs da manaschi EED dals uffizis cun approvar il preventiv 2002.
Cuira, ils 28 da november 2000
Namen: Möhr (CdG)
Session: 28.11.2000
Vorstoss: rg Postulat
Resposta da la regenza
1. La CdG ha constatà gistamain ch'ina part da las acquisiziuns e dals custs da manaschi EED che l'uffizi d'informatica (UI) metta a quint a tscherts uffizis n'è betg suttamessa ad in'obligaziun da dumandar credits. La problematica pertutga dentant unicamain il traffic commerzial tranter l'UI sco uffizi da pilot GRiforma ed ils var diesch uffizis cun ina finanziaziun speziala. Tut las ulteriuras acquisiziuns e tut ils ulteriurs custs da manaschi EED èn relevants per ils credits: a) retratgas da prestaziuns dals uffizis GRiforma van sin donn e cust da lur saldo, perquai ch'ellas vegnan er messas a quint e b) retratgas da prestaziuns dals uffizis tradiziunals senza finanziaziun speziala van sin donn e cust dal saldo da l'uffizi d'informatica, perquai ch'ellas na vegnan betg messas a quint.
La "largia parziala da credits" sin il sectur dals uffizis cun ina finanziaziun speziala è tranter auter ina consequenza da la gestiun parallella da dus sistems administrativs. La cooperaziun da GRiforma e da l'administraziun tradiziunala dumonda permanentamain cundiziuns e reglas spezialas. La regenza è da la medema opiniun sco la CdG che questa largia - sa chapescha nunvulida - stoppia vegnir serrada. En il rom da sia cumpetenza che sa basa sin l'art. 42 DERtLFC ha il departament da finanzas gia entschavì lavurs preliminaras respectivas. Per l'onn 2001 duai vegnir applitgada ina mesira immediata. Per l'onn sequent 2002 è previsa ina regulaziun detagliada che sto vegnir integrada gia l'entschatta 2001 en las directivas da budget respectivas. Il giavisch central da la CdG ch'en il futur suttastettian puspè tut las acquisiziuns e tut ils custs da manaschi EED a l'obligaziun da dumandar credits, vegn pia ademplì senza retard (sco che l'existenza d'in rapport al chaschunass). La regulaziun vegn dentant anc adina ad avair caracter transitori per il manaschi d'emprova spezial GRiforma.
2. Dumondas, co che las resursas duain vegnir dirigidas generalmain sut GRiforma, vegnan discutadas ed examinadas actualmain en il context dal project. Per la regenza èn la meglra acquisiziun pussaivla ed il diever optimal dals meds necessaris per la gestiun dumondas gist uschè impurtantas sco per la CdG. Tgi procura per las resursas? Tgi dovra quellas cun tge cumpetenzas? Tge prescripziuns centralas (p.ex. standardisaziun) èn necessarias? Tgi relascha quellas? Contabilitad centrala u decentrala? Scuntraziun interna u betg? Consum obligatori u d'elecziun? Sa chapescha che las variantas da la CdG vegnan integradas en ils ulteriurs scleriments. Las enconuschientschas ch'els dattan vegnan per finir integradas en il rapport dal project GRiforma.
3. La regenza è pronta da meglierar directamain la transparenza e las pussaivladads directivas per il cussegl grond sin il sectur dals meds che stattan a disposiziun per l'informatica. Malgrà la regulaziun ch'igl è da far sut punct 1 vegn ella a menziunar en scadin cas separadamain las acquisiziuns ed ils custs da manaschi EED dals uffizis en il preventiv 2002 da l'uffizi d'informatica. Per ils onns successivs èsi da sclerir en il rom dal project cumplessiv, sch'ils credits globals èn da reparter ulteriurmain ed eventualmain da fixar separadamain.
4. La regenza è pronta d'acceptar il postulat en il senn da questas explicaziuns.
Cuira, ils 28 da november 2000