Dumonda en scrit concernent il giubileum „Il Grischun dapi 200 onns en la Confederaziun“
Sessiun: 29.01.2001
L'onn 1803 ha ina muntada istorica per il chantun Grischun e per la Confederaziun: sin fundament d'ina nova constituziun (constituziun da mediaziun) èn vegnids agiuntads 6 novs chantuns (Argovia, Turgovia, Son Gagl, Tessin, Vad e Grischun) als 13 vegls.
Ils 20 d'avrigl 1803 ha gì lieu en la chasa-cumin da la citad da Cuira ina solenna sesida d'avertura da l'emprim cussegl grond dal Grischun, tranter auter cun in discurs da landamma federal Jakob Ulrich Sprecher da Jenins, in dals creaturs dal nov chantun. Cun quai ha il Grischun inizià sia carriera sco chantun svizzer.
L'onn 2003 vegnan ins a festegiar il giubileum da 200 onns. Entant ch'auters chantuns - p.ex. il chantun Son Gagl - vulan render attent a l'eveniment istoric cun in'entira retscha da festas ed acziuns fantasticas, n'èn enconuschentas fin oz anc naginas ideas concretas en il Grischun.
Jau supplitgesch la regenza da respunder las suandantas dumondas:
1. En tge furma quinta la regenza da festegiar il giubileum da 200 onns?
2. Vegni tegnì quint er d'occurrenzas che sa drizzan spezialmain a la generaziun giuvna?
Cuira, ils 29 da schaner 2001
Namen: Jäger
Session: 29.01.2001
Vorstoss: rg SchriftlicheAnfrage
Resposta da la regenza
Ils temps per festivitads pompusas èn passads. Cuntrariamain ad auters chantuns da mediaziun ha Napoleun imponì a la populaziun dal Grischun l'onn 1803 l'acta da mediaziun senza far ina consultaziun dal pievel. Il chantun Grischun è dapi il fanadur 1998 en contact cun ils auters chantuns da mediaziun per planisar activitads communablas. Il departament d'educaziun, cultura e protecziun da l'ambient è vegnì incumbensà da far propostas a la regenza per il giubileum. A sia emprima sesida da l'onn 2001 è la regenza s'occupada da propostas concretas. En il fratemp èn vegnids envidads tut ils departaments d'inoltrar ulteriuras ideas ed ulteriurs impuls per che la regenza possia deliberar silsuenter in nov concept pli raffinà.
Pertutgant las dumondas concretas piglia la regenza posiziun sco suonda:
1. Il giubileum vegn ad avair lieu en l'entir chantun. Ultra d'ina occurrenza uffiziala en la chapitala (ils 20 d'avrigl 2003) vegn il giubileum salvà durant l'entir onn cun differentas acziuns ed activitads. Formalmain pon quellas cumprender ina exposiziun ambulanta, in concert da rock sco er la publicaziun d'in cudesch. La furma stuess s'adattar al cuntegn.
2. Il giubileum duess daventar ina festa per l'avegnir ed è pia ina occurrenza per la generaziun giuvna dal Grischun. Planisads èn barats da giuventetgna en collavuraziun cun ils auters 5 chantuns da mediaziun.
27 da favrer 2001