En connex cun il transport d'autos al nord dal Vereina hai dà sulettamain durant dus dis da l'enviern 2000/2001 ina colonna d'autos fin sin la via dal Partenz. Quai mussa che las mesiras introducidas en il fratemp (optimaziuns tar las cassas, pli gronda capacitad da transport sin la lingia dal Vereina, regulaziun dal traffic als dis da grond traffic, meglra infurmaziun dals automobilists) fan effect e ch'ins ha cuntanschì meglieraziuns considerablas concernent las colonnas al portal dal nord. Betg satisfacents èn perencunter ils problems da traffic entaifer il vitg da Claustra. Quests problems da traffic, e betg il transport d'autos tras il Vereina, èn pia il motiv principal per las colonnas sin la via dal Partenz che vegnan menziunadas dals interpellants. Questa situaziun nuncuntentaivla po deplorablamain vegnir eliminada definitivamain pir cun l'avertura dal sviament da Claustra.

La zona da spetga actuala a Selfranga ha ina capacitad da 338 autos da persunas (circa 2 uras temp da spetgar). Suenter la terminaziun dal sviament da Claustra vegn augmentada questa capacitad a 424 autos (circa 2 1/2 uras temp da spetgar). A curta vista na sa lascha dentant betg engrondir la zona da spetga en il sectur Selfranga. Per realisar las differentas construcziuns artifizialas e construcziuns da via tar la colliaziun Claustra-Selfranga/Vereina vegn duvrà dal tuttafatg l'areal che sa chatta ordaifer da la zona da spetga actuala. Ultra da quai han ins accordà ils decurs, las fasas ed ils termins da construcziun dals differents elements dal project, da maniera ch'ina avertura dal sviament da Claustra duess esser garantida per la fin da l'onn 2005. A basa da questa situaziun pudess in'anticipaziun da singulas lavurs da construcziun chaschunar in retard per l'avertura dal sviament. Er la creaziun d'ulteriur spazi da spetga sin l'axa d'access Küblis-Claustra-Tavau na maina betg a la finamira. Quai fiss be raschunaivel, sche quest spazi fiss cuntanschibel via l'access actual a la staziun da transport. Zonas da spetga per lung da la via dal Partenz, p. ex. tranter Küblis e Claustra u a Landquart, na vegnissan strusch frequentadas dals utilisaders dal Vereina. Ultra da quai stuess ins filtrar l'entir traffic en direcziun da Vereina nord e Tavau. Quai pretendess in'ulteriura regulaziun dal traffic sin la via dal Partenz cun persunal correspundent; il resultat fissan ulteriurs impediments da traffic.

La regenza è conscienta dal fatg che la situaziun da traffic actuala sin la via dal Partenz è problematica durant intgins dis l'onn, e quai tant per ils vitgs situads entamez ed a la fin dal Partenz sco er per la regiun da turissem da Tavau. Ina soluziun raschunaivla da quels problems da traffic vegn a resultar pir cun l'avertura dal sviament da Claustra, sco che quai è gia vegnì menziunà. En vista a questa situaziun da traffic gia problematica è la regenza da l'avis ch'ins stoppia evitar sche pussaivel dal tuttafatg colonnas che vegnan chaschunadas dal Vereina sin la via dal Partenz. Ultra da las mesiras gia realisadas vegn perquai examinada ina signalisaziun dals temps da spetga actuals sper la A13 avant u tar la sortida a Landquart sco er per lung da la via dal Partenz sin l'autezza da Ganda. Questas ed ulteriuras mesiras vegnan actualmain scleridas; uschenavant ch'ellas èn raschunaivlas ed adattadas, vegnan ellas a vegnir realisadas gia per la proxima stagiun d'enviern.