Navigation

Inhaltsbereich

Interpellaziun concernent il basegn urgent da plazzas da tgira per umans attempads

Sessiun: 29.05.2001

Da preschent vegnan las chasas per attempads inundads d'annunzias urgentas ed urgentissimas da confamigliars en desperaziun e da servetschs socials. Umans attempads restan en ils ospitals u vegnan translocads perquai ch'els na pon betg pli vegnir tractads en il rom da l'organisaziun da spitex e perquai che las cassas da malsauns na vulan betg pli pajar ils custs da dimora en ils ospitals. Plazzaments lunsch davent dal lieu da domicil dals confamigliars èn perquai mintgatant necessaris. Il contact persunal cun ils confamigliars daventa pli difficil.

Las chasas pli che plainas e las lungas glistas da spetga èn in segn che nossa societad è surdumandada cun dumagnar la politica da vegliadetgna. Da preschent n'èsi nagina raritad da stuair spetgar tranter 6 e 12 mais per entrar en ina chasa da tgira. Questa situaziun na satisfa betg e na renda betg giustia als umans attempads.

Il settember 1996 è vegnì preschentà il project "Daventar vegl en il Grischun". Latiers han ins mess en il center l'autodecisiun dals umans attempads. A basa da la situaziun actuala na pon els betg realisar questa autodecisiun, er betg là nua che quai fiss anc pussaivel. Las differentas furmas d'abitar ch'èn vegnidas menziunadas en il rapport (p. ex. quella d'ina famiglia da tgira) n'èn anc betg vegnidas realisadas. Tenor noss avis è avant maun in basegn d'agir.

En quest connex sa preschentan las suandantas dumondas:

1. È la regenza orientada davart quest basegn urgent?
    2. Co po la situaziun per noss attempads vegnir megliurada entaifer in temp util?
    3. Tge mesiras per il futur vul la regenza prender?
    4. Co vul la regenza fixar las directivas necessarias?

Cuira, ils 29 da matg 2001

Namen: Schütz, Pfiffner, Noi, Arquint, Bucher, Cahannes, Capaul, Cavegn, Cavigelli, Dermont, Frigg, Giuliani, Jäger, Koch, Locher, Loepfe, Luzio, Maissen, Meyer, Righetti, Sax, Schmutz, Schütz, Trepp, Zanolari, Zindel

Session: 29.05.2001
Vorstoss: rg Interpellation


Resposta da la regenza

La regenza respunda las dumondas fatgas sco suonda:

    1. La regenza conuscha la situaziun actuala en las chasas per attempads e da tgira en il chantun Grischun. Tut en tut è l'utilisaziun da las plazzas en chasas d'attempads e da tgira en il chantun Grischun fitg auta. L'onn 2000 eran ils letgs occupads en media annuala per 96%. Entant che la retschertga davart l'occupaziun dals letgs per ils 31 da december 2000 mussa ch'i dat plazzas avunda en las autras regiuns, malgrà la gronda utilisaziun, è la situaziun da purschida actualmain fitg precara en las chasas d'attempads e da tgira a Cuira. Tenor las examinaziuns da l'uffizi da sanadad na pon ins dentant betg discurrer d'in basegn urgent. Ina persuna cun basegn da tgira po er oz entrar entaifer in temp util en ina da las chasas d'attempads e da tgira a Cuira. Las glistas da spetga existentas da las chasas d'attempads e da tgira èn da relativar, perquai che las annunzias vegnan savens fatgas tar differentas chasas. Per surmuntar eventualas situa-ziuns da basegn ha la citad da Cuira fatg in contract da prestaziun individual ed extendì cun l'associaziun da spitex da Cuira. Tenor quel po l'associaziun da spitex er offrir prestaziuns per l'assistenza e la tgira da basa che surpassan il contract da prestaziun normal. Las expensas supplementaras betg cuvridas da l'associaziun da spitex da Cuira che resultan da quai vegnan surpigliadas da la citad da Cuira.

    2. Correspundentamain al princip da subsidiaritad èn las vischnancas responsablas per metter a disposiziun ina purschida suffizienta sin il sectur dals attempads e da tgira. Da preschent vegnan planisadas u construidas chasas d'attempads u da tgira ad Alvagni ed Andeer sco er gruppas d'abitar da tgira a Val S. Pieder e Sursaissa. Surtut er cun resguardar il svilup demografic daventi pli e pli grev da cuvrir il basegn cun la purschida da plazzas en chasas d'attempads e da tgira a Cuira. Correspundentamain sto la citad da Cuira, ensemen cun las vischnancas d'aglomeraziun e sin basa d'ina planisaziun da basegn accordada regiunalmain, procurar per las capacitads necessarias per la tgira e l'assistenza da persunas attempadas.

    3. Las vischnancas èn responsablas da metter a disposiziun purschidas sin il sectur d'attempads e da tgira. Per quest intent han ellas da cumpilar ina planisaziun dal basegn accordada regiunalmain. I cumpeta a la regenza da decretar d'ina vart ina planisaziun da basa surordinada chantunala e d'examinar da l'autra vart, sche las planisaziuns da basegn da las vischnancas sajan accordadas cun la planisaziun da basa chantunala e sche las capacitads ch'èn necessarias tenor la planisaziun da basegn sajan a disposiziun, resp. sch'ins haja prendì mesiras per metter a disposiziun questas capacitads.

    4. La regenza vegn a concluder las directivas necessarias en il rom da la planisaziun da basa chantunala.