Interpellaziun concernent ils supplements da famiglia
Sessiun: 09.10.2001
Adina dapli famiglias u persunas singulas cun uffants vivan a l'ur da la povradad u vivan schizunt sut il minimum d'existenza. Uffants valan tenor ils studis sco „ristga considerabla da povradad“. Quai na dastga betg restar uschia. Il chantun Grischun duess vegnir activ en quella chaussa.
Nus partin dal fatg ch'igl è dentant vegnì examinà il dumber d'uffants sur 16 onns da lavurants esters cun il dretg da supplements d'uffants e che las consequenzas finanzialas èn uschia er giuditgablas. Plinavant sa retardescha l'introducziun dals contracts bilaterals da tala maniera ch'in auzament a curt termin dals supplements d'uffants para inditgà.
Ils uffants èn noss futur. Nus stuain sustegnair meglier las famiglias. Sin il plaun federal èn pendents plirs sforzs politics en quest connex. Uschia stat en discussiun ina unificaziun ed il medem mument er in auzament considerabel dals supplements d'uffants. Gist per evitar pli tard adattaziuns andetgas para in auzament da las taxas chantunalas per 70 francs indispensabel. Ultra da quai duai er vegnir cuntanschì cun la revisiun dapli transparenza e las tariffas da las differentas cassas da cumpensaziun duain esser accessiblas en ina moda simpla per tuts. Uschia fissi procurà per ina basa da decisiun ch'il patrun pudess cumparegliar las prestaziuns da las cassas e pudess eventualmain era midar la cassa. Igl è d'examinar sche las contribuziuns fissan da fixar dal chantun. Plinavant è il grad minimal d'occupaziun da reveder e d'adattar a las situaziuns odiernas. Cunquai che adina dapli persunas che han d'avair quità dals uffants èn occupadas a temp parzial daventi necessari da far qua ina midada. Il grad minimal d'occupaziun stuess vegnir sbassà.
La regenza vegn envidada da respunder las suandantas dumondas:
1. Vesa la regenza medemamain il basegn urgent d'agir en il sectur dals supplements d'uffants, era sin fundament da las novas structuras da las famiglias?
2. È la regenza medemamain da l'opiniun ch'il grad minimal d'occupaziun stoppia vegnir curregì engiu sin fundament da questas structuras da surveglianza?
3. Quants uffants che vivan ussa a l'exteriur pon annunziar supplementarmain in dretg suenter l'introducziun dals contracts bilaterals?
4. Co sa preschentan las tariffas singulas da las cassas da cumpensaziun per famiglias, areguard ils supplements da famiglias inclusiv il fond da reserva ed ils custs d'administraziun en il chantun Grischun?
5. È la regenza pronta d'auzar ils supplements d'uffants almain per 70.00 francs? Sche gea: entaifer tge termin succeda quai?
6. Co vul la regenza integrar sustegns da las famiglias cun uffants en in concept general?
Cuira, ils 9 d'october 2001
Name: Schmutz, Meyer, Noi, Arquint, Augustin (Almen), Bucher, Frigg, Jäger, Locher, Looser, Pfenninger, Pfiffner, Schütz, Trepp, Zindel
Session: 9.10.2001
Vorstoss: rg Interpellation
Resposta da la regenza
Ils supplements da famiglia tenor la lescha davart ils supplements da famiglia (LSF, DG 548.100) vegnan quintads giu e pajads da la cassa da cumpensaziun per famiglias dal chantun e ses posts da rendaquint e da 13 cassas privatas da cumpensaziun per famiglias per lavurants. Ils supplements d'uffants per ils lavurants cun gudogn independent vegnan pajads mo da la cassa da cumpensaziun per famiglias dal chantun. Daventar commembers da las cassas privatas ston ils patruns ch'appartegnan ad ina federaziun da fundaturs da questas cassas. Tut tschels patruns han da sa participar a la cassa dal chantun. Confurm a la commembranza tar las cassas
da cumpensaziun da l'AVS na pon ils patruns pia betg eleger libramain tranter las di-
versas cassas. Tut las cassas ston conderscher almain las contribuziuns ch'èn fixadas en la LSF. La regenza prenda posiziun tar las dumondas sco suonda:
1. La regenza ha gia constatà tar las rispostas a las moziuns Jäger e Suter ils onns 1998 e 1999 la necessitad da reveder la LSF e fatg attent ch'i na sajan da reveder betg be singulas disposiziuns mabain che l'entira lescha saja d'examinar pertutgant il basegn d'ina refurma. Ina gruppa da lavur entaifer l'administraziun sclerescha per incumbensa dal departament da finanzas e militar ils basegns d'ina refurma totala da la LSF enfin la fin 2001. Ils interpellants sajettan pia cun questa intervenziun cunter chastels sblundregiads.
2. Er questa dumonda vegn examinada en il rom da la preparaziun da la revisiun da la LSF. Senza vulair pregiuditgar questas lavurs pudain nus tuttina menziunar ch'ina reducziun ad otg uras, analog a l'assicuranza d'accidents dals lavurants ordaifer il temp da lavur, è absolutamain pussaivla. Ina reducziun anc pli gronda è main probabla ord vista odierna, perquai che las lavurs administrativas dals patruns e da las cassas incumbensadas per il persunal auxiliar che lavura per ina paja per ura fissan sproporziunadas.
3. Ils giuvenils tranter 17 e 25 onns che vivan a l'exteriur, che absolveschan ina scolaziun e che han in genitur che lavura en Svizra n'èn statisticamain betg registrads. Quest dumber po pia vegnir eruì pir suenter ch'ils contracts bilaterals èn en vigur e sin fundament da las annunzias tar las cassas. Sin fundament d'ina decisiun da la dertgira administrativa dal chantun Grischun ch'è ida en vigur le gala l'onn 2000 exista dentant gia oz in dretg da supplements per la scolaziun da quests uffants en cas ch'il genitur che lavura en Svizra ha ina permissiun da do micil.
4. Las cassas privatas èn libras en la concepziun da las tariffas (autezza da la tariffa da la contribuziun), premess ch'ellas observan l'autezza minimala da las contribuziuns e la furmaziun da reservas. Las tariffas da las contribuziuns per las cassas privatas èn tranter 0.40% e 2.55% da la summa da paja suttamessa a l'obligaziun da la AVS dals patruns ch'èn colliads en il chantun Grischun. Las bleras cassas fixeschan la tariffa da la contribuziun sin fundament da lur structura da commembers en lur entir champ d'activitad e rendan pia er quint dal fond da reserva e dals custs d'administraziun sin plaun naziunal.
5. Ils custs d'in augment dals supplements d'uffants per 70 francs muntassan per la cassa dal chantun a circa 25.3 milliuns francs per ils lavurants ed a 2.7 milliuns francs per ils lavurants cun gudogn independent. Quai avess per consequenza che la cassa dal chantun stuess auzar las contribuziuns dals patruns per 0.79% (inclusiv l'augment da la contribuziun da finanziaziun per ils supplements d'uffants dals lavurants cun gudogn independent) d'ussa 1.75% a 2.54% da la summa da paja suttamessa a l'AVS. Las consequenzas sin la tariffa da las contribuziuns per las cassas privatas na pon betg vegnir giuditgadas. Ina grevezza supplementara en la dimensiun preschentada avess ina influenza negativa sin la situaziun economica dal chantun Grischun. La regenza è cunter ina grevezza supplementara. In augment moderà dals supplements d'uffants vegn medemamain examinà a chaschun da las lavurs preparatorias tar la revisiun da la LSF.
Ina revisiun totala da la LSF è sco gia menziunà en preparaziun. Plinavant vegn distgargià in dumber pli grond da famiglias cun uffants en il chantun Grischun cun l'introducziun dal concept da basegn per la reducziun individuala da las premias da l'assicuranza da malsauns obligatoria naven da l'onn 2003. Il medem mument aspirescha la confedera-ziun cun il project da l'imposiziun da taglias per famiglias da distgargiar las famiglias tar las impostas. Questas diversas mesiras èn ussa da realisar e lur effects èn d'examinar. Ord vista da la regenza èsi oz memia baud d'introducir ulteriuras mesiras supplementaras en il sectur da la politica da famiglia.