Navigation

Inhaltsbereich

Interpellaziun concernent il declin da la Swissair

Sessiun: 09.10.2001
Il concurs factic da la Swissair dominescha ils fatgs politics actuals. Ils interpellants partan dal fatg ch'il chantun Grischun saja pertutgà bler pli ferm dal declin da la Swissair che quai che sa lascha presumar tras la perdita directa dal chapital ch'il chantun aveva investì en aczias. I's po presumar ch'il donn naziunal da la reputaziun vegnia ad avair in donn consecutiv economic per il turissem grischun. Ultra da quai pon ins presumar consequenzas per la qualitad dal lieu da la "Greater Zurich Area", cun la quala il chantun Grischun è collià concernent l'industria e las prestaziuns da servetsch. Ils interpellants considereschan er sco important ch'i vegnia sclerida la responsabladad per il desaster.

Ils interpellants envidan perquai la regenza da respunder las sequentas dumondas:
    1. Tge consequenzas spetga la regenza a basa dal declin sfurzà da la Swissair per il turissem en il Grischun?
    2. Datti manaschis en noss chantun ch'èn pertutgads directamain u indirectamain dal desaster da la Swissair, ed en cas da gea: en tge mesira èn els pertutgads? Co statti cun lavurantas e lavurants?
    3. Tge consequenzas spetga la regenza per il Grischun sco lieu attractiv e tge consequenzas vegn quai ad avair per la promoziun da l'economia da noss chantun?
    4. Ha la cassa da pensiun chantunala investì chapital en la Swissair (aczias, obligaziuns?). En cas da gea: co taxescha la regenza ils effects respectivs?
    5. En tut il mund han las assicuranzas visà lur contracts cun las societads aviaticas ed ils aviuns privats. Novas purschidas d'assicuranza daventan bler pli charas e la garanzia è restrenschida. Pertutgadas èn er interpresas da helicopters e plazzas aviaticas regiunalas. Co taxescha la regenza las consequenzas respectivas per las interpresas da helicopter en noss chantun e per la plazza aviatica a Samedan?
    6. Tge ulteriuras consequenzas spetga la regenza?
7. È la regenza da l'avis che noss pajais dovria in'atgna lingia aviatica naziunala cun atgnas colliaziuns intercontinentalas?
    8. Ha la regenza l'intenziun da sa participar, saja quai sulet u ensemen cun auters chantuns, ad ina societad d'agid "Crossair Plus"?
    9. Ha la regenza, ensemen cun ils auters chantuns, l'intenziun d'influenzar a moda decisiva il scleriment cumplet da la responsabladad per il desaster da la Swissair?
    10. Pertge n'ha la regenza betg vendì las 10'000 aczias da la Swissair ch'èn tenor il quint 2000 anc en possess dal chantun (mira p. ex. la vendita da 1'890 aczias l'onn 2000 per il curs da fr. 350.--)? Tenor rapports da gasettas ha il chantun Son Gagl gì in meglier sensori ed ha vendì il rest da sias aczias da la Swissair en il decurs da la primavaira 2001.


Cuira, ils 9 d'october 2001

Name: Loepfe, Augustin, (Cuira), Tremp, Augustin (Almen), Bundi, Cahannes, Capaul, Carisch, Casanova (Vignogn), Cathomas, Catrina, Cavegn, Cavigeli, Christoffel, Conrad, Crapp, Demarmels, Dermont, Donatsch, Federspiel, Frigg, Geisseler, Giovannini, Giuliani, Gross, Hübscher, Hug, Jäger, Keller, Koch, Lardi, Locher, Loepfe, Looser, Meyer, Montalta, Nick, Noi, Parolini, Parpan, Patt, Pfenninger, Pfiffner, Portner, Quinter, Righetti, Roffler, Sax, Schmid (Sedrun), Schmid (Spleia), Schmid (Val S. Pieder), Schütz, Stiffler, Suenderhauf, Thomann, Tramèr, Trepp, Tuor (Trun), Walther, Zanolari, Zarro

Session: 09.10.2001
Vorstoss: rg Interpellation


Resposta da la regenza


    1. La gronda part dals giasts che fan vacanzas en il Grischun derivan da la Germania, da l'Italia e da la Svizra. La part dals giasts grischuns che viagian cun l'aviun è pli pitschna che 5% (valur approximativa da Graubünden Ferien). Difficils da valitar èn dentant da preschent las consequenzas sin la conjunctura, la disposi-ziun generala dals consuments e surtut sin la regiun da Turitg ed ils eventuals effects negativs che resultan da quai per il turissem en il Grischun. D'ina vart pudess in tschert respect u ina malsegirezza visavi il sgular, betg sulettamain pervia da la situaziun da la Swissair, chaschunar che dapli giasts prefereschan las vacanzas d'enviern en las muntognas empè da viadis en pajais lontans. Da l'autra vart dovri medemamain ulteriuras mesiras da reclama sistematicas da Graubünden Ferien che vegnan realisadas en collavuraziun cun Schweiz Tourismus per eliminar ils donns da la reputaziun ch'èn problematics per il turissem.

    2. Ins na conuscha nagins manaschis en il chantun Grischun ch'èn pertutgads substanzialmain da la situaziun sco furniturs da la gruppa Swissair. Quants lavurants dal chantun Grischun che lavuran tar la Swissair na savain nus betg.

    3. Er per il Grischun sco lieu economicamain attractiv èsi impurtant che la Svizra disponia d'ina integraziun europeica ed intercontinentala. Primarmain vegni ad esser l'incumbensa da las instituziuns ch'èn cumpetentas sin plaun naziunal per la promoziun da l'economia e per la reputaziun da la Svizra da preschentar ils problems actuals a moda objectiva e d'accentuar ils avantatgs che la Svizra posseda anc adina sco lieu per interpresas. Sin plaun chantunal n'èn previsas naginas mesiras spezialas a basa da las enconuschientschas actualas.

    4. La cassa da pensiun dispona d'in deposit central d'aczias svizras che s'orientescha tenor il SMI (Swiss Market Index). La Swissair ha figurà sco Blue-Chip en quest index. La cassa da pensiun ha tegnì aczias da la SAir en il rom da l'evaluaziun al SMI. Ella administrescha las aczias tenor in concept anticiclic. Ulteriuras acquisiziuns succedan perquai suenter regress dal curs. L'effectiv dals 11 d'october 2001 è sa muntà a 1320 aczias al curs da fr. 6.99. La cassa da pensiun n'ha naginas obligaziuns da la Swissair en il portafegl.


    5. A singulas interpresas aviaticas en il chantun Grischun (plazza aviatica a Samedan, Air Grischa) han ins già visà las assicuranzas per casco da guerra e responsabladad en cas da guerra, vandalissem, tumults e.u.v. Sch'ins vegn a stuair assicurar er en il futur las ristgas da guerra, avess quai sco consequenza in augment da la premia da ca. 45%. Ultra da quai han tant la plazza aviatica da Samedan sco er la Air Grischa da pajar premias considerablamain pli autas da l'assicuranza ordinaria da casco e responsabladad.

    6. Tar la situaziun che sa mida spert en il sectur da Swissair/Crossair n'èsi da preschent strusch pussaivel da valitar eventualas ulteriuras consequenzas. Quai na concerna betg sulettamain il manaschi aviatic, mabain er tut las interpresas affiliadas e las relaschadas che stattan en connex cun questas. Per il chantun Grischun na pon ins prevair da preschent naginas ulteriuras consequenzas.

    7. Per l'attractivitad da noss pajais èsi d'aspirar ina societad aviatica naziunala cun atgnas colliaziuns europeicas ed intercontinentalas. Latiers èsi impurtant che questa nova societad s'orienteschia tenor la situaziun dal martgà per restar cumpetitiva e per pudair mantegnair il manaschi aviatic. Ina societad aviatica cun sgols intercontinentals directs en la Svizra contribuescha a la reputaziun dal pajais sco lieu attractiv per l'economia.

    8. La regenza vegn probablamain a sa participar ensemen cun ils auters chantuns.

    9. Ord vista dal chantun na stat questa dumonda da preschent betg en il center. En la radunanza generala da la primavaira 2001 ha il chantun proponì, ensemen cun auters chantuns, ina examinaziun speziala. Per mantegnair ils dretgs dals acziunaris vul la confederaziun s'engaschar er vinavant per il scleriment da las responsabladads; ella vul perquai pussibilitar la cuntinuaziun da l'examinaziun speziala cun ina contribuziun finanziala. Ins sto spetgar il resultat da quest'examinaziun speziala.

    10. Durant la sessiun da matg dal cussegl grond n'han ins objectà nagut cunter la strategia "mantegnair las aczias da la Swissair" durant la deliberaziun da l'interpellaziun Suenderhauf. Ina renunzia dal maun public a l'engaschament per la Swissair al mument dal nov start sut signur Corti na fiss plinavant betg vegnida chapida en la publicitad. Il chantun Son Gagl è sa separà gia l'onn 1999 da sias aczias da la Swissair. Las venditas da l'onn 2001 èn vegnidas fatgas da la cassa da pensiun e da l'institut d'assicuranza d'edifizis dal chantun Son Gagl.