Postulat concernent creaziun d'in "Premi da turissem e d'ambient dal chantun Grischun"
Sessiun: 27.11.2001
Il turissem è enconuschentamain cun distanza il factur economic il pli impurtant per il chantun Grischun. Las dumondas da las tendenzas turisticas, il svilup dal martgà sco er la posiziun grischuna giavischada ed empermettenta sin quest factur economic maina tut tenor la valitaziun persunala natiralmain a conclusiuns fitg differentas. I duess esser a tuts cler ch'il mantegniment dal maletg attractiv da la cuntrada è d'impurtanza centrala sco basa e chapital dal turissem.
Ultra da las dumondas davart il svilup dal passà e da l'avegnir dal turissem sco er davart tut ils problems d'utilisaziun, da protecziun e da traffic coerents a quest svilup, vegn pli savens discutà davart il svilup e la concepziun d'in turissem persistent.
La promoziun d'in turissem ch'è tant ord vista economica sco er ord vista ecologica persistent dastgass gist esser per il chan-tun Grischun da grond'impurtanza.
Il chantun Grischun enconuscha bain divers premis da promoziun e da renconuschientscha en il sectur da cultura, da sport e d'agricultura, dentant betg en il sectur dal turissem.
Sin fundament da l'impurtanza da l'innovaziun e la creativitad en il sectur d'in turissem persistent supplitgeschan las postu-lantas ed ils postulants la regenza da crear in "Premi da turissem e d'ambient dal chantun Grischun".
I duai vegnir creà in premi tant sco impuls per prestaziuns u projects extraordinaris sin il sectur dal "turissem persistent ed ecologic" sco er sco renconuschientscha per questas prestaziuns.
Davart il chapital da dotaziun, las dumondas da procedura sco er la nominaziun da giuria decida la regenza. La giuria duai sa cumponer da represchentants dal chantun, da l'economia sco er da gruppas per la protecziun da l'ambient.
Cuira, ils 27 da november 2001
Name: Pfenninger, Schütz, Meyer, Arquint, Frigg, Jäger, Locher, Looser, Noi, Pfiffner, Schütz, Trepp, Zindel
Session: 27.11.2001
Vorstoss: rg Postulat
Resposta da la regenza
Il chantun Grischun surdat premis uffizials be en il sectur da cultura. Dasper datti di-stribuziuns da premis nua ch'il chantun sa participescha (premis per fitg buns edifizis, premi da sport grischun, premi d'innovaziun per l'allevament da muvel rentabel, ta-xaziun da purments).
Stentas da furmar il turissem a moda persistenta - en reguard ecologic, social ed e-conomic - vegnan iniziadas oz en blers lieus. Igl è intschert, sche questas fadias pon vegnir rinforzadas a moda efficazia cun in premi dal chantun ch'è sulettamain drizzà vers ils aspects ecologics. Las experientschas cun premis en la medema direcziun èn per gronda part negativas:
- Il premi d'innovaziun grischun per l'agricultura ed il turissem è vegnì stritgà suen-ter duas surdadas per mancanza d'interess.
- Il premi d'ambient da l'Arge Alp n'è betg vegnì manà vinavant per mancanza da candidaturas valablas.
- La concurrenza d'ambient en il rom da la campagna "Endlich Ferien. Ihre Land-schaft" ha chattà in'attenziun fitg pitschna.
Per pudair dar impuls a moda persistenta e per cuntanscher in grad d'attenziun che promova l'imitaziun sto ina surdada da premis surventscher grondas difficultads.
Facturs che decidan davart il success d'in premi èn per l'ina ina communicaziun ex-tendida per insumma pudair lantschar il premi e per far conuschent il premi e per l'autra in dumber suffizient da projects inoltrads per ch'ina concurrenza possia in-summa avair lieu. Ultra da quai è necessaria in accumpagnament per tscherts pro-jects per lantschar e cuntinuar a moda persistenta ils projects tschernids.
La regenza è da l'opiniun ch'i fa sulettamain senn da lantschar in nov premi, sche quel satisfa a las pretensiuns numnadas precedentamain ed è integrà en quest senn en in concept empermettent. Sin fundament dals resultats anzi flaivels da blers pre-mis da fin uss sa mussi per necessari da na sa limitar sulettamain sin l'aspect da "l'ecologia" mabain da crear in premi grischun da turissem che valitescha ton l'innovaziun sco er la persistenza ecologica, sociala ed economica.
Sin fundament da questas ponderaziuns è la regenza pronta da prender encunter il postulat en il senn da las explicaziuns e d'elavurar in concept correspundent per in premi da turissem dal Grischun.