Navigation

Inhaltsbereich

Postulat concernent la restricziun da la reclama per products da tubac

Sessiun: 27.11.2001
Il tubac è in dals artitgels da consum che vegn vendì il pli bain sin il mund. Schebain che l'industria da cigarettas s'engascha d'ina vart per la protecziun da la giuventetgna, emprova ella da l'autra vart da gudagnar cun meds da reclama adina pli raffi-nads adina dapli clientas e clients. Las gruppas en mira èn oz las dunnas ed ils giuvenils. La reclama da cigarettas sugerescha a las fimadras ed als fimaders potenzials ina vita ventiraivla, plain success, coola e plain aventuras. Betg be en Svizra, mabain sin l'entir mund mussa la reclama specifica da cigarettas e da l'industria da tubac per la giuventetgna deplorablamain l'effect giavischà e catastrofal.
Adina pli blers e cunzunt er giuvenils pli giuvens prendan la cigaretta. La remartga "fimar periclitescha la sanadad" para d'avair insumma nagin effect. Ina part dals giuvenils è periclitada da drogas e la reclama destruescha las grondas stentas da la scola, da las uniuns e.u.v. concernent la prevenziun da tissis enivrants.
La restricziun da la reclama per products da tubac fiss ina mesira gidaivla tranter bleras che pudess far frunt a quest svilup inquietant. Il chantun da Genevra ha concludì mesiras da restricziun. Il cussegl dal chantun da Turitg ha inoltrà cun agid da la regenza ina intervenziun correspundenta. En il Grischun ha il cussegl grond gia inoltrà il favrer 1980 in postulat concernent il scumond da reclama d'alcohol e da tubac.
La regenza vegn danovamain envidada d'examinar las pussaivladads ch'ins stuess prender per scumandar en il Grischun la reclama per products da tubac sin plazs publics e privats, en e vi d'edifizis publics ed a chaschun d'occurrenzas publicas, p. ex. a chaschun da preschentaziuns en il kino etc. La reclama per propi per products da tubac duai esser permessa sulettamain als posts da vendita.

Cuira, ils 27 da november 2001
Name: Jäger, Scharplatz, Joos, Arquint, Battaglia, Beck, Biancotti, Brüesch, Bucher, Büsser, Butzerin, Capaul, Casanova (Cuira), Cathomas, Catrina, Caviezel, Christ, Conrad, Dalbert, Donatsch, Frigg, Giacometti, Giuliani, Gubelmann, Gunzinger, Har-degger, Hess, Koch, Lardi, Locher, Looser, Luzi, Luzio, Maissen, Marti, Meyer, Noi, Parolini, Peretti, Pfenninger, Pfiffner, Righetti, Robustelli, Schmid (Sedrun), Schmid (Val S. Pieder), Schmutz, Schütz, Stiffler, Toschini, Trepp, Zindel

Session: 27.11.2001
Vorstoss: rg Postulat

Resposta da la regenza

Las consequenzas dal tubac per la sanadad munta in dals problems ils pli gravants per la sandad publica da la Svizra. Ils ultims onns èsi da constatar in augment inquietond da la quota da fimaders cunzunt tar ils giuvenils. Il cumenzament da fimar vegn favurisà entras differents facturs da ristga sco pitschna conscienza da l'atgna valur, problems en scola (squitsch da prestaziun, stress), temas, depressiuns e.u.v.

Tenor il giudicament da las persunas dal fatg valan in'integraziun da scola senza problems, in'atmosfera generalmain favuraivla en famiglia e scola, aspectativas da prestaziun realisticas, l'intermediaziun da perspectivas positivas da la vita ed ina ferma conscienza da l'atgna valur sco facturs da protecziun per impedir ch'ils giuvenils cumenzian a consumar tubac. L'atun dal davos onn ha il chantun Grischun incumbensà il center per prevenziun e promoziun da la sanadad dal chantun Son Gagl (ZEPRA) da manar a Cuira in center regiunal per prevenziun e promoziun da la sanadad. Il center regiunal ha tranter auter l'incumbensa da promover tar la populaziun e cunzunt tar ils giuvenils entras acziuns correspundentas ina moda sanadaivla da viver.

Il scumond da reclama da tubac sin plazzas publicas e privatas, en e vi d'edifizis publics ed a chaschun d'occurrenzas publicas, prendì en mira cun quest postulat, pudess medemamain esser ina contribuziun per cuntanscher che pli paucs giuvenils cumenzan a fimar. Correspundentamain ha la confederaziun er prendì a mauns en il rom dal program naziunal 2001 2005 da la prevenziun da tubac, d'examinar dasper in scumond da vender products da tubac a giuvenils sut 16 onns er mesiras legalas per restrenscher la reclama per products da tubac.


La reclama per products da tubac è reglada en l'ordinaziun federala davart il tubac ed ils products da tubac dal 1. da mars 1995 che sa basa sin la lescha federala da victualias. L'art. 15 da l'ordinaziun fixescha che scadina reclama per products da tubac che sa drizza cunzunt a giuvenils sut 18 onns saja scumandada. Scumandada è cunzunt la reclama en lieus nua che oravant tut giuvenils sa retegnan. L'execuziun da l'ordinaziun da tubac è il duair dal laboratori chemic per la controlla da victualias e la protecziun da l'ambient e da las vischnancas. En ils cas nua ch'occurrenzas per giuvenils vegnan permessas èsi la chaussa da la vischnanca da far attenziun che las disposiziuns legalas vegnan observadas.

Tar la lescha da victualias e l'ordinaziun latiers sa tracti d'ina reglamentaziun definitiva da la confederaziun. Sin fundament da la repartiziun da las cumpetenzas tranter la confederaziun ed ils chantuns èsi scumandà als chantuns da relaschar leschas che cumondan u scumondan en territoris ch'èn transferids a la confederaziun per relaschar prescripziuns. Correspundentamain èsi scumandà als chantuns da relaschar atgnas leschas materialas sco in scumond da reclama per products da tubac. En quest senn ha alura er il cussegl dal chantun Turitg refusà la moziun concernent decretar prescripziuns legalas per il scumond da vendita da products da tubac a giuvenils sut 16 onns ch'è vegnida numnada en il postulat.

La regenza propona sin fundament da las explicaziuns precedentas da na betg acceptar il postulat. Ella rinviescha en quest connex al fatg ch'il chantun na permetta betg dapi blers onns da far reclama per products da tubac sin e vi da plazzas publicas dal chantun. Ella è pronta d'intimar las vischnancas da medemamain scumandar la reclama per products da tubac sin e vi da plazzas publicas da las vischnancas.