Navigation

Inhaltsbereich

Interpellaziun concernent la sanaziun da chasas d'abitar en il territori da muntogna

Sessiun: 29.01.2002
Cun la lescha federala davart la meglieraziun da las relaziuns d'abitar en territoris da muntogna (LMAM) vegnan sustegnidas famiglias cun entradas bassas che saneschan lur abitaziuns cun agid finanzial da la confederaziun. En il rom da la "Nova gulivaziun da finanzas tranter la confederaziun ed ils chantuns" NGF èsi previs che quest'incumbensa duai vegnir surdada als chantuns. La lescha federala actuala scada pia definitivamain cun l'entrada en vigur da la nova gulivaziun da finanzas NGF, il pli tard dentant l'onn 2005.

En il rapport annual 2000 sin pagina 55 infurma la regenza davart contribuziuns garantidas vi da la sanaziun da chasas d'abitar. Uschia han ins garantì tenor il rapport da la regenza contribuziuns da totalmain fr. 2'787'200.--. La confederaziun sa participescha a quests custs cun fr. 767'000.- (27.5%), il chantun cun fr. 1'637'400.-- (58.75%) e las vischnancas u terzas persunas cun fr. 382'800.-- (13.75%). Da questas contribuziuns vi da sanaziuns da chasas d'abitar han pudì profitar surtut il territori da muntogna ed ils tegnairchasas agriculs.

Ils interpellants èn da l'avis ch'i saja absolutamain necessari da cuntinuar cun l'agid dal stadi en cas da sanaziuns da chasas d'abitar en territoris da muntogna ch'èn urgentamain necessarias. Grazia a l'agid federal e chantunal han ins mintg'onn pudì meglierar numerusas chasas u construir da nov talas sco edifizis substitutivs. La promoziun da sanaziuns da chasas d'abitar è fitg impurtanta surtut per las regiuns economicamain pli flaivlas, perquai ch'ella pussibilitescha er da dar incumbensas a la mastergnanza locala e regiunala. Ma er concernent la politica regiunala e la politica d'urbanisaziun ston ins considerar la promoziun da las sanaziuns da chasas d'abitar sco mesira indispensabla. Perquai ston ins inviar a temp las mesiras correspundentas en vista a la scadenza da la lescha federala.

Ils interpellants dumondan la regenza da respunder las sequentas dumondas:
    1. Tge posiziun ha la regenza concernent la cuntinuaziun dal sustegn dal stadi en cas da sanaziuns da chasas d'abitar en il territori da muntogna?
    2. Tge vul la regenza far e cura vul ella daventar activa en vista a la scadenza da la lescha federala correspundenta?

Cuira, ils 29 da schaner 2002

Name: Tuor, (Mustér), Caviezel (Pitasch), Battaglia, Bachmann, Beck, Berther (Mustér), Berther (Sedrun) Biancotti, Büsser, Capaul, Casanova (Vignogn), Cathomas, Cavegn, Cavigelli, Claus, Crapp, Dalbert, Darms, Dermont, Feltscher, Furrer, Geisseler, Giacometti, Giuliani, Gross, Joos, Koch, Lardi, Luzio, Maissen, Nick, Noi, Parpan, Portner, Sax, Schmid (Sedrun), Schmid (Val S. Pieder), Thomann, Tscholl, Tuor (Trun), Walther, Zanolari, Zegg

Session: 29.01.2002
Vorstoss: rg Interpellation

Resposta da la regenza

    1. En la resposta a l'interpellaziun Maissen (Schluein) concernent la promoziun da la proprietad ed a l'interpellaziun Cathomas concernent contribuziuns per meglierar las relaziuns d'abitar en il territori da muntogna è la regenza s'exprimida gia en la sessiun d'october 1997 resp. en la sessiun da mars 1998 en senn positiv davart la cuntinuaziun da las mesiras per meglierar las relaziuns d'abitar en il territori da muntogna. Ella è er sa declerada pronta d'examinar, per quant ch'ils credits mancants da la confederaziun pudessan vegnir remplazzads tras contribuziuns chantunalas. En il rom da la reorganisaziun da la gulivaziun da finanzas dal stadi (NGF) vegnan er examinadas differentas repartiziuns da las incumbensas tranter la confederaziun ed il chantun. I n'è anc betg segir sche la lescha federala davart la meglieraziun da las relaziuns d'abitar en territoris da muntogna dals 20 da mars 1970 tras la confederaziun vegnia cuntinuada suenter l'onn 2005. L'onn 2001 ha la regenza fixà cleramain en sia consultaziun davart la lescha davart promover la construcziun da chasas d'abitar ch'ins stoppia insister ord la vista dal chantun Grischun sco chantun da muntogna che la meglieraziun da las relaziuns d'abitar en territoris da muntogna vegnia cuntinuada en sia dimensiun oriunda er suenter l'onn 2005 u che sias finamiras stoppian vegnir integradas en la nova lescha davart promover il spazi d'abitar. Per quant che la confederaziun vegn anc ad
    ademplir l'incumbensa tenor la lescha federala davart la meglieraziun da las relaziuns d'abitar en territoris da muntogna vegn il chantun a conceder prestaziuns sco cumplettaziun a talas da la confederaziun, e quai tenor l'art. 4 da la lescha


    chantunala davart la construcziun d'abitaziuns socialas e la meglieraziun da las relaziuns d'abitar en il territori da muntogna. Sch'ins po eventualmain metter a disposiziun ulteriurs meds sco cumpensaziun per perditas da contribuziuns da la confederaziun è da giuditgar a temp inditgà, considerand ils meds finanzials che la confederaziun attribuescha al chantun en il rom da la NGF ed en il rom da la situaziun finanziala dal chantun.
    2. En la lescha davart la construcziun d'abitaziuns socialas e la meglieraziun da las relaziuns d'abitar en territoris da muntogna è dada en l'art. 4 la basa legala per ina promoziun independenta da contrucziun d'abitaziuns tras il chantun. La regenza vegn a persequitar attentamain quest svilup er en il futur e vegn a temp a trair las decisiuns necessarias. Questas èn dependentas da la structuraziun da la nova lescha davart promover il spazi d'abitar, d'ina eventuala cuntinuaziun da la lescha davart la meglieraziun da las relaziuns d'abitar en territoris da muntogna e da la nova ordinaziun da la gulivaziun da finanzas (NGF).

    Datum: 12. favrer 2002