Dumonda en scrit concernent la surchargia da l'uffizi da dretg civil dal chantun Grischun (natiralisaziuns)
Sessiun: 28.05.2002
Durants ils ultims mais èn creschidas las dumondas per il dretg da burgais uschè fitg ch'il persunal da l'uffizi da dretg civil na vesa cun la meglra voluntad betg pli sur la lavur ora.
Uschia na vegnan betg transmessas dumondas approvadas da las vischnancas burgaisas fin in mez onn a la regenza. La vischnanca burgaisa da Tavau ha empermess il november 2001 ad ina dunna giuvna da l'Ollanda il dretg da burgais ed oz, bainbaud la fin da matg n'è la dumonda anc betg tar la regenza.
A Cuira èn vegnidas fatgas en in'acziun bunamain 2000 natiralisaziuns, quai che ha gì per consequenza in'ulteriura surchargia. En l'uffizi da dretg civil èn anc retardadas tras la midada dal cader bleras dumondas.
Perquai supplitgesch jau la regenza da respunder a las suandantas dumondas:
1. È la regenza pronta da metter en urden questa situaziun?
2. Tge intenziunescha la regenza da far en l'avegnir per evitar talas situaziuns sin fundament dal dumber creschent da dumondas?
3. Èsi pussaivel ch'i vegnian engaschadas gidantras e gidanters per l'uffizi da dretg civil?
Cuira, ils 28 da matg 2002
Name: Stiffler
Session: 28.05.2002
Vorstoss: rg SchriftlicheAnfrage
Resposta da la regenza
L'uffizi da dretg civil è surchargià massivamain en il sectur dal dretg da burgais. L'entschatta matg 2002 èn stadas pendentas en tut 750 dumondas da natiralisaziun ordinarias. Dapi in temp s'augmentan fitg las dumondas en arriv. L'onn 2002 quinta l'uffizi cun ina rata da creschientscha da circa 25 pertschient.
Dasper la procedura da natiralisaziun ordinaria ha l'uffizi plinavant d'elavurar insaquantas "acziuns spezialas" da vischnancas burgaisas. Per exempel èn assegnadas da la vischnanca burgaisa da Cuira or d'ina tala acziun da natiralisaziun totalmain 1537 dumondas da natiralisaziun a l'uffizi. Autras vischnancas burgaisas han exequì talas acziuns, dentant en ina dimensiun pli pitschna, u ch'ellas èn en elavuraziun u annunziadas.
En il rom da l'elavuraziun da dumondas da natiralisaziun èn da percurrer numerus, pass da procedura che dovran per part bler temp - tar burgaisas e burgais grischuns pli pauc, tar burgaisas e burgais svizzers d'ordaifer il chantun in zichel dapli. Fitg grondas èn las proceduras en connex cun estras ed esters ch'èn da natiralisar. Entaifer il decurs d'elavuraziun succedan mo singuls pass d'elavuraziun tras l'uffizi da dretg civil. L'uffizi ha dentant da diriger e coordinar l'entira procedura. Ils singuls pass d'elavuraziun en las vischnancas, en ils auters chantuns e tar la confederaziun n'èn perencunter betg d'influenzar; quai vala spezialmain per il temp d'elavuraziun.
La fin da matg 2002 èn stads pendents tar l'uffizi da dretg civil sez 157 cas da natiralisaziun. Or da las acziuns da natiralisaziun extraordinarias èn stadas anc ulteriuras 1237 dumondas da natiralisaziun en elavuraziun. Sin fundament da questa grevezza extraordinaria per l'uffizi han ordinà u mess sin via l'uffizi, il departament responsabel e la regenza las suandantas mesiras:
- Dapi l'atun 2001 èn occupadas tar l'uffizi da dretg civil duas forzas da lavur a temp cumplain sco gidantras cun l'elavuraziun da las dumondas da natiralisaziun. Ina persuna s'occupa il mument exclusivamain cun las dumondas dals petents da Cuira che avevan fin uss in lieu da burgais d'ordaifer il chantun. La segunda persuna elavura las natiralisaziuns simplifitgadas e gida da sminuir las pendenzas tar las natiralisaziuns ordinarias. En l'intern da l'uffizi vegn impundì plinavant in collavuratur dal servetsch dal stadi civil a 50 pertschient da ses temp da lavur per l'elavuraziun da dumondas da natiralisaziun.
- Tras ina cunvegna cun il circul da Cuira han pudì vegnir excorporadas a partir dal mais da matg da quest onn 667 dumondas da Cuira cun in lieu da burgais grischun a "funcziunaris spezials" da l'uffizi da stadi civil da Cuira. Grazia a questa cunvegna stattan a disposiziun per l'elavuraziun da questas dumondas ulteriuramain 120 ed a partir dal 1. da fanadur 2002 160 pertschient da plazzas. Quests funcziunaris lavuran sut la surveglianza administrativa e professiunala da l'uffizi da dretg civil.
- L'uffizi da dretg civil ed il departament superiur observan vinavant dal reminent cun attenziun il svilup da las entradas da dumondas per pudair metter a disposiziun en cas da basegn ulteriur persunal.
Datum: 1. da fanadur 2002