Navigation

Inhaltsbereich

Moziun concernent reglar da nov las contribuziuns chantunalas a las scolas medias privatas

Sessiun: 31.05.2002
Cun la lescha davart las scolas medias da l'onn 1962 ha il chantun Grischun incumbensà ils instituts privats existents a Mustér, Schiers, Tavau, Ftan, Zuoz e Samedan da surprender er la funcziun d'ina scola media regiunala. Cun questa schlia-ziun èsi stà pussaivel al chantun da regiunalisar spert ils gimnasis, e quai senza stuair investir imports considerabels en l'infrastructura.
Il chantun sa participescha als custs da gestiun cun ina contribuziun che correspunda a las expensas per la scolaziun d'in gimnasiast a la scola chantunala a Cuira. Questa regulaziun è valaivla anc oz (art. 17 lescha davart las scolas medias). La davosa revisiun da quest artitgel è vegnida realisada l'onn 1998 suenter la moziun Deplazes.
Divers facturs han midà essenzialmain la situaziun actuala e pretendan in'adattaziun da l'art. 17.
La realisaziun dal reglament per renconuscher la maturitad RRM chaschuna bler pli auts custs a las scolas medias privatas ch'a la scola media chantunala a Cuira. Quai na vegn betg resguardà en la calculaziun vertenta da las contribuziuns.
La scola media chantunala che vegn consultada per calcular las contribuziuns ha tariffas pli bassas perquai ch'ella po manar pliras classas parallelas e perquai ch'ella ha classas pli grondas. Quest fatg na vegn betg resguardà en la calculaziun da las contribuziuns.
La pussaivladad d'offrir ulteriuras purschidas (p.ex. maturitad bilingua) stat bain libra a las scolas medias privatas, è dentant facticamain nunpussaivla pervia dals custs da realisaziun ch'èn bler pli auts. Per consequenza perdan las scolas medias privatas lur attractivitad u daventan dependentas da contribuziuns considerablas da la regiun per ademplir lur funcziun impurtanta en la regiun.
Al di d'oz ston tut las scolas medias privatas vegnir sustegnidas cun contribuziuns considerablas da la regiun. Senza questas contribuziuns da vart da las vischnancas e d'ulteriuras instituziuns na fiss la survivenza da las scolas medias privatas strusch garantida.
Perquai daventi necessari d'elavurar ina nova concepziun da las contribuziuns chantunalas.

Nus envidain la regenza d'adattar l'art. 17 da la lescha davart las scolas medias uschia che:

1. ils custs pli auts chaschunads tras la realisaziun dal RRM a las scolas medias privatas vegnian resguardads per calcular las contribuziuns.

2. la grondezza da classa da la scola media chantunala che vegn consultada per calcular ils custs vegnia substituida cun ina grondezza mesauna, en la quala las grondezzas da classa da las scolas medias privatas vegnian resguardadas adequatamain.

3. las purschidas supplementaras (p.ex. maturitad bilingua) che sa laschan realisar bler pli difficilmain en las scolas medias privatas vegnian resguardadas adequatamain per calcular la contribuziun.

Cuira, ils 31 da matg 2002

Name: Bischoff, Tuor (Mustér), Bühler, Ambühl, Arquint, Bär, Barandun, Berther (Sedrun), Büsser, Casanova (Cuira), Cathomas, Catrina, Cavegn, Christ, Christoffel, Claus, Dalbert, Farrér, Giacometti, Giovannini, Giuliani, Hanimann, Hardegger, Hartmann, Hübscher, Jeker, Juon, Lardi, Lemm, Luzio, Mani, Nick, Parolini, Portner, Ratti, Righetti, Robustelli, Sax, Scharplatz, Stiffler, Thomann, Thöny, Trachsel, Tuor (Trun), Walther, Wettstein, Zanolari, Zegg, Zinsli

Session: 31.05.2002
Vorstoss: rg Motion


Resposta da la regenza

En il rom da las lavurs preparativas per la revisiun da la lescha davart las scolas medias l'onn 1998 ha examinà ina gruppa da lavur ils pajaments da contribuziuns a las scolas medias privatas tenor l'art. 17 da la lescha davart las scolas medias resguardond la realisaziun d'exequir dal reglament per renconuscher la matura (RM) e da las proximas lavurs da sanaziun da la scola chantunala dal Grischun. Questa gruppa da lavur, a la quala i appartegnan dus commembers da las scolas medias privatas, ha preschentà en il december 1997 in rapport extendì che sclerischa differents models da mesiraziun e da pajaments da contribuziuns. L'analisa ha mussà che l'orientaziun d'ina pauschala da scolars sin fundament dals custs nets d'in scolar a la scola chantunala è optimal. Sco innovaziun essenziala a favur da las scolas medias privatas e sco consequenza da la proxima activitad da refurma e d'investiziun è vegnida introducida cun la revisiun da la lescha da l'onn 1998 ina pauschala d'investiziun da 9% dals custs da manaschi nets da la scola chantunala. Ultra da quai vegn concedì a las scolas medias privatas ina part dals custs d'administraziun da 2.5% dals custs da manaschi nets da la scola chantunala. La concepziun da la calculaziun dals pajaments da contribuziun chantunals resguarda las eventualas expensas supplementaras resultadas da la realisaziun da la RM.

Per pudair giuditgar objectivamain ils pajaments da contribuziuns dal chantun a las scolas medias privatas è la scola chantunala vegnida elegida en il rom dal project da pilot GRiforma sco servetsch da pilot e dispona oz d'in quint dals custs dals singuls posts, cun ils quals ins po laschar eruir ils custs per scolar resp. per scolara a la scola chantunala resguardond tut ils custs da manaschi. Ina cumparegliaziun tranter ils custs sin fundament dal quint dals custs dals singuls posts “(KSTR”) e dals custs effectivs dals pajaments da contribuziun dal chantun (“BZ”) a las scolas medias privatas (onn da scola 1999/2000: “KSTR” fr. 15'283, “BZ”: fr. 20'189, onn da scola 2000/2001: “KSTR” fr. 16'219, “BZ”: fr. 19'452) mussa ch'il chantun paja gia oz contribuziuns per scolar resp. scolara a las scolas medias privatas ch'èn cleramain pli auts ch'ils custs correspundents a la scola chantunala.

La regenza renconuscha il fatg che las scolas medias privatas ston sa far valair en in champ difficultus e ch'ellas èn per las regiuns dal lieu facturs economics impurtants. Ella è perquai pronta d'acceptar la dumonda da l'intervenziun parlamentara per l'examinaziun sut las cundiziuns generalas skizzadas suandantamain. En vista a la situaziun finanziala precara cuntinuanta dal chantun pon ins responsar ina midada dals pajaments da las contribuziuns a las scolas medias privatas be sche quella succeda senza custs supplementars. Quai maina a la consequenza ch'ins sto dad ina vart metter en dumonda la purschida da scolaziun da las scolas medias dal chantun tenor la lescha davart las scolas medias e da tschella vart ston ins examinar sch'i duess vegnir introducì pajaments da las contribuziuns differenziads specificamain per las partiziuns u per ils stagalims sin la basa dal quint dals custs dals singuls posts da la scola chantunala. Spezialmain sto vegnir examinada ultra da quai la situaziun dal pregimnasi dal chantun, perquai che la situaziun al stgalim superiur da la scola populara è sa midada considerablamain dapi l'introducziun d'ina segunda lingua estra obligatoria visavi l'onn 1998 e che la RM n'ha naginas consequenzas per il pregimnasi. Sa basar, sco proponì en il postulat, sin ina grondezza da classa media per calcular ils custs è per encunter tar ina subveziun cun pauschalas da scolars nunenconuschent per il sistem.

En quest senn è la regenza pronta da prender encunter la moziun sco posatulat.

Datum: 26 d'avust 2002