Dumonda en scrit concernent las prestaziuns da tegnairchasa spitex
Sessiun: 17.06.2002
Suenter che jau hai examinà plirs quints d'organisaziuns da spitex constatesch jau che las prestaziuns da tegnairchasa chaschunan grondas sperditas a las organisaziuns da spitex.
La tariffa da fr. 8.-- fin fr. 12.-- per ura è fixada memia bassa dal chantun. Quai ha per consequenza ch'il chantun e las vischnancas han da pajar suren ensemen almain fr. 30.-- per mintg'ura prestaziuns per tegnairchasa spitex .
Jau hai ultra da quai stuì udir dal persunal da spitex che gist questa prestaziun vegn nizzegiada.
Jau ma driz perquai a la regenza cun las suandantas dumondas:
1. Pertge è la tariffa per ura per la prestaziun per tegnairchasa spitex uschè bassa en noss chantun?
2. Datti directivas exactas dal chantun tgi che po e dastga far adiever da quest agid?
3. Na prenda la spitex cun questa tariffa qua betg davent in gudogn accessori da la vart privata?
Cuira, ils 17 da zercladur 2002
Name: Capaul
Session: 17.06.2002
Vorstoss: rg SchriftlicheAnfrage
Resposta da la regenza
La regenza respunda la dumonda tschentada suandantamain:
1. Tenor calculaziuns da l'uffizi da sanadad muntan ils custs per in'ura presta- ziuns da tegnairchasa en media fr. 54.--. Ils custs per prestaziuns da tegnairchasa na vegnan betg surpigliads da las cassas da malsauns e ston vegnir pajads correspundentamain dals clients sezs.
Per che la purschida da las prestaziuns da tegnairchasa spitex saja accessibla a la gronda massa, independentamain da la situaziun da salari, e per ch'era persunas en modestas relaziuns economicas possian duvrar talas prestaziuns vegn il pretsch da las prestaziuns da tegnairchasa spitex reducì tras contribuziuns dal maun public.
Per il 1. da fanadur 2002 ha la regenza auzà la tariffa minimala per presta- ziuns da tegnairchasa spitex da fr. 8.-- sin fr. 12.-- e la tariffa maximala da fr. 12.-- sin fr. 16.
2. Tenor l'incarica generala da prestaziuns per las organisaziuns da la tgira a chasa e da tgira (spitex), la quala è vegnida approvada da la regenza l'onn 1998, pon suandantas persunas pretender prestaziuns da spitex:
- persunas attempadas, impedidas, malsaunas, disgraziadas, reconvalescentas e persunas muribundas;
- persunas ch'èn en crisas u en situaziuns da risico psichicas, fisicas e/u socialas
- dunnas avant e/u suenter il part
- confamigliars che tgiran
- confamigliars d'ina persuna che basegna agid u tgira.
L'observaziun da l'incarica generala da prestaziuns è la basa per la renconuschientscha sco organisaziun cun dretg da subsidis ed uschia era per il pajament da contribuziuns da manaschi.
3. La reducziun dal pretsch per las prestaziuns da tegnairchasa spitex tras contribuziuns dal maun public po manar tar in dischavantatg d'offerents privats. La regenza ha correspundentamain prendì en vista d'examinar da princip l'autezza da la tariffa minimala e maximala resguardond las relaziuns finan- zialas da l'organisaziun spitex, la situaziun da concurrenza tar offerents privats sco era il fatg che tras las prestaziuns da tegnairchasa pon vegnir reducids ils segiurns en asils ed ospitals.
Datum: 13 d'avust 2002