Pertutgant la dumonda, sche e sut qualas premissas ch'interpresas dal dretg privat, activas sin il champ dal provediment d'energia èn suttamessas a las prescripziuns da submissiun valaivlas, na datti en l'entira Svizra anc nagins resultats clers en la ductrina u en la pratica giudiziala. En vista a questa basa giuridica intscherta piglia la regenza posiziun davart las dumondas fatgas sco suonda:

1. Tenor il text da la cunvegna GATT/WTO davart las acquisiziuns publicas (GPA) èn tranter auter suttamessas a la cunvegna interpresas da tutta furma giuridica, sch'ellas èn activas sin il champ dal provediment d'energia e sch'ellas vegnan dumagnadas plinavant per gronda part dal maun public. Ils chantuns han realisà questa chaussa en l'art. 8 al. 1 lit. c da la cunvegna internaziunala davart las acquisiziuns publicas. L'avis ch'è vegnì exprimì en la dumonda che la Rezia Energia SA saja dumagnada cun maioritad dal maun public, giuditgescha la regenza, resguardond las quotas dal dretg da votar, da princip sco gist. La quota d'aczias dal chantun Grischun vi da la Rezia Energia SA munta bain damain che 50%. Ma igl è da considerar che las ovras electricas da la Svizra nordorientala SA (ONO/NOK) èn participadas grazia a lur quota da maioritad vid la Watt SA era cun maioritad a la societad d'electricitad Laufenburg SA (SEL), la quala ha puspè var 21% vi da la Rezia Energia SA. L'entira participaziun dal maun public a la Rezia Energia SA è uschia considerablamain sur 50%. A la lescha da submissiun èn suttamess da l'autra vart - per realisar la lescha davart la navigaziun interna - tut ils purtaders d'incumbensas chantunalas e communalas, sch'els surdattan incaricas da construcziun, da furniziun e da presta-ziuns da servetsch (art. 1 al. 1 lit. d Lsub). Ovras electricas èn alura da considerar sco purtaders d'incumbensas chantunalas u communalas, sch'ellas han obtegnì ina incarica da provediment (cf. era messadi da la regenza dals 6 d'october 1997, carnet nr. 7/1997-98, p. 443). Era sut quest puntg da vista dastgass pia la Rezia Energia SA da princip esser suttamessa a la lescha chantunala da submissiun mo en il cas ch'ella surdat incaricas a terzs, e quai incaricas che stattan en connex cun las incumbensas da provediment ch'il maun public ha surdà ad ella.

Essend che la situaziun giuridica actuala n'è betg sclerida cun la clerezza giavischada, hai num da persequitar vinavant attentamain il svilup che sa mussa per suttametter manaschis dal provediment d'energia a las acquisiziuns publicas.
Uschia èsi fixà en la cunvegna tranter la UE e la Svizra davart tscherts aspects da las acquisiziuns publicas - cuntrari a la GPA - expressivamain la pussaivladad d'avair ina clausula d'exclusiun per ils secturs suttamess. La clausula correspundenta prevesa ina pussaivladad da liberaziun, sch'ils martgads correspundents èn liberalisads. Quai n'è dentant betg anc il cas. Per garantir „las medemas schanzas“ en il martgà d'electricitad fissi dentant da beneventar ina tala liberaziun dal champ d'applicaziun dal dretg da submissiun.

2. En il rom da las pussaivladads che stattan a disposiziun a la regenza vegn ella a s'engaschar per che la Rezia Energia SA observia las prescripziuns da submissiun valaivlas en sias futuras acquisiziuns da prestaziuns da construcziun, e quai uscheditg enfin ch'ina liberaziun da l'applicaziun dal dretg d'acquisiziun n'è betg succedida en il senn gist preschentà.

Datum: 29 d'october 2002