Dumonda en scrit concernent la zona da rimnada per camiuns en la Valragn
Sessiun: 27.11.2002
Suenter l'accident en il tunnel da via dal Gottard da l'october 01 è enconuschentamain vegnì introducì per il tunnel dal San Bernardin il sistem da direcziun unica per camiuns. Dapi lura vegn il vial dal sid da la A 13 en la Valragn duvrà sco zona da rimnada per camiuns ed il traffic d'autos da persunas sco er ils camiuns cun permissiuns spezialas vegnan deviads permanentamain sin la via chantunala. Quest sistem da dosar ha gì l'effect che malgrà l'augment da traffic n'hai betg dà accidents en il tunnel dal San Bernardin, perencunter hai dentant dà insaquants grevs accidents sin la rampa d'access vers nord.
La Valragn che viva principalmain dal turissem, da l'agricultura biologica e dal mastergn ha dapi l'introducziun dal sistem da dosar da patir ferm da las consequenzas da la zona da rimnada. Il turissem ha p. ex. stuì tolerar l'enviern passà grondas sperditas.
Sin fundament da questa situaziun insupportabla a lunga vista fatsch jau suandantas dumondas a la regenza:
- È la regenza er sco jau da l'avis, sin fundament dals per part grevs accidents sin la via d'access davent da la Viamala, ch'il sistem da dosar stuess vegnir introducì gia davent da Tusaun per esser credibel (analog sco ch'i vegn pratitgà da la vart dal sid en il Mesauc gia da l'entschatta).
- Quant ditg vegn anc a cuntinuar la situaziun mumentana?
- Èn planisadas construcziuns permanentas per la zona da rimnada per camiuns en la Valragn?
- Perquai ch'il traffic d'autos da persunas e per part er il traffic da camiuns lung la zona da rimnada vegn devià permanentamain sin la via chantunala, èsi capità er là intgins (per part grevs) accidents. Per il traffic da velos e da maschinas agriculas èsi magari fitg privlus d'utilisar questa via. È la regenza conscienta da questa problematica e co pudess'ins meglierar la situaziun?
Cuira, ils 27 da november 2002
Num: Stoffel
Session: 27.11.2002
Vorstoss: rg SchriftlicheAnfrage
Resposta da la regenza
Las experientschas dals davos mais han mussà che da princip èsi sa cumprovà da mantegnair il sistem da dosar cun traffic a direcziun unica per camiuns en il tunnel dal San Bernardin. La conduita dal traffic optimada cun l'uschenumnà sistem da dumbrar gut a gut en il tunnel da via dal Gottard ha ultra da quai in effect positiv sin la frequenza dal traffic da la A13.
Davart las dumondas concretas:
1. La controlla en la zona da rimnada sco quai ch'ella vegn pratitgada oz a Soazza en il Grischun dal sid ed a Nufenen en il nord è sa cumprovada areguard l'andament dal traffic. I constat che areguard la segirezza dal traffic fissi da beneventar ina translocaziun da la zona da rimnada vers nord en l'aglomeraziun da Tusaun cumbinda cun in scumond da cruschar per camiuns sin l'entir traject. Per motivs da la politica da traffic e per motivs da manaschi n'è quai dentant betg pussaivel. Ultra da quai pudessi dar che cun transferir la zona da rimnada s'augmentass il ristg d'accidents, perquai che sin la rampa vers nord, ch'è bunamain il dubel lunga, datti be paucas pussaivladads da surpassar.
Malgrad l'augment da traffic sin l'axa dal San Bernardin en connex cun l'eveniment en il tunnel da via dal Gottard èn ils accidents da traffic che la polizia ha registrà sa sminuids. Ils accidents tar ils quals igl eran cumpigliads camiuns pesants eran bain s'augmentads minimalmain durant ch'il Gottard era serrà, dentant suenter èn els puspè sa sminuids cleramain.
Las mesiras da traffic ordinadas sco distanzas minimalas, scumond da surpassar e traffic en direcziun unica per camiuns sco er la controlla intensivada da la polizia han segir influenzà positivamain quest svilup positiv dal dumber d'accidents.
2. Da princip pretenda la conferaziun ch'il reschim da traffic al Gottard ed al San Bernardin s'accordian. Perquai duai il sistem alternant en direcziun unica cun las zonas da rimnada translocadas vegnir mantegnì ad interim - almain fin che las lavurs da sanaziun en il tunnel dal San Bernardin èn finidas.
3. Per il mument intercurescha ed examinescha l'uffizi da construcziun bassa e la polizia chantunala lieus, nua ch'ins pudess construir rimnadas per camiuns er ordaifer la via naziunala. Decidì n'è dentant anc nagut.
4. La regenza ed ils uffizis cumpetents èn conscients che la situaziun da traffic speziala en la zona da dosar a Nufenen è malsegira. Perquai vegnan prendidas las mesiras da construcziun e signalisaziun necessarias per augmentar la segirezza dal traffic.
Uschia ha la situaziun dal traffic pudì vegnir meglierada er cun scursanir il traject da sviament sin la via chantunala.
L'analisa dals accidents mussa per fortuna nagin augment dals accidents da traffic, ni sin la rampa d'access da la A13 ni sin la part da la via principala tranter Spleia e Nufenen.
Datum: 4 da favrer 2003