La confederaziun ha instradà ina vasta examinaziun e reconcepziun da sia politica regiunala d'enfin uss. Il rapport da la cumissiun d'experts è mo avant maun sco sboz. La nova politica regiunala (NPR) duai s'applitgar da princip a l'entir territori da la Svizra e na betg pli a territoris spezials da promoziun. La nova politica regiunala vul primarmain eruir e promover ils potenzials da tut las regiuns da la Svizra e sustegnair uschia en las regiuns plazzas da lavur cumpetitivas. Quai vul la nova politica regiunala cuntanscher cun rinforzar la productivitad e la cumpetitivitad d'interpresas ed instituziuns. La visiun d'ina nova politica regiunala sa basa sin l'idea che tut las regiuns possedan potenzials. Las regiuns ston percepir la midada da structura sco schanza e profitar cun atgn'iniziativa da las schanzas da svilup ch'èn avant maun. I sto vegnir prendì per enconuschientscha che betg tut las regiuns vegnan a sa sviluppar egualmain. L'aspectativa, che la midada da structura na fetschia betg donn a las regiuns periferas u ch'in instrumentari da promoziun possia cumpensar cumplettamain ils dischavantatgs dal lieu, n'è betg realisabla.

1. Nua èn las schanzas ed ils potenzials da regiuns ruralas cun pauca infrastructura turistica?

Strategias regiunalas ston vegnir drizzadas cun cleras finamiras sin l'explotaziun da potenzials en ed ordaifer l'atgna regiun. Territoris rurals disponan per regla da gronds potenzials natirals. Sa basond sin quels potenzials èn las suandantas pussaivladads da svilup imaginablas:
- turissem natiral e parcs natirals, sche pussaivel cun utilisaziun per il turissem
- producziun d'energia (regiun d'energia), primarmain cun forza idraulica
- agricultura ecologica, elavuraziun e producziun da products agriculs (products da nischa, spezialitads)
- economia forestala e da laina (elavuraziun, producziun da products)
- utilisaziun da la materia prima craps
- mastergn e punctualmain producziuns industrialas pli pitschnas.

2. Cun tge instruments da la politica regiunala duain quests potenzials vegnir explotads?

Da princip vali da constatar che la politica sectorala sco l'agricultura e l'economia forestala dispona da pli gronds meds che la politica regiunala e che sia concepziun
ed applicaziun è correspundentamain d'impurtanza decisiva. Ils instruments regiunals-politics fan in effect subsidiar. Ozendi èn quai credits a l'hotellaria ed als lieus da cura, garanzias e contribuziuns als custs dals tschains en territoris da muntogna, ils agids da finanziaziun per territoris da renovaziun economica, ils sustegn da la midada da structura en il territori rural (RegioPlus), l'agid d'investiziuns per territoris da muntogna, la promoziun d'innovaziuns e la collavuraziun en il turissem (InnoTour) ed Interreg. Co ed en tge furma che quests instruments existents vegnan cuntinuads e co che quels vegnan adattads als novs basegns ed a las provocaziuns da la nova politica regiunala è anc avert. Per il mument ston ins partir dal fatg che per la politica regiunala stattan a disposiziun meds da sumeglianta dimensiun. Il chantun cumplettescha ils programs federals sa basond sin la lescha chantunala davart il promover l'economia publica ch'è il mument en revisiun. Ins sto constatar ch'i na mancan betg instruments, mabain savens projects cun ina valur agiuntada e finanziaziun suffizienta.

3. Cun tge pussaivladads po la regenza gidar a concepir la restructuraziun da la politica regiunala svizra?

Il departament da l'intern e da l'economia publica ha elavurà en collavuraziun cun la conferenza da las regenzas dals chantuns da muntogna in document da posiziun davart la politica regiunala. Tal vegn proximamain inoltrà a las autoritads federalas.
Ils interess dal chantun vegnan manifestads en discussiuns, en la consultaziun e sur las/ils parlamentari(a)s federal(a)s.


Datum: 11 da favrer 2003